966
“Visa kartları ilə ödəniş qazandırır!” adlı tirajlı stimullaşdırıcı lotereya
Geniş əhali təbəqəsinin ödəniş kartlarından istifadəyə stimullaşdırılması, cəmiyyətdə nağdsız ödəniş vərdişlərinin formalaşdırılması və iqtisadiyyatda nağdsız dövriyyənin artırılması məqsədilə Mərkəzi Bank Visa Beynəlxalq Xidmət Assosiasiyasının dəstəyi ilə 1 mart 2020-ci il tarixindən başlayaraq geniş əhali təbəqəsini əhatə edən 2 aylıq “Visa kartları ilə ödəniş qazandırır!” adlı stimullaşdırıcı lotereya keçirəcək. İki tiraj üzrə keçiriləcək stimullaşdırıcı lotereyada Azərbaycan bankları tərəfindən emissiya edilmiş “Visa” brendli ödəniş kartları ilə ölkədə fəaliyyət göstərən təsərrüfat subyektlərində (mağaza, restoran və s.) quraşdırılmış POS-terminallarda minimum 5 (beş) manat məbləğində nağdsız əməliyyat aparan kart istifadəçiləri avtomatik olaraq kampaniyada iştirak hüququ əldə edəcəklər. Lotereyanın uduş məbləği 100 (bir yüz) manat məbləğində kart sahibinin bank hesabına daxil edilərək “cashback” şəklində təqdim olunacaq. Bu barədə müştərilər kart hesabına xidmət edən bank tərəfindən məlumatlandırılacaq.
Ümumilikdə 300 nəfərin qalib olacağı lotereya 1 mart 2020-ci il tarixindən 30 aprel 2020-ci il tarixinədək 2 tirajda təşkil ediləcəkdir.
1. I tirajın uduş fondu 15 aprel 2020-ci il tarixində oynanılacaqdır (tiraj 01.03.2020-dən 31.03.2020-ə qədər olan dövrü əhatə edir);
2. II tirajın uduş fondu 15 may 2020-ci il tarixində oynanılacaqdır (tiraj 01.04.2020-dən 30.04.2020-ə qədər olan dövrü əhatə edir).
Lotereyada iştirak hüququ verməyən əməliyyatlar:
- korporativ kartlarla aparılan əməliyyatlar;
- ləğv edilmiş (reversal) əməliyyatlar;
- istifadəçisi eyniləşdirilməyən kartlarla aparılan əməliyyatlar;
- elektron ticarət əməliyyatları.
Lotereya, Azərbaycan Respublikası Prezidentinin 2018-ci il 26 sentyabr tarixli, 508 nömrəli Sərəncamı ilə təsdiq edilmiş “2018–2020-ci illərdə Azərbaycan Respublikasında rəqəmsal ödənişlərin genişləndirilməsi üzrə Dövlət Proqramı” üzrə Mərkəzi Banka verilən tapşırıqlar çərçivəsində əhalinin rəqəmsal ödənişlərə və ödəniş kartlarından istifadəyə stimullaşdırılması məqsədilə həyata keçirilir.
