966
Azərbaycan Respublikasının Mərkəzi Bankı tərəfindən həyata keçirilən “Maliyyəçisən” təcrübə proqramı ölkənin yüksək potensiallı gənclərinə biliklərini təkmilləşdirmək və praktiki təcrübələrini artırmaq imkanı təqdim edir.
Mərkəzi bankçılıq sistemi üzrə əvəzsiz təcrübə qazandıracaq bu proqram gənclərə uğurlu karyera yolunda inamla irəliləməyə təkan verəcək. İştirakçılar təcrübə müddəti ərzində seçilən istiqamətlər üzrə təyin olunan mentorların dəstəyi ilə ən mühüm bacarıqlara yiyələnəcək, müxtəlif bankdaxili təlimlərə qatılacaqlar.
Proqramı uğurla bitirən təcrübəçilərə Mərkəzi Bank tərəfindən sertifikat və tövsiyə məktubu təqdim olunacaq.
Proqram ilə bağlı digər detallar:
Proqramın müddəti - 2 ay (iyul və avqust ayları)
İştirak- həftənin 5 günü
Ödəniş - gündəlik yol və qidalanma xərclərini qarşılaya biləcək məbləğdə təqaüd
Təcrübəçilərin seçim mərhələsi
- Müraciətlərin qəbulu və nəzərdən keçirilməsi
- Test mərhələsi
- Qrup müsahibəsi
- Panel müsahibəsi
- 2026-cı il üzrə təcrübə proqramının əhatə etdiyi istiqamətlər
- Bazar davranışlarının tənzimlənməsi departamenti
Departamentin fəaliyyətinin əsas məqsədi maliyyə sektorunda istehlakçı və investorların hüquqlarının qorunmasına yönəldilmiş tənzimləmə və nəzarət siyasətini müəyyən etmək, maliyyə sektorunda ədalətli rəftara və biznes davranışlarına təsir edən riskləri müəyyən etmək, həmin risklərin minimallaşdırılması üzrə maliyyə xidmətləri istehlakçılarının və investorların hüquqlarının müdafiəsi siyasətini və nəzarət çərçivəsini formalaşdırmaqdır. Bazar davranışlarının tənzimlənməsi departamentdə 3 şöbə mövcuddur: Bazar davranışları siyasəti şöbəsi, Bazar davranışlarına nəzarətin metodologiyası şöbəsi, Maliyyə məlumatlılığı və peşəkar inkişaf şöbəsi.
Bazar davranışlarına nəzarətin metodologiyası şöbəsi
2026-ci ildə Bazar davranışlarının tənzimlənməsi departamentinin Bazar davranışlarına nəzarətin metodologiyası şöbəsi təcrübəçi qəbul edəcək. Bazar davranışlarına nəzarətin metodologiyası şöbəsi qabaqcıl beynəlxalq təcrübəyə uyğun formada nəzarət subyektlərinin fəaliyyətinin tənzimlənməsi üçün normativ-metodoloji bazanı hazırlayır və təkmilləşdirir. Şöbə Mərkəzi Bankın nəzarət funksiyasını həyata keçirən digər struktur bölmələri ilə sıx əməkdaşlıq edir, onlara metodoloji dəstək göstərir və tənzimləmələrin təkmilləşdirilməsi üzrə təkliflər hazırlayır. Cəlb edilən təcrübəçi şöbələrin bütün fəaliyyət istiqamətlərinə cəlb ediləcək.
Bazar davranışları siyasəti şöbəsi
2026-ci ildə Bazar davranışlarının tənzimlənməsi departamentinin Bazar davranışları siyasəti şöbəsi təcrübəçi qəbul edəcək. Bazar davranışları siyasəti şöbəsi maliyyə bazarlarında istehlakçıların müdafiəsini təmin etmək və ədalətli bazar davranışlarını təmin etmək üçün siyasətləri müəyyənləşdirməklə məşğuldur. Şöbənin fəaliyyəti çərçivəsində beynəlxalq təcrübələrin araşdırılması, yeni qaydaların hazırlanması, bazar davranışları üzrə nəzarət mexanizmlərinin qurulması və istehlakçı və investorların hüquqlarının qorunmasına dair digər tədbirlərin təşkili həyata keçirilir. Cəlb edilən təcrübəçi şöbənin müxtəlif istiqamətli layihələrində iştirak edəcək, əsas təcrübəsi bazar davranışlarının tənzimlənməsi üzrə araşdırmalar aparmaq, tənzimləyici çərçivələrin təkmilləşdirilməsinə dəstək vermək və beynəlxalq təcrübələri öyrənmək olacaq.
Maliyyə məlumatlılığı və peşəkar inkişaf şöbəsi
2026-ci ildə Bazar davranışlarının tənzimlənməsi departamentinin Maliyyə məlumatlılığı və peşəkar inkişaf şöbəsi təcrübəçi qəbul edəcək. Şöbə maliyyə savadlılığı üzrə siyasətin formalaşdırılması, mövcud vəziyyətin diaqnostikasının aparılması və genişmiqyaslı maarifləndirmə fəaliyyətlərinin təşkilini həyata keçirir. Bu istiqamətdə həm maliyyə bazarının iştirakçıları həm də digər dövlət qurumları ilə sıx əməkdaşlıq edərək təşəbbüslərin geniş auditoriyalara çatdırılmasını təmin edir və ölkədə maliyyə savadlılığı ekosisteminin dayanıqlı inkişafına töhfə verir. Bu fəaliyyətləri dəstəkləmək məqsədilə şöbə beynəlxalq maliyyə savadlılığı modellərini və qlobal standartları nəzərə alaraq fərqli hədəf qruplarına uyğun maarifləndirmə proqramları hazırlayır. Bununla yanaşı, şöbə maliyyə sektorunda çalışan mütəxəssislərin peşəkar inkişafını sistemli şəkildə dəstəkləyir. Bu məqsədlə təlimlər və seminarlar təşkil edir, qabaqcıl beynəlxalq təcrübənin tətbiqini təşviq edir. Sektor üzrə bilik və bacarıqların müasir tələblərə uyğunlaşdırılmasına, etik və peşəkar standartların yüksəldilməsinə, eləcə də davamlı öyrənmə mədəniyyətinin formalaşdırılmasına töhfə verir. Cəlb edilən təcrübəçi bütün istiqamətlər üzrə fəaliyyətlərə cəlb ediləcəklər və şöbənin fəaliyyət istiqamətləri üzrə bilik və bacarıqlara yiyələnəcəklər.
- Beynəlxalq əməkdaşlıq və kommunikasiya departamenti
Departamentin fəaliyyətinin əsas məqsədi Mərkəzi Bankın səlahiyyətlərinə aid məsələlər üzrə beynəlxalq əlaqələrin və əməkdaşlığın, kommunikasiya işinin təşkili və inkişafını təmin etmək və imicinin yüksəldilməsinə nail olmaqla Mərkəzi Bankın missiyasının səmərəli reallaşmasına dəstək verməkdən ibarətdir. Departamentdə 3 şöbə mövcuddur: Beynəlxalq əməkdaşlıq şöbəsi, Kommunikasiya şöbəsi və Protokol şöbəsi.
Kommunikasiya şöbəsi
2026-cı ildə Beynəlxalq əməkdaşlıq və kommunikasiya departamentinin Kommunikasiya şöbəsi təcrübəçi qəbul edəcək. Sözügedən şöbə Mərkəzi Bankın kommunikasiya fəaliyyətinin təşkilinə və imicinin yüksəldilməsinə, eləcə də rəsmi veb-saytın və sosial media hesablarının idarəçiliyi, media və ekspert sorğularının cavablandırılması, mətbuat gündəmində olan mövzuların araşdırılması, bu istiqamətdə müxtəlif hesabatların hazırlanmasına məsuliyyət daşıyır. Kommunikasiya şöbəsi məzmunyaratma funksiyasını da həyata keçirir. Məzmunlar rəsmi məktubların, press-relizlərin, paylaşım mətnlərinin yaradılmasını əhatə edir. Cəlb edilən təcrübəçi şöbənin bütün istiqamətlərinə cəlb ediləcək, əsas təcrübəsi məzmun yaradılmasına yönəldiləcək.
- Hüquqi və təşkilati işlər departamenti
Departamentin fəaliyyətinin əsas məqsədi Mərkəzi Bankda korporativ hüquq, inzibati xətalar üzrə icraat, kargüzarlıq işlərinin, habelə vətəndaşların müraciətlərinə baxılması işinin effektiv həyata keçirilməsi və koordinasiya edilməsindən ibarətdir. Departament 3 şöbədən ibarətdir: Korporativ hüquq şöbəsi, İnzibati icraat və məhkəmə işləri şöbəsi, Korporativ idarəetmə və katiblik şöbəsi.
Korporativ hüquqşöbəsi
2026-cı il üzrə Hüquq və təşkilati işlər departamentinin Korporativ hüquq şöbəsi və İnzibati icraat və məhkəmə işlər şöbəsi təcrübəçi qəbul edəcək. Korporativ hüquq şöbəsi Mərkəzi Bankın idarəetmə, təşkilati məsələlər və daxili nəzarət sahəsində reqlament sənədlərinin (daxili qaydalar, prosedurlar, əsasnamələr və s.), eləcə də qeyri-normativ hüquqi aktlarının hazırlanmasında iştirak edir və həmin sənədlərin hüquqi ekspertizasını həyata keçirir, Mərkəzi Bankda əmək münasibətlərinin hüquqi təminatını həyata keçirir, Mərkəzi Bankın pul siyasəti alətlərinin tətbiqi, ölkədə nağd pulun tədavülü, qızıl-valyuta ehtiyatlarının idarə olunması ilə bağlı hüquq işlərində, o cümlədən müvafiq hüquqi aktların və digər hüquqi sənədlərin hazırlanmasında iştirak edir, bu proseslərdə qarşıya çıxan məsələlərlə bağlı hüquqi yardım göstərir və s. Cəlb edilən təcrübəçi bütün istiqamətlər üzrə fəaliyyətlərə cəlb ediləcəklər və şöbənin fəaliyyət istiqamətləri üzrə bilik və bacarıqlara yiyələnəcəklər.
İnzibati icraat və məhkəmə işləri şöbəsi
2026-cı il üzrə Hüquq və təşkilati işlər departamentinin İnzibati icraat və məhkəmə işləri şöbəsi təcrübəçi qəbul edəcək. İnzibati icraat və məhkəmə işləri şöbəsi Mərkəzi Bankın səlahiyyətlərinə aid edilmiş inzibati xətalar haqqında işlər üzrə daxil olan məlumat və sənədləri araşdırır və inzibati xəta haqqında protokollar tərtib edir, icraata başlanılması barədə bildirişlər göndərir, etibarnamə əsasında Mərkəzi Bankın iştirak etdiyi məhkəmə işlərini aparır və bununla əlaqədar müvafiq prosessual hərəkətləri həyata keçirir, prosessual sənədlərin (iddia ərizələrinin, apellyasiya və ya kassasiya şikayətlərinin, iddia ərizələrinə dair etirazların və s.) hazırlanmasını təmin edir və s. Cəlb edilən təcrübəçilər şöbənin bütün istiqamətləri üzrə fəaliyyətlərə cəlb ediləcəklər və şöbənin fəaliyyət istiqamətləri üzrə müvafiq bilik və bacarıqlara yiyələnəcəklər.
- İnformasiya texnologiyaları əməliyyatları departamenti
Departamentin əsas fəaliyyət istiqaməti Mərkəzi Bankın server, şəbəkə və informasiya sistemlərinin idarə olunmasını təmin etmək, eləcə də İT infrastrukturunun fasiləsiz, təhlükəsiz və səmərəli fəaliyyətini təşkil etməkdir. Departament əməkdaşların gündəlik fəaliyyətində istifadə etdiyi kompüter texnikası, proqram təminatı və müxtəlif informasiya sistemlərinin stabil və effektiv işləməsinə nəzarət edir, onların texniki dəstəyini həyata keçirir.
İT İnfrastruktur şöbəsi - Texniki dəstək bölməsi
2026-cı ildə İnformasiya Texnologiyaları Əməliyyatları Departamentinin İT İnfrastruktur şöbəsinin Texniki dəstək bölməsi təcrübəçi qəbul edəcək. Texniki dəstək bölməsi əməkdaşların kompüter, printer, proqram təminatı və digər texniki avadanlıqlarla bağlı qarşılaşdıqları problemlərin aradan qaldırılmasını təmin edir. Bölmə yeni avadanlıqların quraşdırılması, proqram təminatının yazılması və yenilənməsi, həmçinin istifadəçilərə ilkin texniki dəstəyin göstərilməsi ilə məşğul olur.Təcrübəçilər gündəlik texniki sorğuların cavablandırılmasında, avadanlıqların quraşdırılması prosesində və sadə texniki nasazlıqların aradan qaldırılmasında iştirak edəcəklər. Cəlb edilən təcrübəçi istifadəçilərə texniki dəstəyin göstərilməsi və İT avadanlıqlarının ilkin sazlanması sahəsində praktiki bilik və bacarıqlar əldə edəcəklər.
- İnformasiya və kibertəhlükəsizlik departamenti
Departamentin fəaliyyətinin əsas məqsədi Mərkəzi Bankda informasiya təhlükəsizliyi, kibertəhlükəsizlik və rəqəmsal fırıldaqçılıqla mübarizənin təmin edilməsi, Mərkəzi Bankın nəzarət etdiyi subyektlərin bu istiqamətdə nəzarət tədbirləri ilə əhatə edilməsi, onların bu sahələrdə fəaliyyətlərinin əlaqələndirilməsi, informasiya təhlükəsizliyi, kibertəhlükəsizlik və rəqəmsal fırıldaqçılıq üzrə davamlılığın təmin edilməsi və risklərin vaxtında aşkarlanaraq qarşısının alınmasından ibarətdir. İnformasiya və kibertəhlükəsizlik departamentində 5 şöbə mövcuddur: İnformasiya təhlükəsizliyi mühəndisliyi şöbəsi, Kiberhücumların simulyasiyası və tətbiq təhlükəsizliyi şöbəsi, Təhlükəsizlik əməliyyat mərkəzi şöbəsi, İnformasiya, kibertəhlükəsizlik siyasəti və nəzarəti şöbəsi və Rəqəmsal fırıldaqçılıqla mübarizə və monitorinq şöbəsi.
İnformasiya kibertəhlükəsizlik siyasəti və nəzarəti şöbəsi
2026-cı ildə İnformasiya və kibertəhlükəsizlik departamentinin İnformasiya, kibertəhlükəsizlik siyasəti və nəzarəti şöbəsi təcrübəçi qəbul edəcək. Sözügedən şöbə maliyyə bazarına nəzarət subyektlərində və Mərkəzi Bankda informasiya təhlükəsizliyinin təmin edilməsinə dair minimum tələblərə riayət olunmasına nəzarəti həyata keçirir, normativ-hüquqi və metodoloji bazanın təkmilləşdirilməsini təmin edir, informasiya təhlükəsizliyi üzrə risklərin və nəzarət mexanizmlərinin effektivliyini qiymətləndirir və qiymətləndirmə nəticələri əsasında müvafiq hesabatlar hazırlayır. Cəlb edilən təcrübəçi şöbənin fəaliyyətinin bütün istiqamətlərinə cəlb ediləcək.
- İnsan resursları departamenti
Departamentin fəaliyyətinin əsas məqsədi Mərkəzi Bankda İnsan resurslarının idarə edilməsi siyasətinə və Mərkəzi Bankın strateji hədəflərinə müvafiq olaraq onun davamlı dinamik inkişafına xidmət edən insan kapitalının formalaşdırılması, inkişaf etdirilməsi və qorunub saxlanılmasıdır. İnsan resursları departamentində 3 şobə mövcuddur: İnsan resurslarının planlaşdırılması və işə qəbul şöbəsi, İnsan Kapitalının inkişafı və əməkdaşların işə bağlılığı şöbəsi və Əmək münasibətlərinin idarə edilməsi şöbəsi.
İnsan kapitalının inkişafı və əməkdaşların işə bağlılığı şöbəsi
2026-cı ildə İnsan resursları departamentinin İnsan kapitalının inkişafı və əməkdaşların işə bağlılığı şöbəsi təcrübəçi qəbul edəcəkdir. Sözügedən şöbə Mərkəzi Bank əməkdaşlarının istedadlarının və performansının idarə olunması, təlim və inkişaf fəaliyyətlərinin təşkili, həmçinin əməkdaşların işə bağlılığını artırmağa yönəlmiş təşəbbüslərin planlaşdırılması və icrasına məsuliyyət daşıyır. Cəlb edilən təcrübəçi şöbənin fəaliyyət istiqamətləri ilə yaxından tanış olmaq imkanı əldə edəcək, əsas təcrübəsini isə təlim və inkişaf istiqamətində qazanacaqdır. Belə ki, təcrübəçi təlimlərin planlaşdırılması və təşkilində dəstək göstərəcək, yeni əməkdaşlar üçün nəzərdə tutulmuş adaptasiya proqramının icrasında iştirak edəcək və şöbənin gündəlik fəaliyyətinə cəlb olunacaqdır.
- İstehlakçılarla iş departamenti
Departamentin fəaliyyətinin əsas məqsədi maliyyə xidmətləri istehlakçılarından və investorlardan Mərkəzi Banka daxil olmuş ərizə və şikayətlərə baxılması, onların təhlil edilməsi, vətəndaşların qəbulunun həyata keçirilməsi, çağrı mərkəzinin işinin təşkil edilməsi, istehlakçıların hüquqlarının pozulmasının qarşısının alınması və pozulmuş hüquqların bərpasının təmin edilməsini həyata keçirməkdir. İstehlakçılarla iş departamenti Maliyyə xidmətləri istehlakçılarının hüquqlarının müdafiəsi şöbəsindən, Vətəndaşların qəbulu şöbəsindən, Çağrı mərkəzindən və Müraciətlərin təhlili bölməsindən ibarətdir.
Müraciətlərin təhlili bölməsi
2026-cı ildə İstehlakçılarla iş departamentinin Müraciətlərin təhlili bölməsi təcrübəçi qəbul edəcək. Bölmə, departamentin daxili statistik təhlillərini aparır, hesabatlarını hazırlayır, vətəndaşların müraciətlərini, eyni zamanda təkrar müraciətlərini təhlil edir və onlara göstərilən xidmət keyfiyyətinin artırılması istiqamətində təkliflər verir, rəhbərliyin tapşırığı ilə Mərkəzi Bankın rəhbərliyi və struktur bölmələri üçün arayışlar və materiallar hazırlayır və rəhbərliyin tapşırıqlarına uyğun olaraq fəaliyyət istiqamətləri üzrə digər işləri yerinə yetirir. Cəlb edilən təcrübəçi bölmənin bütün fəaliyyət istiqamətlərinə cəlb ediləcək, əsas təcrübəsi müraciətlərin təhlili və onun əsasında hesabatların hazırlanması olacaqdır.
Maliyyə xidmətləri istehlakçılarının hüquqlarının müdafiəsi şöbəsi
2026-cı ildə İstehlakçılarla iş departamentinin Maliyyə xidmətləri istehlakçılarının hüquqlarının müdafiəsi şöbəsi təcrübəçi qəbul edəcək. Həmin şöbə Mərkəzi Banka müraciət edən istehlakçılardan daxil olan yazılı və şifahi müraciətlərə baxır, müraciətlərlə əlaqəli sorğular göndərir, zəruri olduqda müvafiq departamentlərdən rəy alır və araşdırmanın nəticəsinə uyğun olaraq cavablar hazırlayır, istehlakçıların müraciətləri ilə əlaqədar olaraq müəyyən edilmiş hüquq pozuntuları barədə inzibati xətalar haqqında işlər üzrə icraata başlanması üçün müvafiq struktur bölməyə müraciət edir, emitentlər (qiymətli kağızları kütləvi təklif edilmiş və tənzimlənən bazarda ticarətə buraxılmış emitentlər istisna olmaqla) tərəfindən tərtib edilən illik hesabatları qəbul və təhlil edir, cəlb edildiyi hallarda Mərkəzi Bankın struktur bölmələri tərəfindən nəzarət subyektlərində aparılan yoxlamalarda iştirak edir və departamentin əsasnaməsində nəzərdə tutulmuş digər işləri həyata keçirir. Cəlb edilən təcrübəçinin əsas təcrübəsi istehlakçılardan daxil olan yazılı və şifahi müraciətlərə baxılması üzrə olacaq.
Vətəndaşların qəbulu şöbəsi
2026-cı ildə Vətəndaşların qəbulu şöbəsi təcrübəçi qəbul edəcək. Həmin şöbə Mərkəzi Banka müraciət edən istehlakçıların Bakı şəhəri 2 saylı “ASAN xidmət” və 5 saylı “ASAN xidmət” mərkəzlərində, regional mərkəzlərdə, səyyar və videoqəbul formatında qəbul edir; vətəndaşların Mərkəzi Bankın rəhbərliyi və struktur bölmə rəhbərləri tərəfindən qəbulunu, o cümlədən video və səyyar qəbulunu təşkil edir; qəbul zamanı yazılan müraciətlərlə əlaqəli sorğular göndərir, zəruri olduqda müvafiq departamentlərin rəyini alır və araşdırmanın nəticəsinə uyğun olaraq cavablar hazırlayır; istehlakçıların maliyyə bazarlarında qanuni maraqlarının pozulması və ya pozulmasına şərait yaradan halların aradan qaldırılması barədə nəzarət subyektlərinə icrası məcburi olan göstərişlər verir (və ya hazırlayır); respublikanın regionlarında səyyar qəbullar təşkil edir; fəaliyyət istiqamətləri üzrə digər təşkilat və dövlət orqanları ilə əməkdaşlıq edir; rəhbərliyin tapşırıqlarına uyğun olaraq fəaliyyət istiqamətləri üzrə digər işləri yerinə yetirir. Cəlb edilən təcrübəçinin əsas təcrübəsi istehlakçıları qəbul etmək, daxil olan yazılı və şifahi müraciətlərə baxılması üzrə olacaq.
- Kapital bazarı fəaliyyətinə nəzarət departamenti
Departamentin fəaliyyətinin əsas məqsədi qiymətli kağızlar bazarı və törəmə maliyyə alətləri sahəsində nəzarətin effektiv həyata keçirilməsi ilə kapital bazarında sabitliyi və dayanıqlığını, eləcə də kapital bazarı sahəsində şəffaflığı və məlumatların açıqlanmasını təmin etməkdən ibarətdir. Kapital bazarı fəaliyyətinə nəzarət departamentində 3 şöbə mövcuddur: Kapital bazarına və infrastruktura nəzarət şöbəsi, Korporativ maliyyə şöbəsi, Lisenziyalaşdırma və qeydiyyat şöbəsi.
Kapital bazarına və infrastruktura nəzarət şöbəsi
2026-cı ildə Kapital bazarı fəaliyyətinə nəzarət departamentinin Kapital bazarına və infrastrukturuna nəzarət şöbəsi təcrübəçi qəbul edəcək. Şöbə qiymətli kağızlar bazarında lisenziyalaşdırılmış şəxslərin, investisiya fondları və onların idarəçilərinin fəaliyyətinə mikroprudensial nəzarəti həyata keçirir, maliyyə dayanıqlığını qiymətləndirir və illik risk reytinqlərini müəyyənləşdirir. Şöbə fəaliyyəti çərçivəsində investisiya şirkətlərinin, mərkəzi depozitarın, fondların və idarəçilərin fəaliyyətini yoxlayır, sui-istifadə, manipulyasiya və insayd məlumatlardan istifadə halları aşkar edildikdə qanunvericiliyə uyğun tədbirlər görür, investorların hüquqlarını müdafiə edir və bazarın təhlükəsizliyini təmin edir.
Həmçinin, şöbə lisenziyasız fəaliyyətləri proaktiv şəkildə aşkarlayır, qanun pozuntuları ilə bağlı aidiyyəti dövlət orqanlarına məlumat verir və hesabatların təhlili, arayışların hazırlanması və səlahiyyətinə aid digər inzibati işləri həyata keçirir. Lisenziya və icazələrin verilməsi və ləğvi, cinayət yolu ilə əldə edilmiş vəsaitlərin və terrorçuluğun maliyyələşdirilməsi halları üzrə qanunvericiliyin tələblərinin icrasına nəzarət edir. Şöbə eyni zamanda kapital bazarının inkişafı və təbliğində iştirak edir, metodoloji və analitik işləri dəstəkləyir və rəhbərliyin tapşırıqlarına uyğun digər fəaliyyətləri yerinə yetirir. Cəlb edilən təcrübəçi bütün istiqamətlər üzrə fəaliyyətlərə cəlb ediləcəklər və şöbənin fəaliyyət istiqamətləri üzrə bilik və bacarıqlara yiyələnəcəkdir.
Korporativ maliyyə şöbəsi
2026-cı ildə Kapital bazarı fəaliyyətinə nəzarət departamentinin Korporativ maliyyə şöbəsi təcrübəçi qəbul edəcək. Korporativ maliyyə şöbəsi qiymətli kağızları kütləvi təklif edilmiş və tənzimlənən bazarda ticarətə buraxılmış emitentlər tərəfindən qanunvericiliklə nəzərdə tutulmuş məlumatların və hesabatların açıqlanmasına nəzarəti və monitorinqi həyata keçirilməsi, qiymətli kağızlar bazarına daxil olmağı hədəfləyən potensial emitentlərin maliyyə sağlamlığının təhlil edilməsi və qiymətləndirilməsi üzrə fəaliyyət göstərir. Cəlb edilən təcrübəçi bütün istiqamətlər üzrə fəaliyyətlərə cəlb ediləcəklər və şöbənin fəaliyyət istiqamətləri üzrə bilik və bacarıqlara yiyələnəcəkdir.
Həmçinin, şöbə öz səlahiyyətləri çərçivəsində qiymətli kağızlar bazarına dair qanunvericiliyə əməl edilməsinə nəzarət edir və onun tələblərini pozan şəxslərə icrası məcburi göstərişlərin, habelə digər inzibati icraat tədbirlərinin tətbiqi üzrə təkliflər irəli sürür. Bununla yanaşı, şöbə məlumatların açıqlanması prosesinin optimallaşdırılması üzrə öz səlahiyyətləri çərçivəsində təkliflər verir.
Lisenziyalaşdırma və qeydiyyat şöbəsi
2026-cı ildə Kapital bazarı fəaliyyətinə nəzarət departamentinin Lisenziyalaşdırma və qeydiyyat şöbəsi təcrübəçi qəbul edəcək.Şöbənin fəaliyyət istiqamətləri əsasən nəzarət subyektlərinin fəaliyyətinin həyata keçirilməsi ilə bağlı lisenziyanın verilməsi və nəzarət subyektlərində rəhbər vəzifə tutan şəxslərin təyinatı ilə bağlı müraciətlərə baxılması, ixtisas şəhadətnamələrinin alınması ilə bağlı attestasiya imtahanlarının təşkili, qiymətli kağızların dövlət qeydiyyatı ilə bağlı daxil olmuş sənədlərin, o cümlədən emissiya prospektlərinin və informasiya memorandumlarının qanunvericiliyin tələblərinə uyğun hazırlanmasına nəzarət edilməsi, qiymətli kağızların və emissiya prospektlərinin (informasiya memorandumlarının) dövlət reyestrini aparılması, səhmlərin birləşdirilməsi, xırdalanması və onların nominal dəyərinin artırılması zamanı səhmlərin emissiyasını dövlət qeydiyyatına alınması, qiymətli kağızların dövriyyədən çıxarılması ilə bağlı müraciətlərə baxılması və dövriyyədən çıxarılmış qiymətli kağızlar üzrə qiymətli kağızların dövlət reyestrində müvafiq qeydlər aparılması, qiymətli kağızların emissiyasının yekunları haqqında hesabatlarla bağlı müraciətlərə baxılması və hesabatların təsdiqi ilə bağlı işləri icra edilməsi və.s işlərdən ibarətdir. Cəlb edilən təcrübəçi bütün istiqamətlər üzrə fəaliyyətlərə cəlb ediləcəklər və şöbənin fəaliyyət istiqamətləri üzrə bilik və bacarıqlara yiyələnəcəkdir.
- Maliyyə bazarlarının hüquqi təminatı departamenti
Departamentin fəaliyyətinin əsas məqsədi ölkədə maliyyə bazarlarının tənzimlənməsi və nəzarəti sahəsində Mərkəzi Bankın qanunla müəyyən edilmiş funksiya və səlahiyyətlərinin qanunvericiliyə uyğun həyata keçirilməsinə hərtərəfli hüquqi yardımın göstərilməsi, habelə müvafiq sahələrdə Mərkəzi Bankın normayaratma fəaliyyətinin qanunvericilik prinsiplərinə uyğunluğunun təmin olunması üçün effektiv koordinasiyasıdır. Maliyyə bazarlarının hüquqi təminatı departamentində 4 şöbə mövcuddur: Bank sektorunun hüquqi təminatı şöbəsi, Sığorta bazarının hüquqi təminatı şöbəsi, Kapital bazarlarının hüquqi təminatı şöbəsi, Ödəniş sektoru və maliyyə texnologiyalarının hüquqi təminatı şöbəsi.
Bank sektorunun hüquqi təminatı şöbəsi
2026-cı ildə Maliyyə bazarlarının hüquqi təminatı departamentinin Bank sektorunun hüquqi təminatı şöbəsi təcrübəçi qəbul edəcək. Bank sektorunun hüquqi təminatı şöbəsi banklar, bank olmayan kredit təşkilatları, kredit ittifaqları, poçt rabitəsinin milli operatoru, kredit büroları və valyuta mübadilə məntəqələrinin fəaliyyəti, valyuta tənzimi, habelə əmanətlərin sığortalanması sistemi üzrə Mərkəzi Bankın normayaratma fəaliyyətində iştirak edir, bu sahələrdə hüquqi bazanın formalaşdırılması və təkmilləşdirilməsini həyata keçirir, hüquqi aktların ekspertizasını aparır, eləcə də daxil olan sorğuların araşdırılmasını və cavablandırılmasını, qarşıya çıxan hüquqi məsələlələrin həllini təmin edir. Cəlb ediləcək təcrübəçi təcrübəçi təcrübə müddəti ərzində Mərkəzi Bankın fəaliyyəti ilə bağlı müxtəlif tapşırıqların icrasına cəlb edilməklə hüquqi biliklərini təkmilləşdirəcək, Mərkəzi Bankın normayaratma fəaliyyətində yaxından iştirak edəcək və hüquqi sənədlərin hazırlanması, habelə ekspertizası üzrə təcrübə qazanacaqdır.
Kapital bazarlarının hüquqi təminatı şöbəsi
2026-cı ildə Maliyyə bazarlarının hüquqi təminatı departamentinin Kapital bazarlarının hüquqi təminatı şöbəsi təcrübəçi qəbul edəcək. Kapital bazarlarının hüquqi təminatı şöbəsi investisiya şirkətləri, fond birjası, klirinq təşkilatı və investisiya fondunun depozitarı, investisiya xidmətlərinin göstərilməsi üçün lisenziya almış banklar, investisiya fondları, investisiya fondunun idarəçiləri və Milli Depozit Mərkəzinin fəaliyyəti, qiymətli kağızların emissiyası, investorların hüquqlarının qorunması, habelə emitentlərinin fəaliyyətinin tənzimlənməsi üzrə Mərkəzi Bankın normayaratma fəaliyyətində iştirak edir, bu sahələrdə hüquqi bazanın formalaşdırılması və təkmilləşdirilməsini həyata keçirir, hüquqi aktların ekspertizasını aparır, eləcə də daxil olan sorğuların araşdırılmasını və cavablandırılmasını, qarşıya çıxan hüquqi məsələlələrin həllini təmin edir. Cəlb ediləcək təcrübəçi təcrübəçi təcrübə müddəti ərzində Mərkəzi Bankın fəaliyyəti ilə bağlı müxtəlif tapşırıqların icrasına cəlb edilməklə hüquqi biliklərini təkmilləşdirəcək, Mərkəzi Bankın normayaratma fəaliyyətində yaxından iştirak edəcək və hüquqi sənədlərin hazırlanması, habelə ekspertizası və hüquqi rəylərin verilməsi üzrə təcrübə qazanacaqdır.
Ödəniş sektoru və maliyyə texnologiyalarının hüquqi təminatı şöbəsi
2026-cı ildə Ödəniş sektoru və maliyyə texnologiyalarının hüquqi təminatı şöbəsi təcrübəçi qəbul edəcək. Sözügedən şöbə banklar və xarici bankların yerli filialları, poçt rabitəsinin milli operatoru, ödəniş təşkilatları, elektron pul təşkilatları və ödəniş sistemi operatorlarının ödəniş xidmətləri və ödəniş sistemləri ilə əlaqədar fəaliyyəti üzrə Mərkəzi Bankın normayaratma fəaliyyətində iştirak edir, bu sahələrdə hüquqi bazanın formalaşdırılması və təkmilləşdirilməsini həyata keçirir, hüquqi aktların ekspertizasını aparır, daxil olan sorğuların araşdırılmasını və cavablandırılmasını, qarşıya çıxan hüquqi məsələlələrin həllini təmin edir, həmçinin maliyyə bazarlarında xüsusi tənzimləmə rejimi çərçivəsində təqdim edilən məhsulların hüquqi ekspertizasını həyata keçirir. Cəlb ediləcək təcrübəçi təcrübə müddəti ərzində Mərkəzi Bankın fəaliyyəti ilə bağlı müxtəlif tapşırıqların icrasına cəlb edilməklə hüquqi biliklərini təkmilləşdirəcək, Mərkəzi Bankın normayaratma fəaliyyətində yaxından iştirak edəcək və hüquqi sənədlərin hazırlanması, habelə ekspertizası üzrə təcrübə qazanacaqdır.
Sığorta bazarlarının hüquqi təminatı şöbəsi
2026-cı ildə Maliyyə bazarlarının hüquqi təminatı departamentinin Sığorta bazarlarının hüquqi təminatı şöbəsi təcrübəçi qəbul edəcək. Şöbə sığorta bazarının peşəkar iştirakçılarının, o cümlədən sığortaçıların, təkrarsığortaçıların, sığorta vasitəçilərinin fəaliyyəti üzrə, habelə aqrar sığorta sistemi üzrə Mərkəzi Bankın normayaratma fəaliyyətində iştirak edir, bu sahələrdə hüquqi bazanın formalaşdırılması və təkmilləşdirilməsini həyata keçirir, hüquqi aktların ekspertizasını aparır, eləcə də daxil olan sorğuların araşdırılmasını və cavablandırılmasını, qarşıya çıxan hüquqi məsələlələrin həllini təmin edir. Cəlb ediləcək təcrübəçi təcrübə müddəti ərzində Mərkəzi Bankın fəaliyyəti ilə bağlı müxtəlif tapşırıqların icrasına cəlb edilməklə hüquqi biliklərini təkmilləşdirəcək, Mərkəzi Bankın normayaratma fəaliyyətində yaxından iştirak edəcək və hüquqi sənədlərin hazırlanması, habelə ekspertizası üzrə təcrübə qazanacaqdır.
- Maliyyə sabitliyi departamenti
Departamentin fəaliyyətinin əsas məqsədi ölkədə maliyyə sektorunun sabitliyini və dayanıqlığını müəyyən edən amilləri qiymətləndirmək, sistem risklərini identifikasiya etmək, onların maliyyə sabitliyinə təsirini ölçmək məqsədilə müxtəlif model və alətlər formalaşdırmaq, o cümlədən stress-testlər keçirmək, risklərin neytrallaşdırılması üzrə siyasət alətlərinin formalaşdırılmasında iştirak etmək və maliyyə sabitliyinin təhlili üzrə analitik diaqnostika çərçivəsini inkişaf etdirməkdir. Maliyyə sabitliyi departamentində 2 şöbə mövcuddur: Makro-maliyyə risklərinin modelləşdirilməsi şöbəsi və Maliyyə sabitliyinin təhlili şöbəsi.
Maliyyə sabitliyinin təhlili şöbəsi
2026-cı ildə Maliyyə sabitliyi departamentinin Maliyyə sabitliyinin təhlili şöbəsi təcrübəçi qəbul edəcək. Qeyd edilən şöbə, maliyyə bazarlarının sabitliyinə və maliyyə institutlarının dayanıqlığına təsir edə biləcək riskləri, kövrəklik zonalarını müəyyən edir, qiymətləndirir, monitorinqini həyata keçirir. Maliyyə bazarları üzrə şəbəkə əlaqələri, konsentrasiyaları, müştərək və yoluxma risklərini identifikasiya və təhlil edir. Cəlb ediləcək təcrübəçi, maliyyə və risk təhlilləri üzrə nəzəri və praktiki biliklər əldə edəcək və maliyyə sabitliyinin qorunması istiqamətində təhlil və müzakirələrə cəlb ediləcəkdir.
Makro-maliyyə risklərinin modelləşdirilməsi şöbəsi
2026-cı ildə Maliyyə sabitliyi departamentinin Makro-maliyyə risklərinin modelləşdirilməsi şöbəsi təcrübəçi qəbul edəcək. Makro-maliyyə risklərinin modelləşdirilməsi şöbəsi sistemik risklərin qiymətləndirilməsi üzrə təhlillər aparır və alətlər formalaşdırır, eləcə də bank sisteminin stress-testləşdirilməsini həyata keçirir. Şöbə müxtəlif modellər vasitəsilə makro-maliyyə göstəricilərinin proqnozlarını və təhlillərini yerinə yetirir, maliyyə sistemi üzrə siyasət addımları üzrə ekonometrik araşdırmalar aparır və təhlillər təqdim edir. Cəlb edilən təcrübəçi bütün istiqamətlər üzrə fəaliyyətlərə cəlb ediləcəklər və şöbənin fəaliyyət istiqamətləri üzrə bilik və bacarıqlara yiyələnəcədir.
- Maliyyə sektorunun dayanıqlı inkişafı departamenti
Departamentin fəaliyyətinin əsas məqsədi maliyyə sektorunun dayanıqlı inkişafı üzrə siyasət və strategiyaların formalaşdırılması və icrasının təmin edilməsindən ibarətdir. Eyni zamanda maliyyə vasitəçiliyinin genişləndirilməsi, maliyyə sektorunun rəqəmsallaşması və innovativ maliyyə xidmətlərinin tətbiqi istiqamətində zəruri mühitin yaradılması, sektorun inkişaf tendensiyalarının təhlili və inkişafı ləngidən amillərin aradan qaldırılması üzrə təkliflərin hazırlanmasını əhatə edir. Bundan əlavə, maliyyə sektorunun yaşıl və dayanıqlı maliyyəyə transformasiyası və maliyyə institutlarının iqlim və ekoloji risklərə qarşı dayanıqlığının artırılması ilə bağlı siyasətin formalaşdırılması üçün təkliflər hazırlanır. Bu departamentdə 2 şöbə: Maliyyə sektorunun inkişafı şöbəsi, Dayanıqlı maliyyə şöbəsi və 1 bölmə: Maliyyə inklüzivliyi bölməsi mövcuddur.
Maliyyə sektorunun inkişafı şöbəsi
2026-cı ildə Maliyyə sektorunun dayanıqlı inkişafı departamentinin Maliyyə sektorunun inkişafı şöbəsi təcrübəçi qəbul edəcək. Maliyyə sektorunun inkişafı şöbəsinin fəaliyyəti maliyyə sektorunun müxtəlif seqmentləri üzrə mövcud vəziyyətin və inkişaf tendensiyalarının təhlil edilməsini əhatə edir. Şöbə həmçinin alternativ maliyyələşdirmə mexanizmlərinin, o cümlədən aktiv əsaslı və islam maliyyələşməsi alətlərinin tətbiqi, mikromaliyyə sektorunun inkişafı, kredit reytinqi agentliklərinin fəaliyyət mexanizmlərinin formalaşdırılması və maliyyə infrastrukturunun təkmilləşdirilməsi üzrə təkliflər və siyasət təşəbbüsləri hazırlayır.Cəlb edilən təcrübəçi şöbənin bütün istiqamətlərinə cəlb ediləcək və şöbənin gündəlik fəaliyyətində iştirak edərək müxtəlif layihələrdə təcrübə qazanacaq.
Maliyyə inklüzivliyi bölməsi
2026-cı ildə departamentin maliyyə inklüzivliyi bölməsi təcrübəçi qəbul edəcək. Maliyyə inklüzivliyi bölməsinin funksiyası müvafiq inzibati struktur vahidləri və digər qurumlarla koordinasiyalı şəkildə maliyyə xidmətlərinin əlçatan olmasını təmin edən hüquqi-normativ aktların hazırlanması, bu əlçatanlığın vəziyyətini, eləcə də boşluqların təyin edilməsi məqsədi ilə diaqnostik işlərin aparılması, həmçinin beynəlxalq təcrübə öyrənilərək bu əlçatanlığın daha da inkişaf etdirilməsinə yönəldilmiş təklif və təşəbbüslərin irəli sürülməsidir. Cəlb edilən təcrübəçi bölmənin bütün istiqamətlərinə cəlb ediləcək və bölmənin gündəlik fəaliyyətində iştirak edərək müxtəlif layihələrdə təcrübə qazanacaq. O, həmçinin komandalararası əməkdaşlıq proseslərini izləyəcək, fərqli iş funksiyalarını öyrənəcək və praktiki bacarıqlarını inkişaf etdirəcək. Bu təcrübə onun peşəkar bacarıqlarının formalaşmasına və gələcək karyerasına hazırlıq baxımından geniş imkanlar yaradacaq.
Dayanıqlı maliyyə şöbəsi
2026-cı ildə departamentin Maliyyə sektorunun dayanıqlı inkişafı departamentinin Dayanıqlı maliyyə şöbəsi təcrübəçi qəbul edəcək. Dayanıqlı maliyyə şöbəsi maliyyə sektorunda dayanıqlı maliyyələşməyə keçidin dəstəklənməsi məqsədilə siyasət və tənzimləyici təkliflər hazırlayır, həmçinin maliyyə institutlarında ESİ prinsiplərinin inteqrasiyasını təşviq edir. Eyni zamanda iqlim və ESİ risklərinin maliyyə sabitliyinə təsiri qiymətləndirilir və fəaliyyətlər Mərkəzi Bankın 2023–2026-cı illər üzrə Dayanıqlı maliyyə Yol Xəritəsi çərçivəsində həyata keçirilir. Cəlb edilən təcrübəçi şöbənin bütün istiqamətlərinə cəlb ediləcək və şöbənin gündəlik fəaliyyətində iştirak edərək müxtəlif layihələrdə təcrübə qazanacaq.
- Maliyyə texnologiyaları və innovasiyalar departamenti
Departamentin fəaliyyətinin əsas məqsədi ölkədə maliyyə texnologiyaları və innovativ maliyyə xidmətlərinin inkişafını təşviq etmək, rəqəmsal maliyyə həllərinin tətbiqini dəstəkləmək və bu sahədə tənzimləyici çərçivənin formalaşdırılmasına töhfə verməkdir. Departament həmçinin maliyyə bazarında innovativ məhsulların və texnoloji həllərin tətbiqini təşviq edir, beynəlxalq təcrübəni araşdırır və maliyyə inklüzivliyinin genişlənməsinə dəstək verir. Departamentdə 3 şöbə fəaliyyət göstərir: Maliyyə texnologiyalarının təhlili və inkişafı şöbəsi, Maliyyə bazarlarında tərəfdaşlığın inkişafı və təşviqi şöbəsi və Xüsusi tənzimləmə rejiminin təşkili şöbəsi.
Maliyyə texnologiyalarının təhlili və inkişafı şöbəsi
2026-ci ildə Maliyyə Texnologiyaları və İnnovasiyalar departamentinin Maliyyə texnologiyalarının təhlili və inkişafı şöbəsi təcrübəçi qəbul edəcək. Sözügedən şöbə maliyyə texnologiyaları sahəsində baş verən yenilikləri araşdırır, innovativ rəqəmsal həllərin tətbiqi imkanlarını təhlil edir və bu istiqamətdə inkişaf təklifləri hazırlayır. Şöbə həmçinin maliyyə bazarında texnologiyaların tətbiqi ilə bağlı beynəlxalq təcrübəni öyrənir və tənzimləyici və nəzarət proseslərinin daha effektiv həyata keçirilməsi üçün texnoloji həlləri araşdırır. Cəlb edilən təcrübəçi maliyyə texnologiyaları sahəsində aparılan araşdırmalarda iştirak edəcək, beynəlxalq təcrübənin öyrənilməsi və analitik materialların hazırlanması prosesinə dəstək göstərəcəkdir.
Xüsusi tənzimləmə rejiminin təşkili şöbəsi
2026-ci ildə Maliyyə Texnologiyaları və İnnovasiyalar departamentinin Xüsusi Tənzimləmə Rejiminin Təşkili Şöbəsi təcrübəçi qəbul edəcək. Xüsusi Tənzimləmə Rejiminin Təşkili Şöbəsi bankçılıq, ödəniş sistemləri və digər maliyyə sahələrində innovativ həlləri test etməyə imkan yaradır. Burada yeni maliyyə məhsulları və xidmətləri real bazar şəraitində, lakin müəyyən nəzarət və qaydalar çərçivəsində yoxlanılır. Şöbənin əsas məqsədi innovativ həllərin təhlükəsiz və nəzarətli şəkildə sınaqdan keçirilməsinə imkan yaratmaq, eyni zamanda maliyyə sektorunda yeni texnologiyaların tətbiqini dəstəkləməkdir. Cəlb edilən təcrübəçi maliyyə texnologiyaları və innovasiyalar sahəsi ilə yaxından tanış olur, yeni məhsulların və xidmətlərin necə qiymətləndirildiyini öyrənir, startaplar və maliyyə şirkətləri ilə aparılan layihələrdə iştirak etmək imkanı qazanırlar.
- Nağd pul və hesablaşmalar departamenti
Departamentin fəaliyyətinin əsas məqsədi ölkə ərazisində nağd pul dövriyyəsinin effektiv təşkili və iqtisadiyyatın nağd pula olan tələbatının vaxtında, müvafiq həcmdə və nominal strukturda ödənilməsi, banklararası hesablaşmaların təşkili, Mərkəzi Bankın pul siyasətinin həyata keçirilməsi və valyuta ehtiyatlarının idarə edilməsi məqsədilə xarici və daxili maliyyə bazarlarında apardığı əməliyyatlar üzrə hesablaşmaların təşkil edilməsidir. Nağd pul və hesablaşmalar departamentində 5 şöbə mövcuddur: Nağd pulun idarəedilməsi şöbəsi, Pul nişanlarının ekspertizası və saxtalaşdırılmasına qarşı mübarizə şöbəsi, Pul nişanlarının inkişafı şöbəsi, Maliyyə bazarlarında hesablaşmalar şöbəsi və Banklararası hesablaşmalar şöbəsi.
Maliyyə bazarlarında hesablaşmalar şöbəsi
2026-ci ildə Nağd pul və hesablaşmalar departamentin Maliyyə bazarlarında hesablaşmalar şöbəsi təcrübəçi qəbul edəcək. Sözügedən şöbə Mərkəzi Bankın ölkədaxili və xarici maliyyə bazarlarında bağladığı əqdlər üzrə hesablaşmaların aparılmasına, beynəlxalq maliyyə təşkilarları ilə ödənişlərin icrasına, o cümlədən, nostro müxbir və kastodian hesablar üzrə gündəlik nəzarətin həyata keçirilməsinə cavabdehdir. Cəlb edilən təcrübəçi şöbənin bütün fəaliyyət istiqamətləri ilə tanış olacaq, maliyyə bazarlarında əməliyyatıarın icra mexanizmini praktiki şəkildə öyrənəcək və beynəlxalq hesablaşmaların daxili proseslərini anlamaq imkanı əldə edəcək.
- Pul siyasəti departamenti
Departamentin fəaliyyətinin əsas məqsədi pul siyasətinin optimal çərçivəsini formalaşdırmaq və onun realizasiyasının monitorinqini aparmaqdan ibarətdir. Departament 3 şöbədən ibarətdir: Pul və məzənnə siyasəti şöbəsi, İqtisadi siyasətin təhlili şöbəsi, Pul siyasətinin hesabatlılığı şöbəsi.
Pul və məzənnə siyasəti şöbəsi
2026-cı ildə Pul siyasəti departamentinin Pul və məzənnə siyasəti şöbəsi təcrübəçi qəbul edəcək. Sözügedən şöbədə pul siyasəti hədəflərinin monitorinqi, əsas monetar göstəricilərin təhlili və siyasətin makroiqtisadi səmərəliliyinin artırılması üçün təkliflərin hazırlanması, eyni zamanda məzənnə siyasəti, faiz dəhlizi parametrləri, məcburi ehtiyat normaları və pul siyasəti alətlərinin təkmilləşdirilməsi üzrə analitik işlər aparılır. Beynəlxalq maliyyə institutları və mərkəzi banklarla əməkdaşlıq çərçivəsində hesabatlar hazırlanır və təcrübə mübadiləsi həyata keçirilir. Cəlb edilən təcrübəçi müxtəlif dövlət proqramları və dövlət əhəmiyyətli strateji sənədlərdə pul siyasətinin yerinə yetirilməsi ilə bağlı hesabatlar hazırlanması, pul siyasəti icmalının hazırlanması, ümumiləşdirilməsi və redaktəsinin həyata keçirilməsi, tərcümə edilməsi və rəsmi internet səhifəsində yerləşdirilməsi kimi işlərlə tanış olma imkanı qazanacaqdır.
- Rezolyusiya departamenti
Departamentin fəaliyyətinin əsas məqsədi ölkədə maliyyə sektorunun sabitliyinin dəstəklənməsi, qanunvericiliklə müəyyən olunmuş qaydada maliyyə bazarlarındakı problemli nəzarət subyektləri ilə bağlı rezolyusiya tədbirlərinin planlaşdırılması və təşkili, ləğv prosesində olan nəzarət subyektlərinin ləğvedicilərinin (ləğvetmə komissiyalarının, əmlak inzibatçılarının) fəaliyyətinə nəzarətin həyata keçirilməsi, rezolyusiya və ləğvetmə çərçivəsinin təkmilləşdirilməsi və bu çərçivədə kreditorların maraqlarının müdafiəsini təmin etməkdir. Rezolyusiya departamentində 2 şobə mövcuddur: Rezolyusiyanın planlaşdırılması və təşkili şöbəsi və Problemli maliyyə institutları ilə iş şöbəsi.
Problemli maliyyə institutları ilə iş şöbəsi
2026-cı ildə Rezolyusiya departamentinin Problemli maliyyə institutları ilə iş şöbəsi üzrə təcrübəçi qəbul edəcək. Problemli maliyyə institutları ilə iş şöbəsi isə ləğv prosesində olan nəzarət subyektlərinin ləğvedicilərinin, ləğvetmə komissiyalarının və əmlak inzibatçılarının fəaliyyətinə nəzarəti təşkil edir, qanunla müəyyən edilmiş qaydada zəruri sənədlər və məlumatlar alır, onların fəaliyyətini təhlil edir. Cəlb edilən təcrübəçi şöbələrin bütün fəaliyyət istiqamətlərinə cəlb ediləcək.
Rezolyusiyanın planlaşdırılması və təşkili şöbəsi
2026-cı ildə Rezolyusiya departamentinin Rezolyusiyanın planlaşdırılması və təşkili şöbəsi və Problemli maliyyə institutları ilə iş şöbəsi üzrə təcrübəçi qəbul edəcək. Rezolyusiyanın planlaşdırılması və təşkili şöbəsi nəzarət subyektləri tərəfindən təqdim edilən sağlamlaşdırma planlarını təhlil edərək rezolyusiya planlarını hazırlayır və tətbiq edir. Problemli maliyyə institutları ilə iş şöbəsi isə ləğv prosesində olan nəzarət subyektlərinin ləğvedicilərinin, ləğvetmə komissiyalarının və əmlak inzibatçılarının fəaliyyətinə nəzarəti təşkil edir, qanunla müəyyən edilmiş qaydada zəruri sənədlər və məlumatlar alır, onların fəaliyyətini təhlil edir. Cəlb edilən təcrübəçi şöbələrin bütün fəaliyyət istiqamətlərinə cəlb ediləcək.
- Satınalmalar departamenti
Departamentin fəaliyyətinin əsas məqsədi Mərkəzi Bank üzrə illik satınalma planını hazırlayaraq, illik satınalma strategiyasını müəyyənləşdirmək və bu plan əsasında il ərzində bütün növ satınalmaların müvafiq qaydada həyata keçirməkdir. Bu çərçivədə Bankın struktur bölmələrinin tələbləri təmin edilir. Satınalmalar departamentinin əsas məqsədi, dövlət büdcəsinin səmərəli istifadəsinin təmin edilməsi, bu zaman mövcud qanunvericiliyə - “Dövlət satınalmaları haqqında” AR Qanunu, “Mərkəzi Bank haqqında” AR Qanunu və digər normativ hüquqi aktların tələblərinə əməl edərək dövlət strategiyasının dəstəklənməsidir. Satınalmalar departamenti 2 şöbə və 1 bölmədən ibarətdir: 1. Müsabiqəli satınalmalar şöbəsi; 2. Müsabiqədənkənar satınalmalar və hesabatlılıq şöbəsi; 3. Anbar işinin təşkili bölməsi.
Müsabiqəli satınalmalar şöbəsi
2026-cı ildə Satınalmalar departamentinin müsabiqəli satınalmalar şöbəsi təcrübəçi qəbul edəcək. Sözügedən şöbə Mərkəzi bankın illik satınalmalarının planlaması və tenderlərin icrasına məsuliyyət daşıyır. Cəlb edilən təcrübəçi şöbənin bütün istiqamətlərinə cəlb ediləcək, əsas təcrübəsi dövlət satınalmalarının təşkili və təchizat zəncirinin idarə edilməsi üzrə olacaq.
- Tədqiqatlar departamenti
Departamentinin əsas məqsədi iqtisadi göstəricilərin proqnozlarının hazırlanması və Mərkəzi Bankda siyasət qərarlarının qəbuluna dəstək məqsədilə tədqiqat işlərinin həyata keçirilməsidir. Proqnozların keyfiyyətinin yaxşılaşdırılmasına xidmət edən yeni modellərin qurulması, onların mütəmadi təkmilləşdirilməsi departamentin əsas məqsədidir. Tədqiqatlar departamentində 4 şöbə mövcuddur: makroiqtisadi tədqiqatlar şöbəsi, mikroiqtisadi tədqiqatlar şöbəsi, modelləşdirmə və proqnozlaşdırma şöbəsi, beynəlxalq iqtisadiyyat şöbəsi.
Mikroiqtisadi tədqiqatlar şöbəsi
2026-ci ildə Tədqiqatlar departamentinin Mikroiqtisadi tədqiqatlar şöbəsi təcrübəçi qəbul edəcək. Bu şöbədə təcrübəçi olmaq sizə nə qazandıracaq: AZİPS və XÖHKS ödəniş məlumatları ilə tanışlıq və ödəniş məlumtalarının təhlili üzrə bacarıqlar. Gəlirlilik əyrisinin qurulması (Nelson-Siegel modeli), formalaşma mexanizmi və proqnozlaşdırılması üzrə bilik və bacarıqlar. Bundan əlavə təcrübəçi likvidlik proqnozlaşdırılmasında istifadə olunan analitik və ekonometrik modellər ilə tanış olacaq, və likvidliyin idarə olunması mexanizmləri üzrə bilik və bacarıqlara yiyələnəcəkdir. Cəlb edilən təcrübəçi təcrübə müddətində iştirakçı, həmçinin, proqramlaşdırma və statistik/ekonometrik biliklərini təkminləşdirəcəkdir.
Makroiqtisadi tədqiqatlar şöbəsi
2026-ci ildə Tədqiqatlar departamentinin Makroiqtisadi tədqiqatlar şöbəsi təcrübəçi qəbul edəcək. Sözügedən şöbə makroiqtisadi sabitlik və dayanıqlılıq istiqamətlərində araşdırmalar aparır və qiymətləndirmələr edir, başlıca makroiqtisadi prosesləri, o cümlədən iqtisadi artım, inflyasiyanı mütəmadi təhlil edir və bu istiqamətdə tədqiqatlar həyata keçirir, pul və məzənnə siyasəti rejimlərini, həmçinin pul siyasətinin transmissiya mexanizmini araşdırır. Cəlb edilən təcrübəçi makroiqtisadi prosesləri yaxşı anlamaq, məlumatları statistik təhlil etmək, ekonometrik modellərin qiymətləndirilməsi prosesində iştirak etmək, Mərkəzi Bankın faiz siyasəti qərarlarının qəbulu üçün hazırlanan materiallarla tanış olmaq və hazırlıq prosesində iştirak etmək kimi imkanlara yiyələnəcəkdir.
- Valyuta ehtiyatlarının idarə edilməsi departamenti
Departamentin fəaliyyətinin əsas məqsədi Mərkəzi Bankın valyuta ehtiyatlarının təhlükəsiz və likvid saxlanılması vasitəsilə dövlətin pul siyasətinin həyata keçirilməsinə dəstək göstərmək, eləcə də valyuta aktivlərinin xarici maliyyə bazarlarında investisiyasını həyata keçirməklə investisiya gəliri əldə etməkdir. Valyuta ehtiyatlarının idarə edilməsi departamentində 2 şöbə və 1 bölmə mövcuddur: Valyuta ehtiyatlarının investisiyası şöbəsi, İnvestisiyaların təhlili və xarici menecerlərlə iş şöbəsi və İnvestisiyaların təhlili və xarici menecerlərlə iş şöbəsinin nəzdində İnvestisiya uçotu və hesabatlılıq bölməsi.
İnvestisiyaların təhlili və xarici menecerlərlə iş şöbəsi
2026-cı ildə Valyuta ehtiyatlarının idarə edilməsi departamentinin İnvestisiyaların təhlili və xarici menecerlərlə iş şöbəsi təcrübəçi qəbul edəcək. Sözügedən şöbənin əsas fəaliyyət istiqamətlərinə Mərkəzi Bankın valyuta ehtiyatlarının idarə edilməsi və investisiyası üzrə investisiya qaydaları və digər çərçivə sənədlərinin hazırlanması, valyuta aktivlərinin strateji bölgüsünə dair təkliflərin hazırlanması, investisiya portfelləri üzrə mütləq və nisbi gəlirliliyinin (performans) hesablanması, şöbəyə daxil olan komplayens sorğularının cavablandırılması, xarici portfel menecerlərinin fəaliyyətinə nəzarət edilməsi, habelə Mərkəzi Bankın kontragentləri olan kastodian və müxbir banklar, xarici portfel menecerləri və digər beynəlxalq maliyyə təşkilatları ilə əməkdaşlığın həyata keçirilməsi sahələri daxildir. Cəlb edilən təcrübəçi şöbənin bütün istiqamətlərinə cəlb ediləcəkdir. Onun əsas təcrübə istiqaməti xarici menecer və kastodian bankdan xarici idarəetmə çərçivəsində əldə edilən hesabatların təhlil edilməsi və onların arxivləşdirilməsində, çirkli pulların yuyulması və müştərinin tanınması kimi komplayens sorğularının əlaqədar departamentlərlə birgə cavablandırılmasında, valyuta ehtiyatlarının idarə edilməsi sahəsində yeni maliyyə alətlərinin tətbiqi üzrə müqavilələrin nəzərdən keçirilməsində, kapital bazarı üzrə analitik təhlillərin hazırlanmasında iştirak etmək olacaq.
İnvestisiya uçotu və hesabatlılıq bölməsi
2026-cı ildə Valyuta ehtiyatlarının idarə edilməsi departamentinin İnvestisiya uçotu və hesabatlılıq bölməsi təcrübəçi qəbul edəcək. İnvestisiya uçotu və hesabatlıq bölməsi valyuta aktivlərinin dəyişmə mənbələri, həcm və strukturuna dair gündəlik hesabatlar hazırlayır. Eyni zamanda xarici maliyyə bazarlarında bağlanılmış əqdlər üzrə müxabirləşmələrin Mərkəzi Bankın portfel idarəetmə sistemində düzgün formalaşmasını, həmin məlumatların Mərkəzi Bankın balans hesabatına ötürülməsini həyata keçirir. Cəlb edilən təcrübəçi təcrübəçi bölmənin bütün fəaliyyət istiqamətlərinə cəlb ediləcəkdir. Təcrübəçinin əsas təcrübə istiqaməti isə investisiya fəaliyyəti çərçivəsində uçotun təşkili və hesabatların hazırlanması üzrə müvafiq prosedurlarda iştirak olacaqdır.
- Proqrama müraciət ilə bağlı məlumat
2026-cı il üzrə təcrübə proqramına müraciətlərin qəbulu artıq başa çatmışdır.
Əlavə suallarınız yaranarsa maliyyecisen@cbar.az ünvanına müraciət edə bilərsiniz.
- 2026-cı ilin "Maliyyəçisən" təcrübəçilərinin hekayələri
- Asiman İsazadə
Mən, Asiman İsazadə, Azərbaycan Dövlət İqtisad Universitetinin Maliyyə ixtisası üzrə məzunuyam. Mərkəzi Bankda təcrübə keçməkdə əsas məqsədim mərkəzi bankçılıq fəaliyyətini daha yaxından öyrənmək, tənzimləyici qurumun iş prinsiplərini daha dərindən anlamaq və burada təqdim olunan inkişaf imkanlarından faydalanmaq idi.
Təcrübə proqramına başlamazdan əvvəl gözləntilərim kifayət qədər yüksək idi. Əvvəlki illərdə proqramda iştirak etmiş tanışlarımın müsbət təəssüratları bu marağımı daha da artırmışdı. Peşəkar komanda ilə işləmək, təcrübəli rəhbərlərin tövsiyələrindən yararlanmaq və müxtəlif təlimlərdə iştirak etməklə bilik və bacarıqlarımı inkişaf etdirmək istəyirdim. İlk günlərdən etibarən ən çox diqqətimi çəkən məqamlardan biri əməkdaşlar arasında formalaşmış səmimi münasibətlər və açıq kommunikasiya mühiti oldu.
Təcrübə müddətində Maliyyə sabitliyi departamentinin Maliyyə sabitliyinin təhlili şöbəsində fəaliyyət göstərərək Maliyyə sabitliyi hesabatının hazırlanması prosesində iştirak etdim. Eyni zamanda, maliyyə institutlarının fəaliyyətində baş verən dəyişikliklərin təhlili, eləcə də müxtəlif təqdimat materiallarının hazırlanması və yenilənməsi istiqamətində töhfə verdim. Bu təcrübə mənə ölkənin maliyyə sistemini daha yaxından öyrənmək, potensial riskləri qiymətləndirmək və analitik düşüncə bacarıqlarımı inkişaf etdirmək imkanı yaratdı. Proqram çərçivəsində təşkil olunan təlimlərdə aktiv iştirak etməyim, Mərkəzi Bankın sədr müavinləri və baş direktorları ilə keçirilən görüşlərdə onların təcrübə və tövsiyələrini dinləməyim inkişaf yoluma əlavə dəyər qatdı.
İş yoldaşlarım və mentorla əməkdaşlığım boyunca hər zaman dəstək hiss etdim. Suallarımı ətraflı cavablandırmaları, istiqamətləndirmələri və biliklərini bölüşmələri öyrənmə prosesini mənim üçün daha səmərəli etdi. Məhz bu peşəkar və eyni zamanda səmimi iş mühiti Mərkəzi Bankdakı təcrübəmi xüsusi və yaddaqalan edən əsas amillərdən biri oldu.
Təcrübə proqramı ərzində mənim üçün ən yaddaqalan məqamlardan biri yarımillik Maliyyə Sabitliyi Hesabatının hazırlanması prosesində iştirak etmək idi. Nəticədə ərsəyə gələn işdə öz töhfəmi görmək həm motivasiyaedici, həm də qürurverici hisslər yaşatdı.
Bu təcrübə gələcək karyera yolum üçün möhkəm təməl yaratdı və maliyyə sahəsinə olan marağımı daha da gücləndirdi. Gələcək təcrübəçilərə tövsiyəm ondan ibarətdir ki, qarşılarına çıxan hər bir öyrənmə imkanından maksimum yararlansın, təşəbbüskar olsunlar və sual verməkdən çəkinməsinlər. Mənə bu dəyərli təcrübəni qazandırdığına görə Mərkəzi Banka, eləcə də proqram müddətində dəstəyini əsirgəməyən bütün əməkdaşlara təşəkkür edirəm.
- Aysu Qarayeva
Mən, Aysu Qarayeva, Bakı Dövlət Universitetinin Hüquq fakültəsinin Hüquqşünaslıq ixtisası üzrə 4-cü kursda, ingilis dilində təhsil alıram. Maliyyə bazarlarının hüquqi tənzimlənməsi sahəsinə olan marağım və Mərkəzi Bankın bu istiqamətdəki fəaliyyətinin peşəkar inkişafım üçün böyük əhəmiyyət daşıması məni “Maliyyəçisən” təcrübə proqramına müraciət etməyə sövq etdi.
Korporativ iş mühiti ilə ilk tanışlığım olan bu təcrübə proqramından əsas gözləntilərimdən biri yeni bilik və təcrübə qazanmaqla yanaşı gələcək karyera hədəflərimi daha aydın müəyyənləşdirmək idi. İlk günlərdən etibarən kollektivin səmimiyyəti və bizə göstərilən diqqət məndə çox müsbət təəssürat yaratdı. Əməkdaşlar adaptasiya prosesimizin rahat keçməsi və proqramdan maksimum fayda əldə etməyimiz üçün hər zaman dəstək göstərir, fəaliyyət istiqamətlərini və iş proseslərini ətraflı şəkildə izah edirdilər.
Təcrübə proqramını mənim üçün tamamilə yeni bir istiqamət olan Kapital bazarlarının hüquqi təminatı şöbəsində keçdim. Bu müddət ərzində əsas fəaliyyətim kapital bazarlarının hüquqi tənzimlənməsi ilə bağlı bazar iştirakçılarından daxil olan sorğuların cavablandırılması, hüquqi araşdırmaların aparılması və müxtəlif qanunvericilik layihələrinin hazırlanması prosesində iştirak etməkdən ibarət idi. Eyni zamanda, bu təcrübə mənə sahəni daha dərindən öyrənmək, maliyyə bazarlarındakı yeni tendensiyaları və onların hüquqi tənzimlənməsi mexanizmlərini yaxından izləmək imkanı yaratdı.
İş yoldaşlarımın dəstəyi sayəsində yalnız kapital bazarları ilə bağlı deyil, maliyyə bazarlarının digər istiqamətləri üzrə də dəyərli biliklər əldə etdim. Mərkəzi Bankın iş mühitində məni ən çox cəlb edən məqamlardan biri hər gün yeni hüquqi məsələlərlə qarşılaşmaq, onları araşdırmaq və bu proses vasitəsilə davamlı öyrənmək imkanı idi. Təcrübə proqramının yaddaqalan anlarından biri isə “Maliyyəçisən | Liderlə Qəhvə” layihəsi çərçivəsində Mərkəzi Bankın sədr müavini Gülər xanımla keçirilən görüş oldu. Bu görüş mənə rəhbərlik təcrübəsi və peşəkar inkişafla bağlı dəyərli fikirlər qazanmağa imkan verdi.
Bu təcrübə proqramı peşəkar fəaliyyətimi maliyyə bazarlarının hüquqi tənzimlənməsi və inkişafı istiqamətində qurmaq istəyimi daha da möhkəmləndirdi. Gələcək təcrübəçilərə tövsiyəm odur ki, sual verməkdən, təşəbbüs göstərməkdən və yeni tapşırıqları qəbul etməkdən çəkinməsinlər. Hər bir tapşırığı öyrənmək və inkişaf etmək üçün fürsət kimi dəyərləndirmək vacibdir. Mərkəzi Bankın peşəkar kollektivi karyerasının ilk mərhələsində olan gənclərə bu yolda hər zaman dəstək göstərməyə hazırdır.
Sonda təcrübə müddətində mənə dəstək göstərən mentorum Səba xanıma və Maliyyə bazarlarının hüquqi təminatı departamentinin əməkdaşlarına dərin təşəkkürümü bildirirəm.
- Emil Bağırov
Mən, Emil Bağırov, Azərbaycan Dövlət İqtisad Universitetinin maliyyə ixtisası üzrə 2026-cı il məzunuyam. Maliyyə üzrə təhsil alan biri kimi ölkənin maliyyə sistemində ən önəmli rol oynayan Mərkəzi Bankda praktiki təcrübə qazanmaq ən böyük məqsədlərimdən biri idi. Bu səbəbdən Mərkəzi Bankın “Maliyyəçisən” təcrübə proqramına müraciət etdim.
Təcrübəyə başlamazdan əvvəl Mərkəzi Bankın daha ciddi və sərt iş mühitinə sahib olduğunu düşünürdüm. Lakin ilk gündən qarşılaşdığım səmimiyyət və hər kəsin kömək etməyə hazır olması məndə çox müsbət təəssurat yaratdı. Gözləntilərimdən fərqli olaraq, burada özümü rahat hiss etdiyim və öyrənməyə həvəsləndirildiyim bir mühitlə qarşılaşdım.
Təcrübə müddətim Kapital bazarı fəaliyyətinə nəzarət departamentinin Lisenziyalaşdırma və qeydiyyat şöbəsində keçdi. Burada investisiya şirkətlərinin, fondların və digər bazar iştirakçılarının lisenziyalaşdırılması, eləcə də qiymətli kağızların buraxılışı və qeydiyyatı prosesləri ilə yaxından tanış oldum. Bu müddət ərzində müxtəlif sənədlərin və hesabatların araşdırılması, onların müəyyən edilmiş tələblərə uyğunluğunun yoxlanılması və uyğunsuzluqların aşkar edilməsi ilə bağlı praktiki təcrübə qazandım. Eyni zamanda, kapital bazarlarının fəaliyyətini və bu sahədə nəzarətin necə həyata keçirildiyini daha yaxından öyrəndim.
Mentorum və iş yoldaşlarım hər addımda mənə istiqamət verir, suallarımı səbirlə cavablandırır və öyrənməyim üçün hər zaman dəstək olurdular. Mərkəzi Bankdakı səmimi və həvəsləndirici iş mühiti mənə özümü komandanın bir üzvü kimi hiss etdirdi.
Bu təcrübə kapital bazarlarını necə işlədiyini daha dərindən anlamağa və gələcək karyera istiqamətimə daha aydın baxmağa kömək etdi. Gələcək təcrübəçilərə tövsiyəm odur ki,hər fürsətdən maksimum yararlansınlar və sual verməkdən heç vaxt çəkinməsinlər.
Mənə bu dəyərli təcrübəni qazandıran Mərkəzi Bank komandasına, mentoruma və bütün həmkarlarıma dərin təşəkkürümü bildirirəm. “Maliyyəçisən” proqramının bir hissəsi olmaq mənim üçün həm peşəkar, həm də şəxsi inkişaf baxımından yaddaqalan bir təcrübə oldu.
- Əli Niftəliyev
Mən, Əli Niftəliyev, Azərbaycan Dövlət İqtisad Universitetinin Maliyyə ixtisası üzrə 4-cü kurs tələbəsiyəm. Dostlarımın inkişafında “Maliyyəçisən” proqramının rolunu görməyim və Mərkəzi Bank kimi ölkənin maliyyə sahəsində aparıcı qurumlarından birində təcrübə keçmək istəyim məni bu proqrama müraciət etməyə sövq etdi.
Təcrübəyə başlamazdan əvvəl əsasən gündəlik iş prosesləri gözləsəm də, burada yaradılan geniş imkanlar bunun sadəcə bir təcrübə proqramından daha artıq olduğunu göstərdi. “İnkişaf günləri”, “Adaptasiya və beynəlxalq təlimlər”, “Liderlə görüş”, “Yay festivalı” və digər tədbirlər Mərkəzi Bankın fəaliyyəti ilə yaxından tanış olmağıma və dəyərli networking imkanları qazanmağıma şərait yaratdı. Bu prosesdə İnsan kapitalının inkişafı və əməkdaşların işə bağlılığı şöbəsinin rəhbəri Natəvan Mirməmmədlinin, həmçinin Lalə Novruzova, Nuranə Həsənova, Ləman Hüseynzadə və Nərmin Bayramovanın dəstəyi xüsusi rol oynadı.
Təcrübəmi Maliyyə sektorunun dayanıqlı inkişafı departamentinin Maliyyə inklüzivliyi şöbəsində keçdim. Burada müxtəlif insan qrupları üzrə maliyyə inklüzivliyinin artırılması ilə bağlı beynəlxalq təcrübəni öyrənir, müqayisələr aparır, təqdimatlar və təhlillər hazırlayır, statistik məlumatlarla işləyirdik. Fəaliyyətimizin əsas istiqamətlərindən biri “Maliyyə inklüzivliyinin inkişafı üzrə 2027–2030-cu illər Dövlət Proqramı” çərçivəsində müəyyənləşdirilən hədəflər idi.
“Təcrübədən töhfəyə” layihə ideyası müsabiqəsi çərçivəsində müxtəlif departament əməkdaşları ilə görüşərək ideyamı alınan feedback əsasında inkişaf etdirdim, mümkün risklərə qarşı həll yolları axtardım və bu prosesdə Nuranə Nağıyeva ilə Səbinə Məmmədovanın dəstəyindən faydalandım. Xəzinəyə ekskursiya, rəhbərliklə görüşlər və “Məzun günü” isə proqramın yaddaqalan və xüsusi anlarından oldu.
Bu müddətdə mənə dəstək olan mentorum Ümid Həsənova, departament direktoru Rüstəm Tahirova, Baş direktor Şahin Mahmudzadəyə və bütün Mərkəzi Bank kollektivinə dərin təşəkkürümü bildirirəm. Yaradılan bütün fürsətlərdən maksimum yararlanmağa çalışdım və “Maliyyəçisən” mənim üçün peşəkar, akademik və şəxsi inkişafımda mühüm mərhələ oldu.- Əsgər Məmmədov
Mən, Əsgər Məmmədov, Azərbaycan Dövlət Neft və Sənaye Universitetində İnformasiya Təhlükəsizliyi ixtisası üzrə təhsil almışam. Mərkəzi Bank kimi nüfuzlu və ölkəmiz üçün önəmli bir qurumda öyrənmək və inkişaf etmək arzusu məni bu təcrübə proqramına müraciət etməyə vadar etdi.
Etiraf edim ki, təcrübəyə başlamazdan əvvəl gözləntilərim olduqca sadə idi. Amma ilk günlərdən məni ən çox təəccübləndirən məqam, təcrübə keçdiyim departamentin və komandanın məni bu qədər səmimi və qayğıkeş qarşılaması oldu. Onlar gözlədiyimdən daha artıq səviyyədə isti münasibət göstərib, öz bilik və təcrübələrini mənimlə həvəslə bölüşürdülər.
Təcrübəmi İnformasiya, kibertəhlükəsizlik siyasəti və nəzarəti şöbəsində keçdim. Bu müddət ərzində daim Mərkəzi Bankın tələblərini dərindən öyrənmə, audit hesabatlarını mütəmadi təhlil etmə və siyasətlərin uyğunluğunu davamlı şəkildə izləmə prosesində iştirak etdim. Paralel olaraq, təqdim olunan sübutları tədbirlər planı və çatışmazlıqlar üzrə ardıcıl müqayisə edir, bank və qeyri-bank sektorlarında informasiya təhlükəsizliyi ilə bağlı meylləri izləyərək risklərin qiymətləndirilməsi işinə töhfə verirdim.
Şöbə əməkdaşları ilə birgə beynəlxalq təcrübələri araşdırmaq, iş müzakirələrində müntəzəm iştirak etmək və təqdimatlar hazırlamaq da bu prosesin ayrılmaz hissəsi oldu. Bu davamlı təcrübə məndə audit düşüncə tərzi formalaşdırdı, vaxtımı düzgün planlaşdırmağı və eyni vaxtda bir neçə işin öhdəsindən gəlməyi öyrətdi.
Mentorum və komanda yoldaşlarım bütün bu müddət ərzində mənə dayaq oldular, hər sualıma səbrlə cavab verdilər. Məni ən çox sevindirən isə iş mühitindəki insanların bu qədər mehriban və dəstəkləyici olması idi.
Doğrusu, ən yaddaqalan anı seçmək mənim üçün çətindir, çünki bu 2 ay ərzində hər gün özündə xüsusi, dəyərli bir xatirə saxladı.
Bu təcrübə mənə çox şey öyrətdi. Mentorumun və komandanın dəstəyi sayəsində qazandığım bilik artıq məni bu sahədə müəyyən qədər inamlı hiss etdirir. Gələcək təcrübəçilərə tövsiyəm budur: hər fürsətdən yararlanın, sual verməkdən çəkinməyin, çünki bu, inkişafınızı qat-qat sürətləndirir.
Sonda, mənə bu qiymətli imkanı yaratdığı üçün Mərkəzi Banka və bu prosesdə əməyi keçən hər kəsə, xüsusilə də öz doğma departamentimə ürəkdən təşəkkür edirəm.
- Əsmər Kərimli
Mən, Əsmər Kərimli, Bakı Ali Neft Məktəbində İnformasiya təhlükəsizliyi ixtisası üzrə 3-cü kurs tələbəsiyəm. Universitetdə qazandığım bilikləri real iş mühitində tətbiq etmək və informasiya təhlükəsizliyi sahəsini daha yaxından tanımaq istədiyim üçün Mərkəzi Bankın İnformasiya təhlükəsizliyi, kibertəhlükəsizlik və rəqəmsal fırıldaqçılıqla mübarizə departamentində təcrübə keçmək mənim üçün çox dəyərli oldu.
Bu təcrübə proqramı mənim davamlı olaraq korporativ mühitdə komanda ilə işləyəcəyim ilk təcrübə proqramı olacağı üçün çox stresli idim. Xüsusilə həm şəxsi, həm də iş həyatımda çəkingən biri olduğum üçün ilk günlərdə yeni insanlara və mühitə uyğunlaşmaq mənim üçün bir qədər çətin oldu. Lakin komandamın səmimi münasibəti və dəstəyi sayəsində qısa zamanda özümü daha rahat hiss etməyə başladım.
Təcrübə müddətində informasiya təhlükəsizliyi, audit və risklərin idarə olunması ilə bağlı müxtəlif işlərdə iştirak etdim. Məlumatların təhlili, təhlükəsizlik proseslərinin qiymətləndirilməsi və hesabatların hazırlanması kimi tapşırıqlar zamanı universitetdə öyrəndiklərimi praktikada tətbiq etmək imkanım oldu. Bununla yanaşı, analitik düşüncə və komanda ilə işləmək bacarıqlarımı da inkişaf etdirdim.
Mənim üçün ən maraqlı məqamlardan biri informasiya təhlükəsizliyinin düşündüyümdən daha geniş sahə olduğunu görmək idi. Xüsusilə audit, risklərin idarə olunması və GRC istiqamətləri məndə yeni maraq yaratdı və gələcək karyera seçimlərimə fərqli baxmağıma səbəb oldu.
Ən yaddaqalan anım ilk günüm idi. Həmin gün komanda ilə tanış oldum, departamentin fəaliyyəti və görəcəyim işlər haqqında məlumat aldım. Hər şeyin ilki daha özəl və unudulmaz olur. Qarşıdakı iki ayı birlikdə keçirəcəyim, öz sahəsində uğurlu insanlarla tanış olmaq həm də maliyyə bazarına nəzarət edən bir qurumun daxili prosesləri ilə tanış olmaq mənim üçün çox xoş və maraqlı idi.
Bu təcrübə mənə həm peşəkar, həm də şəxsi baxımdan inkişaf etmək və yeni istiqamətlər kəşf etmək imkanı verdi. Gələcək təcrübəçilərə tövsiyəm sual verməkdən çəkinməmələri və qarşılarına çıxan hər fürsətdən öyrənməyə çalışmalarıdır.
Bu dəyərli təcrübəyə və göstərdikləri dəstəyə görə Mərkəzi Banka, mentoruma və komandamıza təşəkkür edirəm.
- Fatimə Fərruxlu
Mən, Fatimə Fərruxlu, Bakı Dövlət Universitetinin SABAH fakültəsinin Hüquqşünaslıq ixtisasından cari ildə məzun olmuşam. Birinci kursdan etibarən hüququn müxtəlif sahələri üzrə təcrübə keçsəm də, maliyyə sektorunda təcrübəm yox idi. Buna baxmayaraq, ölkənin maliyyə-bank sisteminin əsas tənzimləyici orqanı olan Mərkəzi Bankın təcrübə proqramına böyük maraqla müraciət etdim.
Müraciət etmiş minlərlə şəxs arasından seçilən gənclərdən biri olduğumu öyrəndiyim andan bəri bu proqramın mənim şəxsi və peşəkar inkişafım üçün əvəzolunmaz bir təcrübə olacağına əmin idim. Təcrübənin ilk günündən göstərilən səmimi dəstək və yüksək peşəkarlıq gözləntilərimi qat-qat üstələdi. Hüquq və təşkilati işlər departamentinin “İnzibati icraat və məhkəmə işləri” şöbəsindəki fəaliyyətim boyunca Mərkəzi Bankın səlahiyyətlərinə aid edilmiş inzibati xətalar haqqında işlər üzrə daxil olan məlumat və sənədləri araşdırmış,inzibati xəta haqqında protokollar tərtib etmiş, icraata başlanılması barədə bildirişlər göndərmiş və bununla əlaqədar müvafiq prosessual hərəkətləri həyata keçirmişəm. Əsas fokusum hüquqi aktların analizi, İnzibati Xətalar Məcəlləsinə dəyişikliklərə dair təqdimatın və protokolların hazırlanması üzrə araşdırmalarda iştirak etmək oldu.
Əvvəllər mənə yad olan maliyyə sferasını məhz burada sıfırdan öyrənmək, beynəlxalq təcrübəni araşdırmaq və hüquqi rəylər hazırlamaq bu sahəyə olan marağımı daha da artırdı. Nəticədə bu proses analitik düşüncə, detallara diqqət və komanda ilə iş bacarıqlarımı daha da möhkəmləndirdi.
Mənim üçün bu təcrübəni daha unudulmaz edən isə departamentdəki əməkdaşların mənə qarşı yeni gəlmiş təcrübəçi kimi deyil, illərlə birlikdə çalışdığı əməkdaş kimi doğma münasibət bəsləmələri oldu. Mentorum hər hansı bir tapşırıqda mənə sadəcə istiqamət vermədi, həm də potensialıma inanaraq mənə qərarlarımda çeviklik verdi. Komandadakı hər bir əməkdaşın öz bilik və təcrübəsini mənimlə paylaşması isə adaptasiya prosesimi inanılmaz dərəcədə asanlaşdırdı.
Bu təcrübə mənim üçün yalnız bir təcrübə proqramı olmadı, həm də gələcək karyera istiqamətimə tam aydınlıq gətirdi, artıq fəaliyyətimi məhz maliyyə-bank hüququ sahəsində davam etdirməyi qarşıma məqsəd qoymuşam. Gələcək təcrübəçilərə isə tövsiyəm odur ki, hər fürsətdən yararlanıb daha çox öyrənməyə çalışsınlar və sual verməkdən qorxmasınlar.
Mənə bu imkanı yaradan Mərkəzi Banka, Hüquq və təşkilati işlər departamentinin komandasına dərin təşəkkürümü bildirirəm!
- Fərid Hüseynov
Mən, Fərid Hüseynov, Azərbaycan Dövlət İqtisad Universitetində “Sabah” qruplarında “Economics” ixtisası üzrə təhsil alıram. Məktəb yaşlarımdan etibarən Azərbaycanın ən mühüm maliyyə institutlarından biri olan Mərkəzi Banka böyük marağım olub. Bu maraq məni Mərkəzi Bankın “Maliyyəçisən” təcrübə proqramına böyük motivasiya ilə müraciət etməyə təşviq etdi.
Proqramın ilk günündə İnsan resursları departamenti tərəfindən qarşılandığım səmimi və xoş münasibət məndə proqramın çox faydalı və uğurlu keçəcəyi ilə bağlı ilk müsbət təəssüratı yaratdı. Elə ilk gündən özümü sadəcə təcrübəçi kimi deyil, böyük və peşəkar bir komandanın üzvü kimi hiss etdim.
Təcrübə proqramı çərçivəsində Maliyyə sektorunun dayanıqlı İnkişafı departamentində fəaliyyət göstərmək mənim üçün xüsusi əhəmiyyət daşıdı. Burada Azərbaycanın mövcud dayanıqlı maliyyə mühiti, bu sahədə həyata keçirilən işlər və gələcək perspektivlər haqqında ətraflı məlumat əldə etdim. Eyni zamanda, öyrəndiyim biliklərin və gördüyüm işlərin Azərbaycanın dayanıqlı maliyyə sisteminin inkişafına kiçik də olsa töhfə verdiyini hiss etmək mənim üçün olduqca motivasiyaedici idi.
Bu müddət ərzində birgə çalışdığım mentoruma və departament əməkdaşlarına xüsusi təşəkkürümü bildirmək istəyirəm. Saysız suallarımla onları bəzən “yorsam” da, mentorum hər zaman səbirli davranaraq mənə müxtəlif mövzularda dəstək oldu, suallarımı cavablandırdı və yeni biliklər əldə etməyim üçün istiqamət verdi. Bu dəstək təcrübə müddətində həm peşəkar, həm də şəxsi inkişafım üçün çox dəyərli oldu.
Proqram çərçivəsində yaddaqalan məqamlardan biri də təşkil olunan təlimlər və İdarə Heyəti ilə görüşlər idi. Peşəkarların təcrübələrini dinləmək, onlarla yaxından tanış olmaq və bizi maraqlandıran sualları birbaşa onlara ünvanlamaq bizim üçün çox dəyərli imkan yaratdı. Bu görüşlər gələcək karyera hədəflərimə daha aydın baxmağıma və öz üzərimdə hansı istiqamətlərdə çalışmalı olduğumu müəyyənləşdirməyimə kömək etdi.
“Maliyyəçisən” proqramının ərsəyə gəlməsində və həyata keçirilməsində əməyi olan hər bir şəxsə səmimi təşəkkürümü bildirirəm. Bu proqram mənim üçün yalnız nəzəri biliklərimi praktik təcrübə ilə möhkəmləndirdiyim bir mərhələ deyil, eyni zamanda peşəkar mühitdə özümü sınadığım, yeni insanlar tanıdığım və gələcək karyeram üçün dəyərli təcrübələr qazandığım bir yol oldu.
Bu təcrübənin ən gözəl tərəflərindən biri isə insanın özünü sadəcə bir təcrübəçi kimi deyil, böyük bir qurumun və komandanın bir parçası kimi hiss etməsidir. Mərkəzi Bankda keçirdiyim bu müddət mənim üçün həm öyrədici, həm motivasiyaedici, həm də unudulmaz oldu.
Bu dəyərli təcrübəyə görə bütün komandaya təşəkkür edirəm!
- Fidan Əsədova
Mən, Fidan Əsədova, UNEC-in SABAH qruplarında Maliyyə ixtisası üzrə təhsil almışam. Təhsil və fəaliyyətlərim boyunca maliyyə ilə yanaşı texnologiyaya da maraq göstərmişəm. Azərbaycan Mərkəzi Bankının “Maliyyəçisən” proqramına müraciət etməyim isə bu iki istiqamətin real iş mühitində necə bir araya gəldiyini görmək istəyimdən irəli gəlirdi.
Təcrübə müddətində maliyyə texnologiyalarının təhlili və inkişafı istiqamətində aparılan araşdırmalarda, müzakirələrdə və yeni məhsul prototiplərinin hazırlanması prosesində iştirak etdim. Bu dövrdə mənim üçün ən dəyərli təcrübələrdən biri hazır həlləri öyrənməkdən daha çox, bir ideyanın formalaşaraq real nəticəyə çevrilənədək keçdiyi mərhələləri izləmək oldu. Müşahidə etdim ki, uğurlu ideyaları fərqləndirən əsas amillərdən biri onların ilk versiyası deyil, onlara verilən düzgün suallar və əldə olunan rəylər əsasında davamlı şəkildə təkmilləşdirilməsidir.
Maliyyə təhsili ilə yanaşı proqramlaşdırma sahəsində də müəyyən təcrübəyə malik olduğum üçün bu mühit mənə fərqli bilik və bacarıqlarımı bir arada tətbiq etmək imkanı yaratdı. Eyni zamanda başa düşdüm ki, iş həyatında uğurlu nəticə yalnız mövcud biliklərin həcmi ilə deyil, müxtəlif baxış bucaqlarını birləşdirərək problemlərə yeni yanaşmalar təqdim etmək bacarığı ilə də formalaşır.
Gələcək təcrübəçilərə tövsiyəm hər bir tapşırığa yalnız icra edilməli bir iş kimi yanaşmamalarıdır. Hər tapşırıq yeni bilik qazanmaq, fərqli yanaşmaları kəşf etmək və özünü inkişaf etdirmək üçün bir imkan kimi dəyərləndirilməlidir. Qarşıya qoyulan məqsədi yerinə yetirməklə kifayətlənməyib, “Bunu daha yaxşı necə etmək olar?” sualını daim vermək və hər tapşırıqda öz potensialını nümayiş etdirməyə çalışmaq əhəmiyyətlidir.
Bu proqram mənə hazır cavablar bazasını deyil, doğru suallar verərək ideyanın ən optimallaşdırılmış versiyasına gətirən alqoritmi formalaşdırmağı öyrətdi.
- Fidan Məcidli
Mən, Fidan Məcidli, Bakı Dövlət Universiteti SABAH qruplarının hüquqşünaslıq ixtisasının 2026-cı il məzunuyam. Mərkəzi Bankın fəaliyyəti ilə universitetin 2-ci kursunda yaxından tanış oldum. Bundan sonra burada təcrübə keçmək və peşəkar mühiti özüm sınamaq istəyi məqsədlərimdən birinə çevrildi. Buna görə də “Maliyyəçisən” təcrübə proqramına müraciət etdim. Proqramdan əsas gözləntilərim özümü inkişaf etdirmək və yeni biliklər öyrənmək idi. Proqrama başlamazdan əvvəl daha ciddi bir mühit gözləyirdim. Lakin ilk gündən etibarən komandanın mənə qarşı olan mehriban rəftarı və səmimi mühit məni təəccübləndirən məqamlardan biri idi. Mentorumun da dəstəyi ilə komandaya çox tez adaptasiya oldum.
Təcrübə müddətində əsas vəzifəm maliyyə xidməti istehlakçılarından daxil olan yazılı və şifahi müraciətlərə baxılması üzrə idi. Bu prosesdə həm nəzəri biliklərimi təcrübədə tətbiq etdim, həm də hüquqi təhlil bacarıqlarımı daha da təkmilləşdirdim. Əməkdaşlar ilə daxili müzakirələrdə iştirak etmək və praktiki araşdırmalar aparmaq mənim üçün böyük təcrübə oldu. Mentorumun və komanda üzvlərinin hər addımda mənə dəstək olması, bilik və təcrübələrini bölüşməsi özümə olan inamımı artırdı. Mərkəzi Bankın innovativ, öyrənməyə açıq və peşəkar iş mühiti məni çox ruhlandırdı. Hər iş gününə yeni məlumatlar öyrənmək həvəsi ilə başlayır, həqiqətən də hər günü zəngin təcrübələrlə bitirirdim.
Ən yaddaqalan anım isə şöbə və departament rəhbəri ilə birgə keçirdiyimiz nahar görüşü idi. Bu diqqət və ünsiyyət məni çox həvəsləndirdi. Təcrübə müddəti dövründə öz töhfəmi görmək və peşəkarlardan müsbət rəy almaq qürurverici idi. Bu təcrübə mənim karyera seçimlərimə aydınlıq gətirdi və gələcək peşəkar inkişafım üçün möhkəm zəmin yaratdı. Gələcək təcrübəçilərə tövsiyəm odur ki, hər fürsətdən öyrənməyə çalışsınlar və sual verməkdən çəkinməsinlər.
Mənə bu imkanı yaratdığı üçün Mərkəzi Banka və bütün əməkdaşlara təşəkkür edirəm!
- Hüseyn Dadaşov
Mən, Hüseyn Dadaşov, 2026-cı ildə Xəzər Universitetinin Biznesin idarə edilməsi ixtisasından məzun olmuşam. Ölkəmizin maliyyə sektorunun strukturunu və mərkəzi bankçılıq prinsiplərini daha yaxından öyrənmək istəyirdim və bu baxımdan Mərkəzi Bankın “Maliyyəçisən” təcrübə proqramı mənim üçün əla bir fürsət idi.
Mərkəzi Bank dedikdə çox ciddi korporativ iş mühiti ağlıma gəlirdi, amma təcrübəyə başladığım ilk gündən mentorumun və digər əməkdaşların səmimi yanaşması bu təsəvvürümü dəyişdi. Məni ən çox təəccübləndirən məqam isə qısa zamanda özümü sanki uzun zamandır bu komandanın bir üzvü kimi hiss etməyim oldu.
Təcrübə müddətində əsas rolum Kommunikasiya şöbəsində ənənəvi və rəqəmsal kommunikasiya alətlərindən istifadə etmək, media nümayəndələri ilə ünsiyyət qurmaq, icmallar və müxtəlif məzmunlar hazırlamaq idi. Bütün öyrəndiklərim mənim yumşaq və texniki bacarıqlarımın formalaşmasında misilsiz rol oynadı.
Bundan əlavə, mentorumun, habelə digər peşəkar əməkdaşların təcrübələrindən öyrənmək, müasir kommunikasiya metodları barədə geniş müzakirələr aparmaq təcrübə müddətində əsas prioritetlərimdən oldu.
Mentorumun ilk gündən sonacan fəaliyyətimi dəstəkləməsi, inanması və daim öyrənməyimə komək etməsi məni çox ruhlandırdı. Təlimlər və gündəlik iş prosesi sayəsində Mərkəzi Bankda öyrənmə mühitinin çox əlverişli olduğuna əmin oldum.
Ən yaddaqalan an isə Mərkəzi Bankın sədri cənab Taleh Kazımovun da iştirak etdiyi mətbuat konfransında iştirakım oldu. Əvvəllər sosial şəbəkələrdən izlədiyim konfransı bu bu dəfə canlı izləmək və tədbirin hazırlanma prosesinin iştirakçısı olmaq mənim üçün unudulmaz bir təcrübə oldu.
“Maliyyəçisən” təcrübə proqramı mənə bilik və bacarıqlar qazandırmaqla yanaşı intizam, inkişaf və daim öyrənmə kimi vacib dəyərləri aşıladı. Gələcək təcrübəçilərə məsləhətim odur ki, olduqları yerə dəyər qatmaq üçün daim öyrənsinlər və inkişaf etsinlər, sual verməkdən və öyrənməkdən çəkinməsinlər.
Yekun olaraq, Mərkəzi Banka təcrübəçi kimi gəldim, qısa zamanda özümü komandanın bir üzvü kimi hiss etdim. Bu fürsəti mənə və digər təcrübəçi həmkarlarıma yaratdıqları üçün Mərkəzi Banka təşəkkürlərimi bildirirəm!
- Hüseyn İsayev
Mən, Hüseyn İsayev, Azərbaycan Dövlət İqtisad Universitetində maliyyə ixtisası üzrə təhsil alıram. Mərkəzi Bankda təcrübə proqramına müraciət etməyimin əsas səbəbi maliyyə sabitliyinə nəzarət edən orqan olması və burada qazanacağım bilik və təcrübələrimin başqa yerdə qazana bilməyəcəyimdir.
Təcrübəyə başlamazdan əvvəl qısa müddət ərzində gözlədiyimdən daha az bilik və bacarıq qazanacağımı, həmçinin Mərkəzi Bankın əsas fəaliyyət istiqamətlərinə töhfə vermək imkanlarımın məhdud olacağını düşünürdüm. Lakin ilk günlərdən etibarən həm birbaşa ixtisasımla, həm də dolayı şəkildə əlaqəli bir çox yeni bilik əldə etməyə başladım.
Məni ən çox təəccübləndirən məqamlardan biri fəaliyyət göstərdiyim şöbədə davamlı olaraq yeni araşdırmaların aparılması və görülən işlərin ölkənin maliyyə sistemi üçün əhəmiyyətli nəticələr yaratması idi. Bu dinamika və məsuliyyət hissi təcrübə müddəti boyunca mənim motivasiyamı daha da artırdı.
Əsas tapşırıqlarım maliyyə institutları ilə bağlı təhlillərin aparılması, istifadə olunan ekonometrik modelləri nəzəri öyrəndikdən sonra onları müxtəlif təhlillərdə praktiki olaraq istifadə etmək, daşınmaz əmlak bazarının təhlili və digər tapşırıqlar idi.
Komitə üçün hazırlanan hesabatda və Mərkəzi Bankın yarımillik maliyyə sabitliyi hesabatının hazırlanmasında birbaşa iştirak etmişəm. Məsuliyyətlərim məlumatların yenilənməsi və əlavə özümün yeni fikirlərimin qeyd olunması idi ki, bu əlavələr maliyyə sabitliyi hesabatında öz əksini tapdı.
Mentorum və əməkdaşlar təcrübə müddətində daim mənə dəstək göstərdilər, həm iş prosesləri, həm də gələcək karyera planlarımla bağlı suallarımı ətraflı şəkildə cavablandırdılar. Onların peşəkar təcrübəsi və inkişaf yolu mənim gələcək karyera hədəflərimlə yaxınlıq təşkil etdiyindən, bu söhbətlər və məsləhətlər mənim üçün xüsusilə faydalı oldu.
Xüsusi və ilhamverici hadisə kimi Mərkəzi Bankın yarımillik hesabatının hazırlanma prosesini qeyd edə bilərəm. Düşünəndə ki, bu hesabatdan maliyyə institutları, beynəlxalq səviyyəli qurumlar və hesabatı oxumağa maraqlı olan hər kəs istifadə edəcək və mənim də bu hesabatda bir əmək payım olacaq, bu məqam məni çox ilhamlandırır.
Təcrübə proqramı karyeramı daha kvantitativ istiqamətlərə yönəldə biləcəyim haqqında olan fikirlərimə bir az da təkan verdi. Karyeramı daha riyazi və statistik maliyyəyə yönəltməklə bağlı daha çox fikirləşməyə başladım.
Gələcək təcrübəçilərə vermək istədiyim 2 mesaj var: daima öyrənin və özünüzə inamlı olun.
Təcrübə proqramı ərzində mənə böyük dəstək göstərən mentoruma, şöbə və departament əməkdaşlarına və bu proqramın ərsəyə gəlməsində rolu olan hər bir Mərkəzi Bank əməkdaşına öz təşəkkürümü bildirirəm.
- Hüseyn İsmayılov
Mən, Hüseyn İsmayılov, Azərbaycan Dövlət İqtisad Universitetinin (UNEC) Maliyyə ixtisası üzrə 4-cü kurs tələbəsiyəm. Ölkənin maliyyə-bank sisteminin tənzimlənməsində mühüm rol oynayan bir qurumda təcrübə keçmək ən böyük arzularımdan biri idi. Bu səbəbdən də Azərbaycan Respublikasının Mərkəzi Bankının "Maliyyəçisən" təcrübə proqramına böyük həvəslə müraciət etdim.
Təcrübə proqramı çərçivəsində Mərkəzi Bankın Rezolyusiya departamentinin Problemli maliyyə institutları ilə iş şöbəsində fəaliyyət göstərdim. İlk gündən etibarən qarşılaşdığım peşəkar mühit gözləntilərimi qat-qat üstələdi. Məni ən çox təəccübləndirən və valeh edən amil kollektivin inanılmaz səmimiyyəti və yüksək komanda ruhu oldu.
Şöbədəki təcrübə müddətində əsas tapşırıqlarım problemli maliyyə institutlarının təhlili, müvafiq məlumatların emalı və analitik materialların hazırlanmasında iştirak etmək idi. Bu müddət ərzində nəzəri biliklərimi praktiki müstəvidə tətbiq etməklə yanaşı, sahə üzrə mühüm analitik bacarıqlar da qazandım.
Departament direktorundan başlayaraq şöbə əməkdaşlarına qədər hər kəsin öyrətməyə açıq olması işimə olan motivasiyamı daha da artırdı. Yaranan hər bir sualıma anındaca cavab verməyə və mənə doğru istiqamət göstərməyə hazır olan bir komanda ilə çalışmaq özümə olan inamı dəfələrlə artırdı.
Təcrübə müddətində ən yaddaqalan an şöbəmiz tərəfindən aparılan təhlillərin və hazırlanan təqdimatların müzakirə prosesində iştirak etməyim, orada öz kiçik töhfəmi görmək oldu. Bu müsbət hiss mənə böyük qürur bəxş etdi.
Bu təcrübə maliyyə sahəsindəki gələcək karyera hədəflərimi daha da dəqiqləşdirdi və peşəkar inkişafım üçün möhkəm zəmin yaratdı. Gələcək təcrübəçilərə tövsiyəm odur ki, öyrənməyə həmişə açıq olsunlar və sual verməkdən heç vaxt çəkinməsinlər.
Mənə bu unudulmaz təcrübəni və dəyərli imkanı yaratdığı üçün Azərbaycan Respublikasının Mərkəzi Bankına və dəstəyini əsirgəməyən bütün əməkdaşlara dərin təşəkkürümü bildirirəm!
- İlahə Məhərrəmova
Mən, İlahə Məhərrəmova, Azərbaycan Dövlət İqtisad Universitetində Maliyyə ixtisası üzrə sonuncu kurs tələbəsiyəm. Mərkəzi Bank Azərbaycanın ən mühüm maliyyə qurumlarından biri və maliyyə sektorunun inkişafında əsas rol oynayan təşkilatlardan olduğu üçün burada işləmək uzun müddət arzularımdan biri olub. Hətta maliyyə sahəsini seçməzdən əvvəl belə, gələcəkdə özümü Mərkəzi Bankın əməkdaşı olaraq təsəvvür edirdim. Buna görə “Maliyyəçisən” təcrübə proqramına qəbul olduğumu öyrənmək mənim üçün sadəcə bir təcrübə proqramına qəbul olmaq deyil, uzun müddət xəyal etdiyim bir başlanğıcın reallaşması idi.
Təcrübəmi Maliyyə sektorunun dayanıqlı inkişafı departamentində keçirdim. Təcrübə proqramı gözləntilərimi düşündüyümdən də yüksək səviyyədə qarşıladı. Burada bizə sadəcə tələbə kimi kiçik tapşırıqlar deyil, departamentin və şöbənin real layihələrinə töhfə vermək imkanı yaradıldı. Şöbənin layihələri üzrə araşdırmalar aparmaq, nəticələri təhlil etmək və təqdimatların hazırlanmasında iştirak etmək mənə həm nəzəri biliklərimi praktikada tətbiq etmək, həm də araşdırma və analitik bacarıqlarımı inkişaf etdirmək imkanı verdi. Ən dəyərli məqamlardan biri isə gördüyüm işin komandanın fəaliyyətinə real töhfə verdiyini hiss etmək idi.
Bu təcrübədə ən çox sevdiyim məqamlardan biri əməkdaşlarla qurduğum münasibətlər oldu. İlk gündən özümü sanki uzun müddətdir bu komandanın bir üzvü kimi hiss etdim. Bu mühit mənə göstərdi ki, yaxşı təcrübə yalnız peşəkar bilik qazanmaqdan ibarət deyil, eyni zamanda öyrənmək, fikir bildirmək, məsuliyyət götürmək və özünü komandanın bir hissəsi kimi hiss etməkdir.
Təcrübəyə başlayanda “Görəsən bacaracam?” sualını verirdimsə, bu gün “Daha nələri bacara bilərəm?” deyə düşünürəm və bu da Mərkəzi Bankda qazandığım ən dəyərli fərqindəlik oldu. Burada yalnız yeni bilik və bacarıqlar əldə etmədim, eyni zamanda öz potensialıma daha fərqli baxmağı, qarşıma çıxan çətinliklərdən çəkinmək əvəzinə onları inkişaf üçün fürsət kimi görməyi öyrəndim.
Növbəti təcrübəçilərə demək istərdim ki, hər şeyi əvvəlcədən bilmədiyiniz üçün fürsətlərdən çəkinməyin. Öyrənməyə açıq olun, sual verməkdən qorxmayın və qarşınıza çıxan imkanlardan maksimum istifadə edin. Çünki bəzən bir təcrübə sadəcə CV-də qeyd olunan bir neçə sətir deyil, insanın özünə və gələcəyinə baxışını dəyişən bir başlanğıc olur.
- İlkin Tağıyev
Mən, İlkin Tağıyev, UNEC SABAH qruplarının Maliyyə ixtisası üzrə məzunam. Maliyyə sisteminin əsas institutlarından biri olan Mərkəzi Bankın fəaliyyətini yaxından tanımaq və universitetdə əldə etdiyim nəzəri bilikləri real iş mühitində tətbiq etmək istəyi mənim üçün “Maliyyəçisən” proqramına gedən yolu açdı.
İlk günlərdə qarşılaşdığım mühit məni sözün yaxşı mənasında təəccübləndirdi. Rəsmiyyətdən daha çox, komanda üzvlərinin açıq ünsiyyəti, bizə göstərilən səmimiyyət və bilikləri bölüşməyə hazır olmaları ilk andan böyük bir güvən və motivasiya yaratdı.
Maliyyə məlumatlılığı və peşəkar inkişaf şöbəsindəki fəaliyyətim müddətində xüsusilə Peşəkar Sertifikatlaşdırma Çərçivəsi (PSÇ) platformasının konsepsiyası, istifadəçi strukturu və vizual təqdimatlarının hazırlanmasında yaxından iştirak etdim. Bu layihə mənə yalnız maliyyə baxış bucağı deyil, həm də rəqəmsal həllər, məzmun arxitekturası və strateji planlaşdırma üzrə tamamilə yeni bacarıqlar qazandırdı.
Mentorumun və kollektivin hər addımda verdiyi səmimi dəstək, yaradıcı ideyalarımıza açdıqları geniş meydan Mərkəzi Bankın öyrənməyə və inkişafa nə qədər böyük dəyər verdiyini göstərdi. İş mühitindəki dinamika və yüksək peşəkarlıq mənə komanda ruhunun əsl gücünü yaşatdı.
Təcrübə müddətində mənim üçün ən unudulmaz an — rəhbərlik və kollektivlə birgə keçirilən şəbəkələşmə görüşlərində və layihə təqdimatlarında ideyalarımın diqqətlə dinlənilməsi və real dəyər görməsi oldu.
Bu yolçuluq peşəkar hədəflərimi daha da aydınlaşdırdı və öz gücümə olan inamı möhkəmləndirdi. Gələcək təcrübəçilərə mesajım odur ki, təşəbbüs göstərməkdən, sual verməkdən və öz potensialınızı göstərməkdən heç vaxt çəkinməyin.
Bütün bu zəngin təcrübə və mənə bəxş edilən inkişaf mühiti üçün Mərkəzi Bank rəhbərliyinə və komandasına dərin təşəkkürümü bildirirəm.
- Jalə Rəsulova
Mən, Jalə Rəsulova, ADA Universitetində Maliyyə ixtisası üzrə 4-cü kursa keçid edirəm. Mərkəzi Bankın “Maliyyəçisən” təcrübə proqramı ilə 2-ci kursun sonlarından tanış olsam da, özümü müraciət etmək üçün kifayət qədər hazır hiss etməmişdim. 3-cü kursun ikinci yarısında isə “hazır hiss etmək” düşüncəsinin məni əsassız yerə qorxutduğunun fərqinə vararaq müraciət etdim və qəbul aldım.
Qəbul cavabını aldıqda böyük sevinc və qürur hissi yaşadım, lakin bundan əlavə Mərkəzi Bank ilə bağlı gözləntim iş mühitinin həddindən artıq ciddi və sərt olacağı yönündə idi. Buna baxmayaraq, istər öz departamentimdə, istərsə də digər struktur bölmələrdə çalışan əməkdaşlar tərəfindən bizimlə edilən söhbətlərdə və yanaşmada hiss etdirilən səmimilik məni dərindən təəccübləndirdi. İlk gündən etibarən departamentin əməkdaşlarının mehriban yanaşması nəticəsində özümü sanki artıq illərdir bu komandanın bir parçasıymış kimi hiss etdim.
Valyuta ehtiyatlarının idarə edilməsi departamentinin İnvestisiyaların təhlili və xarici menecerlərlə iş şöbəsinin təcrübəçisi olaraq əsas məsuliyyətim mentorum və departamentin digər üzvləri tərəfindən verilən tapşırıqları düzgün formada yerinə yetirmək, sorğuların cavablandırılmasına dəstək etmək və hesabatlar hazırlamaq idi. Hər bir tapşırığı yerinə yetirərkən sahə üzrə daha əvvəl heç yerdə rast gəlmədiyim dəyərli biliklər öyrəndim. Bununla yanaşı, detallara xüsusi diqqət yetirmək və analitik düşünmə qabiliyyətlərimi əhəmiyyətli dərəcədə inkişaf etdirdim.
Mentorum ilk iş günündən etibarən iş yoldaşlarım ilə məni tanış etdi və hər biri məni gülər üzlə qarşılayaraq iş mühitinə qəbul etdi. Departamentdaxili müzakirələr, söhbətlər və hətta edilən səmimi zarafatlara məni də daxil etdilər. Bunun sayəsində, departamentin hər bir əməkdaşı ilə çox dəyərli münasibətlər qurma imkanına sahib oldum.
Təcrübə müddətində yaşanan hər bir an mənim üçün çox dəyərli olsa da, mənim üçün ən yaddaqalan hadisə departamentin bir neçə ildən bir etməli olduğu işdə iştirak etməyim oldu. Mən özümü bu mövzuda çox şanslı hesab edirəm ki, bu iş məhz elə mənim təcrübə keçdiyim müddətə düşdü və iştirak etmək, komandaya müəyyən qədər dəstək olmaq mənim üçün həddindən artıq maraqlı oldu.
Bu təcrübə proqramı sayəsində mən özümü gələcəkdə görə bildiyim bir sahə ilə yaxından tanış oldum və karyera planlarım daha da aydınlaşdı. Gələcək təcrübəçilərə tövsiyəm odur ki, qarşılarına çıxan şansları düzgün dəyərləndirmək üçün daima əllərindən gələni etsinlər.
Bu əvəzolunmaz təcrübə imkanı üçün Mərkəzi Banka və bütün əməkdaşlara dərin minnətdarlığımı bildirirəm.
- Ləman Mehdiyeva
Mən, Ləman Mehdiyeva, Azərbaycan Dövlət İqtisad Universitetinin Maliyyə ixtisası üzrə 4-cü kurs tələbəsiyəm. Ölkənin ən nüfuzlu və maliyyə sistemində mühüm rol oynayan qurumlarından birində təcrübə keçərək maliyyə sektorunu daha yaxından öyrənmək və mövcud nəzəri biliklərimi praktikada tətbiq etmək istəyim Mərkəzi Bankın təcrübə proqramına müraciət etməyimə əsas səbəb oldu.
Burada mənim üçün yeni olan çox şey öyrənəcəyimə və özümü peşəkar baxımdan inkişaf etdirəcəyimə əmin idim. İlk günlərdən əməkdaşların səmimi münasibəti və təcrübəçilərə göstərilən diqqət məndə çox müsbət təəssürat yaratdı, öyrənməyə açıq mühit isə gözləntilərimi üstələdi.
Mən təcrübə müddətində Rezolyusiya departamentinin Problemli maliyyə institutları ilə iş şöbəsində fəaliyyət göstərdim. Ləğvetmə planları və hesabatlar üzrə araşdırmalar aparır, müəyyən uyğunsuzluqları nəzərdən keçirirdim. Eyni zamanda, müvafiq qanunvericilik üzrə araşdırmalar apararaq bu sahədə biliklərimi genişləndirirdim. Bununla yanaşı, beynəlxalq təcrübələri araşdırmaq və daxili təqdimatlarda iştirak etmək mənim üçün çox faydalı oldu. Bu müddət ərzində analitik düşüncə, araşdırma aparmaq, detallara diqqət yetirmək və məlumatları təhlil etmək bacarıqlarımı daha da inkişaf etdirdim.
Təcrübə müddətində iş yoldaşlarım və mentorumla əməkdaşlığım çox müsbət və rahat oldu. Hər bir tapşırıq zamanı mənə yol göstərmələri, fikirlərimi dinləmələri və öyrənməyim üçün şərait yaratmaları təcrübəmi daha da faydalı etdi. Mərkəzi Bankın iş mühitində məni ən çox cəlb edən isə əməkdaşların bir-birinə dəstəyi, peşəkarlığı və öyrənməyə açıq olmaları idi.
Təcrübə müddətində mənim üçün ən yaddaqalan məqamlardan biri şöbədə aktual olan bir mövzu üzrə apardığım araşdırmanın bəyənilməsi oldu. Araşdırmamın mövzunu əhatəli şəkildə əks etdirdiyinin və düzgün hazırlandığının qeyd olunması mənim üçün çox xoş oldu. Aldığım müsbət rəy mənim üçün həm sevindirici, həm də motivasiyaedici təcrübə oldu.
Bu təcrübə mənə maliyyə sahəsində gələcək karyeramla bağlı daha aydın təsəvvür yaratmaqla yanaşı, gələcəkdə Mərkəzi Bankın əməkdaşı olmaq istəyimi də gücləndirdi. Proqramın peşəkar inkişafımda xüsusi yeri tutacağına əminəm. Gələcək təcrübəçilərə tövsiyəm odur ki, qarşılarına çıxan hər fürsətdən yararlansınlar, sual verməkdən çəkinməsinlər və öyrənməyə həmişə açıq olsunlar.
Bu dəyərli təcrübə və imkan üçün Mərkəzi Banka, mentoruma və bütün departament əməkdaşlarına təşəkkür edirəm.
- Məhəmməd Babayev
Mən, Məhəmməd Babayev, Azərbaycan Dövlət İqtisad Universitetinin Maliyyə ixtisası üzrə bakalavr məzunuyam. Ölkənin maliyyə sistemində mühüm rol oynayan bir qurumun fəaliyyətini yaxından öyrənmək və praktiki təcrübə qazanmaq hər zaman maraq dairəmdə olub. Bu səbəbdən Azərbaycan Mərkəzi Bankının “Maliyyəçisən” təcrübə proqramına böyük həvəslə müraciət etdim.
Proqrama başlamazdan əvvəl burada çox şey öyrənəcəyimi düşünürdüm. İlk gündən qarşılaşdığım səmimi münasibət və göstərilən dəstək isə gözləntilərimi daha da üstələdi. Məni ən çox təsirləndirən məqamlardan biri peşəkar iş mühiti ilə yanaşı, kollektivdə formalaşmış güclü komanda ruhu oldu. Əməkdaşların bir-birinə dəstək göstərməsi, fikir mübadiləsinə açıq yanaşması və əməkdaşlıq mədəniyyəti mənə göstərdi ki, uğurlu nəticələrin əsasını yalnız fərdi bilik və bacarıqlar deyil, həm də effektiv komanda işi təşkil edir.
Təcrübə müddətində əsas fəaliyyətim satınalma prosesləri və müsabiqələrin təşkili ilə bağlı tapşırıqlarda iştirak etməkdən ibarət idi. Bu müddətdə sənədlərlə işləmək, məlumatları təhlil etmək və satınalma prosesinin müxtəlif mərhələlərini praktiki olaraq öyrənmək imkanı əldə etdim. Qazandığım təcrübə diqqətlilik, məsuliyyətlilik və işə sistemli yanaşma bacarıqlarımın inkişafına töhfə verdi.
Təcrübə müddətində satınalma proseslərinin təşkili, şirkətlərdən daxil olan sənədlərin araşdırılması və müsabiqələrin gedişi ilə bağlı işlərdə iştirak etdim. Bu proses mənə satınalmanın necə idarə olunduğunu yaxından öyrənmək, detallara diqqət yetirmək və müxtəlif məsələlərə daha analitik yanaşmaq imkanı verdi. Mentorumun istiqamətləndirməsi və komanda üzvlərinin təcrübələrini bölüşməsi mənim inkişafımda böyük rol oynadı. Səmimi və öyrənməyə açıq iş mühiti isə bu təcrübəni mənim üçün daha dəyərli etdi.
Ən yaddaqalan təcrübələrimdən biri ehtimal qiymətlərin hazırlanması, tender elanlarının verilməsi və illik büdcələmə prosesində iştirak etməyim oldu. Bu proseslərdə gördüyüm işlərin real satınalma qərarlarına təsirini görmək mənim üçün həm maraqlı, həm də qürurverici idi.
Bu təcrübə mənim karyera seçimlərimə daha aydın baxmağıma və peşəkar inkişafım üçün möhkəm zəmin yaratmağıma kömək etdi. Gələcək təcrübəçilərə tövsiyəm odur ki, hər fürsətdən öyrənməyə çalışsınlar və sual verməkdən çəkinməsinlər.
Mənə bu imkanı yaratdığı üçün Mərkəzi Banka və bütün əməkdaşlara təşəkkür edirəm.
- Murad Zülfüqarov
Mən, Murad Zülfüqarov, Azərbaycan Respublikasının Prezidenti yanında Dövlət İdarəçilik Akademiyasının "İqtisadiyyat" ixtisasını bitirmişəm. Təhsilimə başladığım gündən etibarən ölkənin ən nüfuzlu və önəmli qurumunda çalışmaq arzum olub. Ölkənin maliyyə sistemində mühüm rol oynayan və ən böyük tənzimləyici qurumlardan biri olan Mərkəzi Bankda təcrübə keçmək mənim üçün həm böyük maraq, həm də özümü inkişaf etdirmək üçün əhəmiyyətli bir fürsət idi. Bu səbəbdən Mərkəzi Bankın “Maliyyəçisən” təcrübə proqramına böyük həvəslə müraciət etdim.
Mərkəzi Banka ilk gəldiyim gün gözləntilərim yüksək olsa da, məni ən çox təəccübləndirən ofisə daxil olduğum ilk andan əməkdaşların səmimiyyəti və mehribanlığı oldu. Peşəkarlığın və yüksək iş keyfiyyətinin belə rahat və pozitiv mühitlə bir arada olması məndə çox xoş təəssürat yaratdı.
Təcrübə müddətində Kapital bazarına və infrastrukturuna nəzarət şöbəsində fəaliyyət göstərdim. Əsas vəzifələrim verilən tapşırıqları yerinə yetirmək, məlumatları təhlil etmək, müxtəlif hesabatların təhlili prosesində iştirak etmək, eləcə də beynəlxalq kapital bazarları ilə bağlı araşdırmalar aparmaq idi. Bu müddət ərzində nəzəri biliklərimi praktikada tətbiq etmək və real iş proseslərini yaxından öyrənmək imkanım oldu. Eyni zamanda, bu təcrübə mənə analitik düşünmə, məlumatlarla işləmə və mövcud bacarıqlarımı daha da inkişaf etdirmək baxımından böyük töhfə verdi. Müxtəlif tapşırıqlar üzərində işlədikcə həm yeni biliklər əldə edir, həm də inkişaf edirdim.
Təcrübəmin ən yaddaqalan və məni ən çox ruhlandıran anlarından biri mentorumun üzərində işlədiyi bir layihəni mənə həvalə etməsi oldu. Mənə belə bir məsuliyyətin etibar edilməsi mənim üçün böyük motivasiya idi. Layihə üzərində işləyərkən həm mentorumun istiqamətləndirməsindən, həm də komanda üzvlərinin dəstəyindən faydalandım. Komandadakı hər kəsin öz bilik və təcrübəsini mənimlə bölüşməyə hazır olması və mənə güvənməsi bu prosesi mənim üçün daha da dəyərli etdi. Hazırladığım layihənin mentorum tərəfindən bəyənilməsi isə özümə olan inamımı daha da artırdı və öyrəndiklərimi praktikada tətbiq edə bildiyimi göstərdi.
Bu təcrübə mənə Mərkəzi Bankın fəaliyyətini daha yaxından tanımaqla yanaşı, gələcək karyera istiqamətim barədə də daha aydın düşünməyə imkan verdi. Gələcək təcrübəçilərə tövsiyəm odur ki, verilən hər tapşırığa öyrənmək və özlərini inkişaf etdirmək fürsəti kimi yanaşsınlar və sual verməkdən çəkinməsinlər.
“Maliyyəçisən” proqramı çərçivəsində mənə bu dəyərli təcrübəni yaşamaq imkanı yaratdığı üçün Mərkəzi Banka, mentoruma və bütün komanda üzvlərinə təşəkkür edirəm.
- Nadir Rza
Mən, Nadir Rza, Azərbaycan Memarlıq və İnşaat Universitetində İnformasiya Texnologiyaları ixtisası üzrə məzunam. Ölkənin baş maliyyə qurumunun qərarvermə mexanizmlərini yaxından görmək və analitik bacarıqlarımı inkişaf etdirmək üçün Azərbaycan Respublikası Mərkəzi Bankında təcrübə keçməyə qərar verdim.
Təcrübəyə başlamazdan əvvəl iş mühitini daha formal və qapalı təsəvvür edirdim. Lakin ilk günlərdən etibarən əməkdaşların səmimiyyəti, dəstək göstərməyə hazır olmaları və irəli sürülən ideyalara verilən dəyər mənim üçün xoş təəssürat yaratdı. Bu mühit yeni biliklər əldə etməyimə və iş proseslərinə daha rahat uyğunlaşmağıma imkan verdi.
İstehlakçılarla İş Departamentinin Müraciətlərin təhlili bölməsində fəaliyyət göstərmək mənim üçün tamamilə yeni və maraqlı təcrübə oldu. Əsas tapşırıqlarım vətəndaş müraciətləri əsasında müxtəlif statistikaların çıxarılması, dəqiq hesabatların və vizual təqdimatların hazırlanmasından ibarət idi. İT ixtisasından gəldiyim üçün rəqəmlərlə işləmək, data analizi aparmaq və onları strukturlaşdırmaq mənim üçün həm tanış, həm də çox zövqlü idi. Bu müddətdə həm analitik təfəkkürümü gücləndirdim, həm də real iş mühitində qərarların məlumatlara əsaslanaraq necə verildiyini öyrəndim.
İş yoldaşlarım və mentorum hər zaman köməyə hazır idilər, hər sualıma səbrlə cavab verirdilər. Mərkəzi Bankda məni ən çox cəlb edən məqam isə öyrənməyə və inkişafa verilən sonsuz dəstək oldu. İlk dəfə hazırladığım analitik təqdimat rəhbərlik tərəfindən bəyəniləndə keçirdiyim qürur hissini heç vaxt unutmayacağam. Bu təcrübə karyera inkişafım baxımından mühüm dönüş nöqtəsi oldu, İT sahəsində əldə etdiyim bilik və bacarıqları maliyyə sektoru ilə inteqrasiya etmək imkanlarını daha aydın şəkildə görməyimə şərait yaratdı.
Gələcək təcrübəçilərə məsləhətim odur ki, heç vaxt yeni sahələrdən çəkinməsinlər və hər kiçik tapşırığı belə böyük fürsət kimi görsünlər.
Bu dəyərli fürsətə görə Mərkəzi Bankın bütün kollektivinə və sonsuz dəstəklərinə görə departament direktoru Murad müəllimə, Nərmin xanıma və mentorum Nuranə xanıma dərin təşəkkürümü bildirirəm!
- Nərmin Cəfərli
Mən, Nərmin Cəfərli, ADA Universitetində İqtisadiyyat ixtisası üzrə 4-cü kurs tələbəsiyəm. Mərkəzi Bankın “Maliyyəçisən” təcrübə proqramına müraciət etməyimin əsas səbəbi universitetdə qazandığım nəzəri bilikləri real iş mühitində tətbiq etmək və maliyyə sektorunun necə fəaliyyət göstərdiyini daha yaxından öyrənmək idi.
Təcrübəyə başlamazdan əvvəl əsas gözləntim universitetdə və kitablarda öyrəndiyim proseslərin real həyatda hansı addımlarla həyata keçirildiyini görmək idi. Dərslərdə bəzən sadə görünən bir termin və ya “daha çox pul tədavülə buraxıldı” kimi bir ifadənin arxasında əslində nə qədər uzun və mərhələli bir prosesin dayandığını düşünürdüm. Bu proseslərin real iş mühitində necə formalaşdığının şahidi olmaq mənim üçün xüsusilə maraqlı idi. Nəzəri olaraq izah edilən proseslərin praktikada nə qədər detallı və zəhmətli, lakin nəticədə bir o qədər də məmnunedici olduğunu görmək istəyirdim.
Təcrübə müddətində Bazar davranışı siyasəti istiqamətində müxtəlif tapşırıqlar üzərində işlədim. Məlumatların araşdırılması, müxtəlif materialların hazırlanması və verilən tapşırıqların təhlilində iştirak etdim. Bu proses mənə universitetdə öyrəndiyim iqtisadi və maliyyə biliklərinə daha praktik tərəfdən baxmağa imkan verdi.
Təcrübə boyunca analitik düşünmə, məlumatla işləmə, araşdırma aparma və fikirləri daha aydın ifadə etmə bacarıqlarımı inkişaf etdirdim. Eyni zamanda, komanda daxilində işləmək, verilən tapşırıqları vaxtında yerinə yetirmək və iş prosesinə məsuliyyətlə yanaşmaq kimi vacib vərdişlər qazandım.
Komandamız və mentorlarla əməkdaşlıq bu iki ayın ən unudulmaz və ən zövqlü məqamlarından biri oldu. Bütün departament çox gülərüz, dəstəkləyici, hər bir suala açıq və səmimi insanlardan ibarət idi. Burada sadəcə iş mühiti deyil, insanların bir-birinə güvəndiyi və rahat ünsiyyət qurduğu dostluq mühitinin yaradılmasına da xüsusi önəm verilirdi.
Mentorumdan departament direktoruna qədər hər bir əməkdaş bizim hər gün yeni bir şey öyrənməyimiz üçün yol göstərir, suallarımızı cavablandırır və inkişafımızı dəstəkləyirdi. Heç bir sualın “çox sadə” və ya “yersiz” hesab edilməməsi mənim üçün xüsusilə dəyərli idi. Bu yanaşma mənə həm daha rahat öyrənməyə, həm də özümü komandanın bir hissəsi kimi hiss etməyə imkan verdi.
Mənim üçün ən yaddaqalan məqamlardan biri maliyyə istiqaməti ilə yanaşı, müxtəlif sahələrdən olan əməkdaşlarla birlikdə bir nəzarət prosesində iştirak etmək idi. Fərqli istiqamətlərin bir məqsəd ətrafında necə birləşdiyini və komanda işinin prosesdəki rolunu yaxından görmək mənim üçün maraqlı və öyrədici təcrübə oldu.
Bu təcrübə maliyyə sektoruna və analitik işə olan marağımı daha da gücləndirdi və gələcək karyera istiqamətim haqqında daha aydın düşünməyimə kömək etdi. Gələcək təcrübəçilərə tövsiyəm odur ki, yalnız tapşırıqları yerinə yetirməklə kifayətlənməsinlər. Sual versinlər, müşahidə etsinlər və hər fürsətdə prosesin “niyə” və “necə” tərəflərini anlamağa çalışsınlar.
Bu imkan üçün Mərkəzi Banka, mentoruma və bütün komanda üzvlərinə təşəkkür edirəm. Bu iki ay mənim üçün yalnız peşəkar təcrübə deyil, həm də çox dəyərli insanlarla tanış olduğum və çox şey öyrəndiyim bir yol oldu.
- Nazrin Məhərrəmova
Mən, Nazrin Məhərrəmova, Azərbaycan Dövlət İqtisad Universitetinin İqtisadiyyat ixtisası üzrə məzunuyam. Nə zaman Mərkəzi Bankın binasının yanından keçsəm, “Görəsən burada işlər necə gedir?” sualı beynimdə canlanırdı. Çox sevinirəm ki, ötən illərdən tanış olduğum "Maliyyəçisən" təcrübə proqramı sayəsində bu sualıma cavab tapdım və birbaşa iş prosesində iştirak etmək şansı əldə etdim
Təcrübəyə başlamazdan əvvəl əsas gözləntim Mərkəzi Bank kimi önəmli bir qurumda təcrübə toplamaq, bacarıqlarımı real iş mühitində inkişaf etdirmək və yeni əlaqələr yaratmaq idi. "Maliyyəçisən" proqramı bu gözləntilərimi qarşılamaqla kifayətlənməyib, mənə daha çoxunu qazandırdı.
Bu müddətdə İnsan resurslarının öyrənmə və inkişaf istiqamətində çalışaraq qiymətləndirmə fəaliyyətlərinə dəstək göstərdim. Bununla yanaşı, bir sıra maraqlı işlərdə də iştirak etmək fürsətim oldu. Məsələn, şöbəmizin fəaliyyətlari ilə əlaqədar süni intellektin tətbiqi imkanlarını araşdııb, öz həllərimi təqdim etdim. Bununla yanaşı, bankdaxili adaptasiya təlimlərinin yeni formatı ilə bağlı layihədə birbaşa iştirak etdim.
Məni ən çox sevindirən və təəccübləndirən məqam isə Mərkəzi Bankın cavabdehlik, dürustlük və inkişaf dəyərlərini iş mühitində birbaşa müşahidə etmək oldu. İlk gündən bəri özümü İnsan resursları komandasının bir əməkdaşı kimi hiss etdim. Əməkdaşların, rəhbərlərimin, xüsusən də mentorumun dəstəyi, səmimi yanaşması və xoş rəftarı iş prosesinə tez bir zamanda adaptasiya olmağıma kömək etdi.
Mənim üçün ən yaddaqalan və ilhamverici məqamlardan biri “Liderlə qəhvə” görüşləri oldu. Səmimi söhbətlər zamanı eşitdiyim fikirlərdən biri xüsusilə yaddaşımda qaldı: bəzən yorulduğun nöqtə sənin limitin deyil, daha da irəli gedə biləcəyinin göstəricisidir. Bu fikir mənim üçün təcrübə müddətində qazandığım biliklərdən daha çox, özümdə saxladığım bir düşüncəyə çevrildi.
“Maliyyəçisən” mənim üçün sadəcə iki aylıq təcrübə deyil, karyera yolumda özümə daha böyük hədəflər qoymaq üçün başlanğıc nöqtəsi oldu. Gələcək təcrübəçilərə ən böyük məsləhətim bu iki ayı çox yaxşı dəyərləndirmələri, mentorlarına çəkinmədən sual vermələri və verilən hər bir tapşırığa inkişaf üçün bir fürsət kimi baxmaları olardı.
Sonda bu dəyərli proqramın təşkili üçün Mərkəzi Bank rəhbərliyinə və İnsan resursları komandasına, eyni zamanda inkişaf yolumda işıq tutduğu üçün mentoruma dərin təşəkkürlərimi bildirirəm.
- Nigar Oruclu
Mən, Nigar Oruclu, ADA Universitetinin hüquqşünaslıq ixtisasının dördüncü kurs tələbəsiyəm. Mərkəzi Banka müraciət etməmişdən əvvəl öz yolumu dəyişdirməkdə, ənənəvi hüquq sahələrindən biraz fərqlənən işlərdə özümü sınamaqla bağlı tərəddüdlərim var idi. Düşünürdüm ki, bunu istəyirəm, lakin biraz qorxurdum. Məhz bu qorxumu aşmaq məqsədilə mən Mərkəzi Bankda bazar davranışlarının tənzimlənməsi departamentinə müraciət etdim.
Təcrübəyə başlamazdan əvvəl məndə "heç nəyi bilmirəm" hissi var idi və elə bilirdim ki, bilməmək məni hamının gözündə aşağı salır. Lakin bir müddət sonra,bilməməyi normal qəbul edib, onlara öyrənməli olduğum kimi baxmağa başladım. Komandanın səmimiyyəti və dəstəyi də bu prosesi mənim üçün daha rahat etdi.
İş yoldaşlarım və mentorlarım hər zaman köməyə hazır oldular, ən sadə suallarım belə heç vaxt cavabsız qalmırdı. Onlar sayəsində mən işə həm iqtisadi həm də hüquqi yönündən baxmağı öyrəndim. Məni ən çox cəlb edən cəhət rəhbərlərin işlərinin çox olmasına baxmayaraq, bizi işə inteqrasiya etmələri və çətinliklərimizi vaxtlarının məhdud olmasına baxmayaraq göz ardı etməmələri oldu.
Mənim üçün ən yadda qalan anlar nahar fasilələrində əməkdaşlarla edilən söhbətlər, onlardan aldığımız məsləhətlər oldu
Bu təcrübə mənə istəklərimdən qorxmamağı və qətiyyətli addım atmağı öyrətdi. Gələcək təcrübəçilərə məsləhətim odur ki, heç vaxt sual verməkdən çəkinməsinlər və hər kiçik imkanı öyrənmək üçün fürsət kimi qiymətləndirsinlər.
Bu qiymətli fürsətə görə Mərkəzi Bankın bütün kollektivinə və dəyərli mentorlarıma səmimi qəlbdən təşəkkür edirəm!
- Nihat Zeynalov
Mən, Nihat Zeynalov, 2026/2027-ci tədris ilindən etibarən Azərbaycan Dövlət İqtisad Universitetinin SABAH qrupları fakültəsində İqtisadiyyat ixtisası üzrə 4-cü kursda təhsil alacağam. Mərkəzi Bankda təcrübə keçmək mənim üçün maraqlı olsa da, bu fürsətin hekayəsi bir qədər fərqli başladı. Ötən il proqram haqqında dostlarımdan birinin LinkedIn-də paylaşdığı yazı vasitəsilə məlumat əldə etdiyim zaman artıq müraciət müddəti başa çatmışdı. Bu il isə proqram haqqında yenidən məlumat əldə edən kimi tərəddüd etmədən müraciət etdim. Mərkəzi Bankın meqarequlyator funksiyasını həyata keçirən dövlət qurumu olması və iqtisadiyyat üzrə təhsil alan biri kimi onun fəaliyyətinin mənə maraqlı görünməsi bu qərarımda əsas rol oynadı.
Bu proqram mənim ilk təcrübə proqramım idi və buna görə də korporativ mühitlə bağlı müəyyən gözləntilərim var idi. Mərkəzi Bank kimi böyük və məsuliyyətli bir qurumda iş mühitinin daha formal və məsafəli olacağını, əməkdaşların isə işlərinin sıxlığı səbəbindən təcrübəçilərə çox vaxt ayıra bilməyəcəyini düşünürdüm. Lakin ilk gündən bu gözləntilərimin tamamilə fərqli olduğunu gördüm. Əməkdaşların səmimi münasibəti, iş proseslərini ətraflı izah etmələri və hətta işlərinin çox olduğu vaxtlarda belə öyrənmə prosesimizə vaxt ayırmaları məndə çox müsbət təəssürat yaratdı.
Vətəndaşların qəbulu şöbəsində əsas öhdəliklərim Mərkəzi Banka daxil olan müraciətləri təhlil etmək, qanunvericiliyə əsaslanan cavablar hazırlamaq və qeyd olunan məsələlərlə bağlı araşdırmalar aparmaqdan ibarət idi. İlk real tapşırığımı uğurla tamamladığım an mənim üçün xüsusi əhəmiyyət daşıyırdı. İlk dəfə üzərimə qoyulan məsuliyyətin real peşəkar iş prosesinin bir hissəsi olduğunu hiss etdim və nəzəri biliklərimi praktikada tətbiq etməyə başladığımı gördüm.
Təcrübə müddətində Mərkəzi Bankın səlahiyyətlərini, onların tətbiqini və nəzarət subyektlərinin öhdəliklərini daha yaxından öyrəndim. Eyni zamanda, Vətəndaşların qəbulu şöbəsində işləmək Mərkəzi Bankın fəaliyyətinə insanların gündəlik qarşılaşdığı məsələlər prizmasından baxmağa imkan verdi. Hər bir müraciətin arxasında konkret bir insanın sualının, probleminin və gözləntisinin dayandığını görmək məsuliyyətli və əsaslandırılmış yanaşmanın vacibliyini daha yaxşı anlamağıma kömək etdi.
Bu təcrübə mənə yalnız Mərkəzi Bankın fəaliyyəti haqqında daha ətraflı məlumat əldə etmək deyil, həm də peşəkar fəaliyyətin və məsuliyyət bölgüsünün necə qurulduğunu görmək, verilən tapşırıqlara məsuliyyətlə yanaşmaq və nəzəri biliklərimi praktikada tətbiq etmək imkanı verdi. Mərkəzi Banka onun necə işlədiyini öyrənmək üçün gəlmişdim, amma əslində bu müddət ərzində özüm haqqında da çox şey öyrəndim. İşə yanaşmam və peşəkar mühitdə fəaliyyət göstərmək barədə daha aydın təsəvvür formalaşdı.
Düşünürəm ki, burada qazandığım təcrübə gələcək karyera yolum üçün dəyərli təməllərdən biri olacaq. Məsuliyyət daşımaq, öyrənməyə açıq olmaq, komandanın bir hissəsi kimi fəaliyyət göstərmək və gördüyüm işin daha böyük bir prosesin parçası olduğunu anlamaq bu təcrübənin mənim üçün ən vacib qazancı oldu.
Mənə bu imkanı yaratdığı və təcrübə müddətində göstərdiyi dəstəyə görə Mərkəzi Banka, mentorum və bütün şöbə əməkdaşlarına səmimi təşəkkürümü bildirirəm.
- Nurlan Əsədov
Mən, Nurlan Əsədov, Azərbaycan Dövlət İqtisad Universitetində Kompüter Mühəndisliyi ixtisası üzrə 3-cü kurs tələbəsiyəm. Kibertəhlükəsizlik və informasiya texnologiyalarına olan marağım məni bu sahədə inkişaf etməyə həvəsləndirdi. Bu məqsədlədə ölkənin ən əhəmiyyətli qurumlarından biri olan Mərkəzi Bankda “Maliyyəçisən” təcrübə proqramına müraciət etdim.
Təcrübəyə başlamazdan əvvəl fəaliyyətimin daha çox nəzəri biliklərlə məhdudlaşacağını düşünürdüm. Lakin ilk günlərdən etibarən əldə etdiyim təcrübə gözləntilərimdən fərqli oldu. Kollektivin səmimi münasibəti, dəstəkçi yanaşması və iş mühiti proqramla bağlı müsbət təəssüratlarımı daha da gücləndirdi.
Təcrübə müddətində gündəlik texniki dəstək proseslərinin bir hissəsi olmaq mənə kritik əhəmiyyət daşıyan bir qurumun iş mühitini yaxından tanımaq imkanı verdi. İstifadəçilərdən daxil olan müraciətlərin cavablandırılması, texniki problemlərin aradan qaldırılması və sistemlərin fasiləsiz fəaliyyətinə dəstək göstərilməsi zamanı həm nəzəri biliklərimi praktikada tətbiq etdim, həm də yeni bacarıqlar qazandım. Şəbəkə problemlərinin həlli, sistem və proqram təminatlarının quraşdırılması, eləcə də istifadəçilərə texniki dəstəyin göstərilməsi istiqamətində dəyərli təcrübə əldə etdim.
Təcrübə müddətində komandamızla işləmək mənim üçün ən xoş təcrübələrdən biri oldu. Mənə sadəcə təcrübəçi kimi deyil, həm də komandanın bir hissəsi kimi yanaşıldı. İş yoldaşlarım çox mehriban, səmimi və zarafatcıl idilər. Komandamızın işlərinin çox olmasına baxmayaraq, hər kəs bir-birinə dəstək olurdu. İş mühiti həmişə rahat və pozitiv qalırdı. Xüsusilə bölmə rəhbərimizin mənə göstərdiyi diqqət və dəstək öyrənməyimə çox kömək etdi. Mərkəzi Bankdakı ən fərqli məqamlardan biri məhz peşəkar iş mühiti ilə belə səmimi və mehriban kollektivin bir arada olması idi.
Mənim üçün ən yaddaqalan məqamlardan biri mentorlarımın mənə güvənərək rəhbər vəzifələrdə çalışan əməkdaşların texniki problemlərini müstəqil şəkildə həll etməyimə imkan verməsi oldu. Bu etimad həm özümə olan inamımı artırdı və həm də böyük motivasiya verdi.
Bu təcrübə mənim gələcək karyera seçimimə böyük təsir etdi. Artıq əminəm ki, gələcəkdə kibertəhlükəsizlik və IT sahəsində ixtisaslaşmaq istəyirəm. Gələcək təcrübəçilərə tövsiyəm odur ki, öyrənmək üçün qarşılarına çıxan hər imkandan istifadə etsinlər, sual verməkdən çəkinməsinlər və öyrənməyə daim maraqlı olsunlar.
Mənə bu fürsəti yaratdığı üçün Mərkəzi Banka və bütün əməkdaşlara təşəkkür edirəm.
- Raul Aslanov
Mən, Raul Aslanov, Bakı Ali Neft Məktəbinin Biznesin idarə edilməsi ixtisası üzrə məzunuyam. Ölkənin maliyyə sistemində mühüm rol oynayan Azərbaycan Mərkəzi Bankında, xüsusilə maliyyə texnologiyaları sahəsində praktiki təcrübə qazanmaq mənim üçün hər zaman böyük maraq doğurub. Məhz bu səbəbdən “Maliyyəçisən” təcrübə proqramına böyük həvəslə müraciət etdim.
Təcrübəyə başlamazdan əvvəl çox rəsmi və ciddi bir iş mühiti gözləyirdim. Lakin ilk günlərdən qarşılaşdığım mehriban, səmimi və öyrətməyə açıq kollektiv məni çox təəccübləndirdi. Bu dostcanlı yanaşma sayəsində iş mühitinə çox tez adaptasiya oldum və müraciət etdiyim şöbənin mənim üçün ən doğru seçim olduğunu dərhal anladım.
Maliyyə texnologiyaları və innovasiyalar departamentinin Xüsusi tənzimləmə rejimi (XTR) şöbəsində iki ay ərzində təcrübə keçdim. Əsas tapşırıqlarım XTR-ə müraciət edən məhsulların uyğunluğunu yoxlamaqdan və rəqəmsal valyuta üzrə araşdırmalar aparmaqdan ibarət idi. Həmçinin bu müddətdə kriptoaktivlər haqqında dünya praktikasını da dərindən öyrənmək imkanım oldu.
Verilən tapşırıqları böyük maraqla, sıxılmadan və tez bir zamanda yerinə yetirirdim. Şöbənin gördüyü bütün işlərdə aktiv iştirak etməyim 2 aylıq təcrübə dövrümün çox effektiv keçməsini təmin etdi. Fəaliyyətim boyunca kommunikasiya, araşdırma, analitik və problem həll etmə bacarıqlarımı əhəmiyyətli dərəcədə inkişaf etdirdim.
İş yoldaşlarım və mentorumla münasibətlərimiz çox yaxşı quruldu, hətta işdən kənar səmimi dostluqlarımız da yarandı. Mərkəzi Bankın iş mühitində ən çox diqqətimi çəkən məqam hər kəsin bir-biri ilə səmimi və yardımlaşmağa hazır olması idi. Komandanın bu cür dəstəyi işimi daha da sevərək görməyimə kömək etdi.
Təcrübə müddətində mənim üçün ən ilhamverici məqam təkcə iş yoldaşlarımın deyil, həm də şöbə müdiri və departament direktorunun mənə qarşı səmimi davranması, irəli sürdüyüm fikirlərə dəstək verməsi oldu. Bu unudulmaz təcrübə gələcək karyeramı məhz maliyyə texnologiyaları sahəsində davam etdirməyim üçün böyük bir addım oldu.
Gələcək təcrübəçilərə tövsiyəm odur ki, öyrənməkdən heç vaxt çəkinməsinlər, hər bir tapşırığa yeni bir fürsət kimi yanaşsınlar və səmimi ünsiyyət qursunlar. Mənə bu dəyərli inkişaf imkanını yaratdığı və daim dəstək olduqları üçün Mərkəzi Banka, eləcə də əziz kollektivimizə dərin təşəkkürümü bildirirəm.
- Rəsul Qədimli
Mən, Rəsul Qədimli, ADA Universitetində Maliyyə ixtisası üzrə III kurs tələbəsiyəm. Maliyyə sektorunda praktik təcrübə qazanmaq və ölkənin maliyyə sistemində mühüm rol oynayan Mərkəzi Bankın fəaliyyətini yaxından öyrənmək istəyim məni “Maliyyəçisən” təcrübə proqramına müraciət etməyə sövq etdi.
Təcrübəyə başlamazdan əvvəl Mərkəzi Bankı daha formal və iyerarxik iş mühitinə malik bir qurum kimi təsəvvür edirdim. Lakin ilk gündən bu düşüncəm dəyişdi. Əməkdaşların təcrübəçilərə komandanın bir üzvü kimi yanaşması, onların inkişafına xüsusi diqqət yetirməsi və dəstəkləyici münasibəti məndə son dərəcə müsbət təəssürat yaratdı.
Təcrübə müddətində Pul siyasəti departamentinin fəaliyyətini yaxından öyrənmək, beynəlxalq təcrübələri araşdırmaq, müxtəlif mövzular üzrə təkliflər hazırlamaq və əldə etdiyim nəticələri departament rəhbərliyinə təqdim etmək imkanı qazandım. Mənim üçün ən dəyərli məqamlardan biri irəli sürdüyümüz təkliflərin təqdimatlar zamanı diqqətlə müzakirə olunması və qiymətləndirilməsi idi. Bu, təcrübəçi kimi fikirlərimin əhəmiyyətli hesab edildiyini hiss etdirdi və məni daha da motivasiya etdi.
Bu müddət ərzində monetar siyasət qərarlarının formalaşdırılması prosesinə dair baxışım da dəyişdi. Kənardan bu qərarların yalnız bir neçə iqtisadi göstəricinin təhlili əsasında qəbul edildiyi təsəvvürü yarana bilər. Lakin təcrübə zamanı gördüm ki, hər bir qərarın arxasında geniş araşdırmalar, təhlillər, müzakirələr və intensiv komanda işi dayanır. Bu proses analitik düşüncə, tədqiqat, təqdimat və komanda ilə əməkdaşlıq bacarıqlarımın inkişafına mühüm töhfə verdi.
Ən yaddaqalan anlarımdan biri təcrübənin ilk günündə departament direktoru Azər müəllimin məni və şöbə rəhbərimi iclasa dəvət etməsi, mühüm bir tapşırığın icrasına cəlb etməsi oldu. İlk gündən mənə göstərilən etimad həm məsuliyyət hissimi artırdı, həm də motivasiyamı gücləndirdi. Bununla yanaşı, baş direktor Vüqar Əhmədovun təcrübə müddətində göstərdiyi dəstək, eləcə də öz peşəkar inkişaf yolu ilə bağlı təcrübələrini bölüşməsi mənim üçün xüsusilə dəyərli oldu.
“Maliyyəçisən” təcrübə proqramı karyera hədəflərimə də yeni baxış formalaşdırdı. Əvvəllər daha çox maliyyə sahəsində inkişaf etməyi düşünürdümsə, bu təcrübədən sonra makroiqtisadiyyat və monetar siyasət istiqamətində də karyeramı davam etdirməyi ciddi şəkildə nəzərdən keçirirəm. İki ay ərzində qazandığım bilik və təcrübə mənim üçün həm peşəkar, həm də şəxsi inkişaf baxımından böyük əhəmiyyət kəsb etdi.
Gələcək iştirakçılara tövsiyəm odur ki, proqramın təqdim etdiyi hər bir fürsəti maksimum dəyərləndirsinlər, öyrənməkdən çəkinməsinlər və öz fikirlərini bölüşməkdə fəal olsunlar.
Sonda bu təcrübənin həyata keçirilməsində əməyi olan Mərkəzi Bankın İnsan resursları komandasına, həmçinin təcrübə müddətində məni dəstəkləyən, istiqamətləndirən və biliklərini mənimlə bölüşən mentorüm İsmayıl İsmayıllıya dərin təşəkkürümü bildirirəm. Bu təcrübənin peşəkar inkişaf yolumda mühüm mərhələ olduğuna inanıram.
- Rüstəm Mustafazadə
Mən, Rüstəm Mustafazadə, Azərbaycan Dövlət İqtisad Universitetində (UNEC) Maliyyə ixtisası üzrə 3-cü kurs tələbəsiyəm. “Maliyyəçisən” proqramına başladığım ilk gündən etibarən bu təcrübənin mənim üçün yalnız peşəkar deyil, eyni zamanda şəxsi inkişaf baxımından da böyük əhəmiyyət daşıdığını hiss etdim. Proqram müddətində əldə etdiyim bilikləri real iş mühitində tətbiq etmək, yeni bacarıqlar qazanmaq və özümü müxtəlif istiqamətlərdə sınamaq mənim üçün çox dəyərli təcrübə oldu.
Bu müddət ərzində qazandığım ən önəmli təcrübələrdən biri peşəkar iş mühitinə uyğunlaşmaq və komanda daxilində effektiv fəaliyyət göstərməyi öyrənmək idi. Layihə komandamızla birlikdə çalışarkən hər bir komanda üzvünün fərqli bacarıq və yanaşmalarının ümumi nəticəyə necə təsir etdiyini gördüm. Birlikdə qarşılaşdığımız problemləri həll etmək, fikirlərimizi bölüşmək və ortaq məqsədə doğru irəliləmək mənim komanda işi və problem həll etmə bacarıqlarımın inkişafında mühüm rol oynadı.
Proqram ərzində əldə etdiyim bilik və təcrübələr gələcək karyera yolumu daha aydın şəkildə müəyyənləşdirməyimə də kömək etdi. Xüsusilə maliyyə sektorunun dinamik və inkişaf üçün geniş imkanlar təqdim edən bir sahə olduğunu daha yaxından görmək mənim bu istiqamətdə özümü daha da inkişaf etdirmək istəyimi artırdı. Eyni zamanda, proqram zamanı tanış olduğum insanlar, yaşadığım maraqlı anlar və komandamızla birlikdə qazandığımız təcrübələr mənim üçün bu proqramın ən dəyərli xatirələri olaraq qalacaq.
“Maliyyəçisən” proqramı mənim üçün sadəcə bir təcrübə proqramı deyil, peşəkar gələcəyimə doğru atdığım mühüm addımlardan biri oldu. Bu proqram mənə həm öz potensialımı daha yaxşı tanımağa, həm də gələcək məqsədlərimə daha inamla yanaşmağa imkan verdi.
Bu proqramda iştirak etmək istəyən hər kəsə tövsiyəm odur ki, qarşılarına çıxan hər fürsətdən maksimum yararlansınlar, yeni biliklər əldə etməkdən çəkinməsinlər və bu təcrübənin hər anını dəyərləndirsinlər. “Maliyyəçisən” yalnız öyrənmək üçün deyil, həm də dəyişmək, inkişaf etmək və gələcəyə daha inamlı addımlamaq üçün gözəl bir fürsətdir.
- Səmayə Həsənova
Mən, Səmayə Həsənova, Bakı Dövlət Universitetinin Hüquqşünaslıq ixtisası üzrə 4-cü kurs tələbəsiyəm. Mərkəzi Bankda təcrübə keçmək mənim özüm üçün müəyyən etdiyim əsas hədəflərimdən biri idi. Bu səbəbdən “Maliyyəçisən” təcrübə proqramına ilk müraciətim uğurlu nəticələnməsə də, bu il yenidən müraciət etdim və qəbul oldum.
Proqramdan əvvəl maliyyə bazarlarına nəzarət edən qurum olaraq Mərkəzi Bankda tənzimləmə mexaniziminin hüquqi əsasının necə formalaşdırılması məndə maraq doğururdu. İlk günlərdə yüksək səviyyədə səmimi iş mühitinin olması məni təəcübləndirmişdi.
Təcrübə müddətində Bank sektorunda hüquqi təminat şöbəsində fəaliyyət göstərərək müxtəlif hüquqi sorğuların cavablandırılması, hazırlanmaqda olan normativ hüquqi aktların müzakirəsində iştirak və yeni qəbul edilmiş tənzimləyici sənədlərlə bağlı təqdimatların hazırlanması istiqamətlərində çalışdım. Bu fəaliyyətlər mənə həm universitetdə qazandığım nəzəri bilikləri praktikada tətbiq etmək, həm də hüquqi təhlil və araşdırma bacarıqlarımı inkişaf etdirmək imkanı yaratdı.
Əlavə olaraq, şöbə əməkdaşları ilə birgə beynəlxalq təcrübələri araşdırmaq komanda ilə iş bacarıqlarımın inkişafına dəstək oldu.
Mentorum hər addımda məni istiqamətləndirdi və mənə güvəndi. Komanda üzvlərinin isə öz bilik və təcrübələrini bölüşərək mənim inkişafıma dəstək olmaları məni daha da ruhlandırdı. Təcrübə müddəti ərzində şəxsi inkişafımız və adaptasiyamız üçün təlimlərin təşkil edilməsi də dəyərli idi.
Ən yaddaqalan anım isə şöbəmiz tərəfindən hazırlanan qanunvercilikdə dəyişiklik edilməsinə səbəb ola biləcək layihənin araşdırma mərhələsində iştirak etmək və komanda yoldaşımla buna dair təqdimatın çıxışını həyata keçirməyimiz oldu. Orada öz töhfəmi görmək qürurverici idi.
Bu təcrübə mənim yeni bir iş mühiti ilə tanış olmağıma və yay tətilini səmərəli keçirməyimə vəsilə oldu. Bu təcrübə maliyyə bazarları sahəsinə marağımı daha da artırdı və bu sahə üzrə karyera planlarım üçün doğru addımları müəyyən etməyimə kömək etdi. Gələcək təcrübəçilərə tövsiyəm odur ki, hər fürsətdən istifadə edərək öyrənməyə çalışsınlar və sual verməkdən çəkinməsinlər.
Mənə bu imkanı yaratdığı üçün Mərkəzi Banka və bütün əməkdaşlara təşəkkür edirəm.
- Turanə İbrahimova
Mən, Turanə İbrahimova, Bakı Dövlət Universitetinin Hüquq fakültəsinin məzunuyam. Maliyyə sektoru ölkəmizin aparıcı sahələrindən biridir və buna görə də həmişə bu sahədə fəaliyyət göstərən maliyyə institutlarından birində özümü sınamaq istəmişəm. Bu baxımdan ən doğru ünvanın Mərkəzi Bank olduğunu düşünərək “Maliyyəçisən” proqramına müraciət etdim.
Proqrama başlamazdan əvvəl burada yeni bilik və bacarıqlar qazanmaqla yanaşı, yeni bir ailənin parçasına çevriləcəyimə inanırdım. Lakin ilk gündən əməkdaşlar tərəfindən səmimi qarşılanmağım, mənə öyrətmək həvəsi və yerinə yetirdiyim tapşırıqlara göstərilən etimad gözləntilərimi aşmışdır.
Təcrübə müddətində əsas fəaliyyətim şöbəyə daxil olan müxtəlif sorğular üzrə hüquqi rəylərin hazırlanmasından ibarət idi. Bu çərçivədə Mərkəzi Bankın tərəf olduğu beynəlxalq və yerli müqavilələrə hüquqi rəy və düzəlişlərin verilməsi, vətəndaş müraciətlərinin cavablandırılması, daxili reqlament sənədlərinin hazırlanması, eləcə də normayaratma fəaliyyəti prosesində yaxından iştirak etdim. Təcrübə müddətində verilən tapşırıqlar mənə yalnız hüquqi bilik və bacarıqlarımı inkişaf etdirmək deyil, eyni zamanda korporativ iş mədəniyyətini daha yaxından tanımaq, məsələlərə müxtəlif baxış bucaqlarından yanaşmaq və peşəkar mühitdə özümü sınamaq imkanı yaratdı.
Mentorum hər bir işimdə mənə dəstək göstərir, şöbənin fəaliyyətinə verdiyim töhfəni qiymətləndirir və məni daha çox təşəbbüs göstərməyə həvəsləndirirdi. İşlə bağlı məsələlərlə yanaşı, karyera və şəxsi inkişafımla bağlı verdiyi məsləhətlər də mənim üçün çox dəyərli oldu.
Digər əməkdaşların mənə təcrübəçi kimi deyil, komandanın üzvü kimi yanaşması da bu müddəti xüsusi edən amillərdən biri idi. Səsləndirdiyim fikirlərə hörmətlə yanaşmaları, məni müzakirələrə cəlb etmələri özümü komandanın bir parçası kimi hiss etməyimə imkan verdi. Hər birinə qatdıqları dəyər və verdikləri dəstək üçün sonsuz minnətdarlığımı bildirirəm.
Təcrübəni mənim üçün xüsusi edən yalnız bir xatirəni seçmək isə açığı, olduqca çətindir. Hər gün fərqli, rəngarəng hadisələr, maraqlı müzakirələr və yeni öyrənmələr ilə yadda qalırdı. Şöbəmizlə fasilələr zamanı etdiyimiz səmimi söhbətlər, gündəlik həyatımıza qatdığımız kiçik, lakin xoş fərqliliklər və birlikdə keçirdiyimiz anlar, yəqin ki, bu təcrübənin ən yaddaqalan xatirələri sırasında olacaq.
İnanıram ki, bu proqram karyeram üçün mühüm bir mərhələ oldu və mənə bir sıra bilik və bacarıqlar qazandırdı. Gələcək təcrübəçilərə tövsiyəm isə budur ki, təcrübə müddətində daim yeniliklər öyrənməyə açıq və həvəsli olsunlar, sual verməkdən çəkinməsinlər və şəxsi inkişaflarını yalnız təşkilatın deyil, özlərinin də məsuliyyəti kimi qəbul etsinlər.
Gözəl xatirələrlə dolu bir təcrübə proqramının iştirakçısı olmaq imkanı yaratdıqları üçün Mərkəzi Bankın rəhbərliyi və əməyi olan hər bir əməkdaşa dərin minnətdarlığımı bildirir, təşkilatın gələcək fəaliyyətində uğurlar arzulayıram!
- Yasin Mövsümov
Mən, Yasin Mövsümov, Azərbaycan Respublikası Prezidenti yanında Dövlət İdarəçilik Akademiyasının Siyasi İdarəetmə fakültəsində Hüquqşünaslıq üzrə IV kursda təhsil alıram. Hüquq normalarının yalnız tətbiqində deyil, onların formalaşması prosesində də iştirak etmək istəyi və bank-maliyyə qanunvericiliyinin xüsusiyyətlərini daha dərindən öyrənmək marağı məni “Maliyyəçisən” təcrübə proqramına qoşulmağa sövq etdi.
Düzünü desəm, başlamazdan əvvəl Mərkəzi Bank kimi ciddi və böyük bir qurumda korporativ mühitə uyğunlaşmağın mənim üçün çətin olacağını düşünürdüm. Lakin ilk günlərdən yanıldığımı anladım. Bankın sürətli və dinamik iş ritmi ilə yanaşı, biz təcrübəçilərə göstərilən səmimi diqqət, komandanın açıqlığı və xüsusən də peşəkarlıqla səmimilik arasındakı balansı qorumaqları mənim üçün inanılmaz bir məqam idi. Təcrübəçi olduğum şöbənin rəhbərinin, mentorlarımın və digər əməkdaşların ilk andan göstərdiyi istiqanlıq bütün tərəddüdlərimi yuyub apardı.
Təcrübə müddətində sadəcə müşahidəçi olmadım, real iş prosesinin tam mərkəzində yer aldım. Mərkəzi Bankın normativ xarakterli akt layihələrinin hüquqi ekspertizasında iştirak etmək, hüquqi rəylər hazırlamaq, maliyyə bazarlarındakı yeniliklərə dair hüquqi məlumatlar tərtib etmək və fərqli qurumlardan, eləcə də vətəndaşlardan gələn sorğuları araşdırmaq əsas öhdəliklərim idi.
Bu müddət mənə müqayisəli hüquq araşdırmaları aparmağı, mürəkkəb tənzimləyici çərçivələri dərinliyinə qədər təhlil etməyi və əsaslandırılmış hüquqi rəylər yazmağı öyrətdi. Kitablarda oxuduğum hüquq nəzəriyyəsinin canlı maliyyə mexanizmləri ilə necə uzlaşdığını görmək və tətbiq etmək əvəzsiz bir təcrübə oldu.
İş mühitində məni ən çox cəlb edən məqam buradakı yüksək korporativ mədəniyyət, peşəkarlıq və hər kəsin fikrinə dəyər verilən inklüziv atmosfer idi. Mentorlarım, rəhbərlərim və komanda yoldaşlarım sadəcə biliklərini bölüşmədilər, hər addımda analitik düşüncəmi inkişaf etdirməyim üçün mənə yol göstərdilər, dəstəklərini heç zaman əsirgəmədilər.
Təcrübəmin ən unudulmaz anı hazırladığımız təqdimatın departament müzakirəsində yüksək qiymətləndirilməsi və baş direktorumuz Tural Feyzullayevin bizə normativ-hüquqi akt layihəsinin hazırlanmasını həvalə etməsi oldu. Bir təcrübəçi olaraq belə böyük bir etimadı qazanmaq və əməyimin dəyərləndirildiyini görmək mənə sonsuz özünəinam və ilham verdi.
Bu təcrübə bank və maliyyə hüququ sahəsində peşəkar karyera qurmaq istəyimə tam əminlik gətirdi və gələcək hədəflərimi daha da aydınlaşdırdı. Gələcək təcrübəçilərə ən səmimi tövsiyəm odur ki, hətta ən kiçik görünən tapşırığa belə böyük məsuliyyətlə yanaşsınlar, çəkinmədən sual versinlər və Mərkəzi Bankın təqdim etdiyi bu zəngin öyrənmə imkanının hər anından maksimum bəhrələnsinlər.
Mənə bu unikal təcrübəni yaşatdıqları üçün Mərkəzi Bank rəhbərliyinə, hər zaman yanımda olan dəyərli mentorlarım Fuad bəyə və Nigar xanıma, eləcə də bütün doğma kollektivimizə içdən minnətdarlığımı bildirirəm. Bu dövr peşəkar həyatımın ən parlaq və unudulmaz səhifələrindən biri kimi həmişə yaddaşımda qalacaq.
- Zeynəb Abbasova
Mən, Zeynəb Abbasova, Azərbaycan Dövlət İqtisad Universitetinin Beynəlxalq İqtisadiyyat Məktəbində (ISE) Maliyyə ixtisası üzrə üçüncü kurs tələbəsiyəm.
Mərkəzi Bankda işləmək məktəbli vaxtlarımdan bəri arzularımdan biri olub. Bu arzumu reallaşdırmaq və fəaliyyətini yaxından görmək istədiyim Mərkəzi Bankın bir parçası olmaq fürsəti “Maliyyəçisən” təcrübə proqramına müraciət etməyimin əsas səbəbi oldu.
Təcrübəyə başlayanda əsas gözləntim öyrəndiklərimi praktikada tətbiq etmək və iş mühitini yaxından tanımaq idi. İlk günlərdən isə anladım ki, burada qazanacaqlarım təkcə iş təcrübəsi ilə məhdudlaşmayacaq. Yeni mövzularla tanış olmaq, fərqli yanaşmaları görmək və hər zaman suallarımı səbirlə cavablandıran insanlarla birgə işləmək bu təcrübəni daha xüsusi etdi.
Təcrübə müddətində Kapital Bazarlarına Nəzarət Departamentinin Korporativ Maliyyə şöbəsində çalışaraq maliyyə hesabatlarının yoxlanılması və təhlili, maliyyə göstəricilərinin qiymətləndirilməsi, habelə müxtəlif məlumatların müvafiq tələblərə uyğunluğunun araşdırılması proseslərində iştirak etdim. Bununla yanaşı, qiymətli kağızlar bazarında məlumatların açıqlanması ilə bağlı beynəlxalq təcrübəni araşdırdım, müxtəlif ölkələrin yanaşmalarını müqayisə edərək əldə etdiyim nəticələri ümumiləşdirdim. Təcrübə müddətində araşdırdığım hər yeni mövzu mənə təkcə yeni məlumat deyil, məsələlərə diqqətlə yanaşmaq, düzgün sual vermək və cavabı müstəqil şəkildə axtarmaq vərdişini də qazandırdı.
Bu müddətdə vaxtımı səmərəli idarə etməyi, fikirlərimi daha aydın ifadə etməyi və komanda daxilində daha fəal olmağı öyrəndim. Məni ən çox cəlb edən isə mehriban, səmimi və bir-birini dəstəkləyən kollektiv mühiti idi — birgə gördüyümüz işlər qədər, iş günlərini xoş anlara çevirən söhbətlər və gülüşlər də yaddaşımda qalacaq.
Təcrübə müddətində mənim üçün ən yaddaqalan məqamlardan biri Mərkəzi Bankın rəhbər şəxsləri və müxtəlif sahələrdə uğur qazanmış peşəkarlarla keçirilən görüşlər oldu. Onların illər ərzində topladıqları təcrübəni, keçdikləri yolu və öz sahələrinə dair fikirlərini dinləmək mənim üçün həm maraqlı, həm də ilhamverici idi.
Bu gün Mərkəzi Bankdan yalnız iş təcrübəsi ilə deyil, yeni biliklər, inkişaf etdirdiyim bacarıqlar, gözəl xatirələr və gələcəyimə daha aydın baxışla ayrılıram. Gələcək təcrübəçilərə tövsiyəm budur: öyrənmək üçün hər fürsətdən istifadə edin, sual verməkdən çəkinməyin və ətrafınızdakı insanların təcrübəsindən yararlanmağa çalışın.
Mənim üçün məktəbli vaxtlarında qurulan bir arzunun belə gözəl bir kollektivin içində gerçəkləşməsi bu təcrübənin ən xüsusi tərəfi olaraq qalacaq. Bu yolda mənə dəstək olan mentoruma və Mərkəzi Bank komandasına dərin təşəkkürümü bildirirəm.
- Zeynəb Xəlilli
Mən, Zeynəb Xəlilli, Azərbaycan Dövlət İqtisad Universitetində Maliyyə ixtisası üzrə 2-ci kurs tələbəsiyəm. Mənim Mərkəzi Bankla tanışlığım 2024-cü ildə Mərkəzi Bank tərəfindən həyata keçirilən “Rəqəmsal ödənişlər və elektron bankçılıq” kursu üzrə müsabiqənin qaliblərindən biri olmağımla başladı. Mərkəzi Bankın mühiti həmin andan etibarən məni çox cəlb etdiyindən, həmişə buradakı real iş prosesi ilə tanış olmağı arzulamışam. Xoşbəxtlikdən, “Maliyyəçisən” təcrübə proqramına ilk müraciətimdən sonra təcrübə keçmək şansı qazananlardan biri də mən oldum.
Təcrübəyə başlamazdan əvvəl əsas məqsədim bu müddətdən maksimum faydalanmaq və mümkün qədər çox yeni bilik əldə etmək idi. Məni xüsusilə təəccübləndirən məqamlardan biri isə yalnız öz departamentimdən deyil, ehtiyac yarandıqda digər departamentlərin əməkdaşlarından da məlumat və dəstək ala bilməyim oldu. Mərkəzi Bankda olan əməkdaşlıq mühiti sayəsində gözlədiyimdən də dəyərli və faydalı təcrübə qazandığımı düşünürəm.
Təcrübə müddətində Mərkəzi Bankın, Nağd pul və hesablaşmalar departamentinin və Maliyyə bazarlarında hesablaşmalar şöbəsinin fəaliyyət istiqamətləri ilə tanış oldum, aidiyyəti normativ sənədlər üzrə biliklər əldə etdim. Müxbir və kastodian hesablarla əməliyyatlar, beynəlxalq köçürmələr, eləcə də daxili və xarici maliyyə bazarlarında bağlanılmış əqdlər üzrə hesablaşmalar, təsdiq və üzləşdirmə proseslərini müşahidə edərək onların icrasında iştirak etdim. Nəticədə, maliyyə bazarlarında aparılan əməliyyatların hesablaşması və nəzarət mexanizmləri üzrə nəzəri biliklərə və praktiki bacarıqlara yiyələndim.
Bundan əlavə, müxtəlif öyrənmə və inkişaf təlimlərində iştirak etmək və sual- cavab sessiyalarına qoşulmaqla həyatımın və karyeramın hər bir məqamında mənə faydalı olacaq yeni yanaşmalar və təcrübələr qazandım.
Bu müddət ərzində mənim ən şanslı olduğum məqamlardan biri məhz mentorum Nigar Naibova idi. Çətinlik çəkdiyim anlarda daim mənə dəstək olmağı, səbirlə yanaşmağı və güvənməyi mənə çox kömək oldu. Digər komanda üzvləri də hər zaman daha çoxunu öyrənməyim üçün əllərindən gələni edirdilər.
Ən yaddaqalan an isə departament direktorumuz Fətullah Ələkbərov və digər əməkdaşlarla naharda etdiyimiz söhbət oldu. Bu həm mənim onlar və təcrübələri, həm də onların mən və təcrübələrimlə daha yaxından tanış olmağına səbəb oldu.
“Maliyyəçisən” təcrübə proqramı mənim ixtisasım üzrə keçdiyim ilk təcrübə idi və qısa müddətdə həqiqətən də çox şey mənimsədim. Ən əsası da, artıq real iş prosesində hansı bilik və bacarıqların daha əhəmiyyətli olduğunu dərk etdim.
Bizlərə bütün imkanları yaradan və rəylərimizə daim yüksək dərəcədə əhəmiyyət verən Mərkəzi Bank və əməkdaşlarına təşəkkür edirəm!
- Zəhra Hüseynova
Mən, Zəhra Hüseynova, Bakı Dövlət Universitetində Hüquqşünaslıq ixtisası üzrə (tədris ingilis dilində) 4-cü kurs tələbəsiyəm.
Mənim üçün “Maliyyəçisən” təcrübə proqramı sadəcə iki aylıq peşəkar təcrübə deyil, akademik və karyera yolumda istiqamətimi dəyişən xüsusi bir mərhələ oldu.
Maliyyə bazarlarının hüquqi təminatı departamentinin Sığorta şöbəsində təcrübəyə başlamazdan əvvəl sığorta sahəsi mənim üçün xüsusi maraq doğuran istiqamətlərdən biri deyildi. Universitetdə sığorta hüququnu keçmədiyim üçün bu sahədə nəzəri biliklərimin də kifayət qədər olmadığını düşünürdüm. Buna baxmayaraq, “Maliyyəçisən” proqramına müraciət prosesində sığorta sahəsi haqqında daha çox oxumağa və araşdırmağa başladım. Araşdırdıqca sığortanın maliyyə sistemindəki rolunu, insanların və bizneslərin üzləşdiyi risklərin idarə olunmasında əhəmiyyətini və hüquqla nə qədər sıx əlaqəli olduğunu daha yaxşı anladım. Elə həmin vaxt bu sahəyə münasibətim dəyişməyə başladı.Buna görə Sığorta şöbəsində təcrübəçi olaraq seçilməyim mənim üçün sadəcə bir seçim nəticəsi deyildi. Bu, akademik həyatımda yeni bir başlanğıc idi. Mən əvvəllər haqqında kifayət qədər məlumatım olmayan bir sahəyə daxil olur və onu sıfırdan öyrənmək imkanını əldə edirdim.
“Maliyyəçisən” proqramında seçildiyimi öyrəndiyim ilk gündən bu təcrübənin mənim üçün dəyərli olacağını düşünürdüm. Lakin ilk gündən qarşılaşdığım səmimi və dəstəkləyici mühit bu gözləntimi də aşdı. Departamentdə hər kəsin təcrübəçilərə vaxt ayırması, suallarımızı dinləməsi və bildiklərini bizimlə bölüşməsi mənə özümü sadəcə təcrübəçi kimi deyil, komandanın bir hissəsi kimi hiss etdirdi. Xüsusilə də yeni olduğum və çox şeyi bilmədiyim üçün sual verməkdən çəkinməməyimə yaradılan şərait mənim üçün çox dəyərli idi.
Bu iki ay ərzində mentorumun dəstəyi isə təcrübəmin ən vacib hissələrindən biri oldu. Düşünürəm ki, bir hüquqşünas üçün ən vacib bacarıqlardan biri yalnız suallara cavab tapmaq deyil, ilk növbədə düzgün sualı verə bilməkdir. Təcrübə müddətində mən məhz bunu öyrəndim. Mentorumun verdiyi istiqamətlər və digər əməkdaşların fikirləri mənə məsələlərə yalnız bir tərəfdən deyil, müxtəlif hüquqi və praktik aspektlərdən yanaşmağı, qarşıma çıxan problemin mahiyyətini düzgün müəyyən etməyi və daha məqsədyönlü araşdırma aparmağı öyrətdi.
Əslində, bu müddətdə araşdırma etməyin yalnız qanunvericilikdə lazımi normanı tapmaqdan ibarət olmadığını da başa düşdüm.
Bununla yanaşı, departamentin gündəlik fəaliyyəti ilə tanış olmaq mənə hüququn yalnız nəzəri biliklərdən ibarət olmadığını bir daha göstərdi. Normativ aktların hazırlanması və təkmilləşdirilməsi prosesini yaxından görmək, hüquqi məsələlərin praktikada necə araşdırıldığını müşahidə etmək mənim üçün universitetdə öyrəndiyim nəzəri biliklərin real iş mühitində necə tətbiq olunduğunu anlamaq baxımından xüsusilə əhəmiyyətli idi.
Mentorumun ən çox qiymətləndirdiyim xüsusiyyətlərindən biri isə səbri idi. Bəzən cavabını bilmədiyim çox sadə görünən sualları belə çəkinmədən verə bilirdim və o, heç vaxt sualımı əhəmiyyətsiz hesab etmədən, ətraflı şəkildə izah edirdi. Mənim üçün bu, sadəcə müəyyən məsələləri öyrənmək deyil, bilmədiyim bir şeyi soruşmaqdan çəkinməmək və öyrənmə prosesinə daha açıq yanaşmaq baxımından da böyük bir dərs oldu.Bu müddət ərzində bəzən öyrəndiyim şey böyük bir hüquqi məsələ, bəzən isə əvvəllər heç fikir vermədiyim kiçik bir detal olurdu. Amma düşünürəm ki, bu təcrübəni mənim üçün həqiqətən xüsusi və unudulmaz edən yalnız öyrəndiklərim deyildi. Departament əməkdaşlarının mənə yeni gəlmiş təcrübəçi kimi deyil, sanki uzun müddətdir birlikdə çalışdığımız bir həmkar kimi münasibət göstərməsi bu iki ayı mənim üçün daha doğma etdi.
Xüsusilə nahar fasilələrində birlikdə keçirdiyimiz vaxtlar mənim üçün ən xoş xatirələrdən biri olaraq qalacaq. İşlə bağlı olmayan mövzularda etdiyimiz söhbətlər, onların həyat və karyera təcrübələrindən danışmaları və müxtəlif məsələlərə baxışlarını bölüşmələri mənə bəzən işlədiyim layihələr qədər çox şey öyrətdi. Peşəkar inkişafın yalnız iş prosesində əldə edilən biliklərdən ibarət olmadığını, ətrafındakı insanlardan öyrənməyin də bunun mühüm hissəsi olduğunu məhz burada hiss etdim.
Bu iki ay ərzində mənə öyrənmək, sual vermək, araşdırmaq, səhv etmək və yenidən öyrənmək üçün şərait yaradan Mərkəzi Banka, Maliyyə bazarlarının hüquqi təminatı departamentinin rəhbərliyinə, Sığorta şöbəsinin bütün əməkdaşlarına və xüsusilə mentorumun mənə göstərdiyi səbr və dəstəyə görə təşəkkür edirəm. Buradan yalnız topladığım biliklərlə deyil, gələcək karyeram üçün daha aydın bir istiqamət və çox gözəl insanlarla bağlı xatirələrlə ayrılıram.
“Maliyyəçisən” mənim üçün iki ayın deyil, gələcək yolumun başlanğıc nöqtələrindən biri oldu.- İlahə Murad
Mən, İlahə Murad, Bakı Dövlət Universitetində Hüquqşünaslıq ixtisası üzrə 4-cü kurs tələbəsiyəm. Elə 1-ci kursdan mənə qanunvericiliyin normayaratma hissəsi çox maraqlı olub. Buna görə də çox böyük motivasiya ilə Mərkəzi Bankın “Maliyyəçisən” təcrübə proqramına müraciət etdim.
Rəqabətli keçən seçim mərhələsindən sonra təcrübə proqramının qalibi olduğumu öyrənəndə çox böyük qürur hissi yaşamışdım. İlk gün ofisə gedəndə əvvəlki təcrübələrimdən fərqli olaraq çox səmimi və komanda ruhunun güclü olduğu bir iş mühiti ilə tanış oldum. Hər bir əməkdaş məni öyrətməyə və dəstək göstərməyə çox həvəsli idi.
Təcrübə dövründə mentorumun peşəkar kimi ayırdığı vaxt və göstərdiyi diqqət mənim üçün çox qiymətli idi. Mən ödəniş təşkilatları və elektron pul təşkilatlarının fəaliyyətləri ilə bağlı sorğulara cavab məktubu hazırlayır, müvafiq olaraq bu sahədə beynəlxalq təcrübəni də araşdırırdım. Eyni zamanda mentorumun dəstəyi ilə müxtəlif qanunvericilik layihələrini də ekspertiza edir, innovativ məhsullara hüquqi rəy verirdim. Mentorum isə hər bir sualımı səbirlə və diqqətlə dinləyərək məni yönləndirirdi. Təcrübə zamanı maliyyə texnologiyaları və ödəniş əməliyyatlarının praktik tərəfləri məndə böyük maraq yaratdığı üçün karyeramı bu istiqamətdə daha da dərinləşdirmək qərarına gəldim və müvafiq təlimlərə qoşuldum.
Mərkəzi Bankda elə bir iş mühiti formalaşıb ki, nəinki mentorum, həmçinin digər şöbələrin əməkdaşlarına çəkinmədən suallarımı ünvanlaya bilirdim. Onların komanda ruhu və səmimiyyəti mənə həqiqətən ilham verirdi. Məhz bu səbəbdəndir ki, yalnız ödəniş sektorunun hüquqi təminatı deyil, ümumilikdə maliyyə bazarlarının hüquqi təminatı sahəsində dayanmadan məlumatlanırdım.
Mənim üçün ən yaddaqalan anım yeni qəbul edilmiş normativ hüquqi akt haqqında hazırladığımız təqdimatın bütün Mərkəzi Bank əməkdaşları ilə paylaşılması idi. Əlavə olaraq nahar fasilələrində departamentin əməkdaşları ilə həmsöhbət olmaq, onların təcrübələrindən faydalanmaq çox maraqlı və əvəzolunmaz idi.
Bu təcrübə bir hüquqşünas kimi ixtisaslaşacağım sahəni aydınlaşdırmağıma kömək etdi və iştirak etdiyim ən produktiv təcrübə oldu. Gələcək təcrübəçilərə tövsiyəm odur ki, təcrübə proqramında maksimum dərəcədə sual verməyə və öyrənməyə çalışsınlar.
Mənə bu imkanı yaratdığı üçün Azərbaycan Respublikası Mərkəzi Bankına və onun bütün əməkdaşlarına təşəkkür edirəm.
- Turab Xanlarov
Mən, Turab Xanlarov, Qlazqo Universitetində İqtisadiyyat ixtisası üzrə təhsil alıram. Ölkənin maliyyə və iqtisadi sistemində mühüm rol olynayan siyasət qurumunda makroiqtisadi prosesləri təhlil etmək, analitik bacarıqlar əldə etmək məqsədilə Mərkəzi Bankın təcrübə proqramına çox böyük həvəs və ümidlərlə müraciət etdim.
Təcrübəyə başlayanda həm həyəcanlı, həm də çox şey öyrənəcəyimə əmin idim. İlk günlərdən kollektivin səmimiyyəti və mənə göstərilən diqqət bütün həyəcanımı aradan qaldırdı. İş mühitinin peşəkarlığı isə məni motivasiya edən çox vacib amil oldu.
Müaciətimə uyğun olaraq Tədqiqat departamentinin Makroiqtisadi tədqiqatlar şöbəsində təcrübə proqramı keçməyə başladım. Əsas tapşırıqlarım analitik arayışların yazılmasında iştirak etmək, tədqiqat sualları ilə bağlı beynəlxalq təcrübəni öyrənmək, tədqiqat və araşdırma üçün zəruri statistik məlumatları təhlil etmək və toplamaq, onları dəqiqləşdirmək və müxtəlif proqnozların hazırlanmasında iştirak etmək idi. Bu prosesdə nəzəri biliklərimi praktik olaraq tətbiq etməklə yanaşı, güclü analitik bacarıqlar, xüsusilə proqram paketlərindən istifadə təcrübəsi də qazandım.
Tədqiqat komandası və xüsusilə mentorumla işləmək mənə zövq və gələcək planlarıma töhfə verdi. Komandanın hər üzvü çox bilikli və mehriban olmaqla yanaşı, hər zaman məni motivasiya edirdilər. Mentorum maraqlı layihələr həvalə etdi və təcrübəmin ən yüksək səviyyədə keçməsi üçün əlindən gələni əsirgəmədi.
Bu dövrdə ən yaddaqalan anım hazırladığım araşdırmanı monetar blokun müzakirəsinə təqdim etməyim oldu. Həmin an gördüyüm işin faydasını, mənə qazandırdığı təcrübəni əyani şəkildə görmək mənim üçün böyük qürur mənbəyi idi.
Bu təcrübə gələcək karyera hədəflərimi daha dəqiq müəyyən etməyə böyük təsir göstərdi. Gələcək təcrübəçilərə tövsiyəm odur ki, hər fürsətdən yararlandıqları kimi, komandanın təcrübəsindən də maksimum faydalansınlar.
Mənə bu unudulmaz təcrübəni bəxş edən Mərkəzi Banka və bütün kollektivə dərin təşəkkürümü bildirirəm.
- 2025-ci ilin "Maliyyəçisən" təcrübəçilərinin hekayələri
- Nuray Məmmədli
Mən, Nuray Məmmədli Azərbaycan Dövlət İqtisad Universitetində Business Administration ixtisası üzrə 3-cü kurs tələbəsiyəm. Özüm həmişə maliyyə sektorunda peşəkar təcrübə qazanmaq və ölkənin ən mühüm qurumlarından biri olan Mərkəzi Bankda işləmək arzusu ilə yaşamışam. Bu səbəbdən də “Maliyyəçisən” təcrübə proqramına böyük maraq və motivasiya ilə müraciət etdim.
Proqrama başlamazdan əvvəl gözləntilərim əsasən nəzəri biliklərimi tətbiq etmək idi. Amma ilk gündən qarşılaşdığım səmimiyyət, dəstək və öyrənməyə açıq mühit gözləntilərimdən qat-qat artıq oldu. Ən çox təəccübləndiyim isə iş proseslərinin nə qədər sistemli və peşəkar şəkildə qurulması idi.
Təcrübə müddətində əsas tapşırıqlarım məlumatların təhlili, risklərin qiymətləndirilməsi və müxtəlif hesabatların hazırlanmasında iştirakdan ibarət oldu. Bundan əlavə, bizə verilmiş xüsusi layihə – Risk Əsaslı Nəzarətin data əsaslı yanaşma ilə optimallaşdırılması üzərində işləmək mənim üçün çox dəyərli təcrübə idi. Bu layihə həm analitik bacarıqlarımı gücləndirdi, həm də komanda ilə birgə işləməyin məsuliyyətini hiss etdirdi. Vaxtın düzgün idarə olunması, təqdimat hazırlamaq və fikirlərimi daha aydın ifadə etmək kimi bacarıqlarım da bu prosesdə inkişaf etdi.
Mentorum və həmkarlarım hər addımda məni istiqamətləndirdi, təcrübələrini bölüşdülər. Mərkəzi Bankda gördüyüm ən dəyərli cəhət isə yüksək peşəkarlığın komanda ruhu ilə balanslaşdırılması oldu. Bu mühit mənim üçün həm öyrədici, həm də motivasiyaedici idi.
Ən yaddaqalan anım isə şöbə əməkdaşlarının monitorinq etdiyi bir nəzarət subyektinin müzakirəsi zamanı iclasda iştirak etməyim oldu. Bu iclasda real vəziyyətlərin necə təhlil olunduğunu və qərarların necə qəbul edildiyini yaxından görmək mənim üçün həm öyrədici, həm də çox ilhamverici təcrübə idi.
Bu təcrübə karyera planlarıma daha çox aydınlıq gətirdi və gələcəkdə bu sahədə özümü daha peşəkar görmək istəyim gücləndi. Gələcək təcrübəçilərə mesajım budur ki, hər fürsətdən öyrənməyə çalışsınlar, sual verməkdən çəkinməsinlər və komanda işindən həzz alsınlar.
Mənə bu imkanı yaratdığı üçün Mərkəzi Banka və bütün əməkdaşlara təşəkkür edirəm.
- Aysel Allahverdiyeva
Mən, Aysel Allahverdiyeva UNEC-də Maliyyə ixtisası üzrə təhsil alıram. Daim Maliyyə sabitliyi mövzusuna marağım olub və bu sahəni ən peşəkar şəkildə öyrənə biləcəyim yerin məhz ölkənin aparıcı qurumu olan Mərkəzi Bank olduğunu düşündüyüm üçün “Maliyyəçisən” təcrübə proqramına qoşuldum. Hər zaman Mərkəzi Bankda işləməyi arzulamışam və bu proqramı arzuma doğru atdığım ilk addım kimi qiymətləndirirəm.
Proqram başlayandan etibarən həm iş mühiti, həm də departament əməkdaşları məndə çox xoş təəssürat yaratdı. İlk gündən məni səmimi qarşıladılar və hər addımda dəstək oldular. Mentorum daim inkişafımla maraqlandı, öyrənməyimə töhfə verdi və mənə yeni yanaşmalar öyrətdi.
Mən Maliyyə sabitliyi departamentinin Maliyyə sabitliyinin təhlili şöbəsində təcrübə keçdim. Burada əsasən Maliyyə sabitliyi hesabatının hazırlanmasına dəstək verdim. Bundan əlavə, kredirləşmə ilə bağlı hesabatlarda, prudensial göstəricilərin təhlilində iştirak etdim və sığorta sahəsində ilkin biliklər qazandım. Bu proses mənim həm analitik bacarıqlarımı, həm də nəzəri biliklərimi təcrübədə tətbiq etmək imkanımı artırdı.
Departament əməkdaşları hər zaman öz təcrübələrini paylaşaraq mənə yol göstərirdilər. Onların peşəkarlığı və öyrətməyə açıq münasibəti məni çox ruhlandırdı. İş mühitində gördüyüm bu əməkdaşlıq və dəstək gələcəkdə özümə hədəf qoyduğum peşəkar mühiti necə təsəvvür etməyimə kömək etdi.
Ən yaddaqalan anım, iştirak etdiyim hesabatlarda öz töhfəmi görmək və nəticələrin ümumi işə faydalı olduğunu bilmək oldu. Bu, mənim üçün həm qürurverici, həm də motivasiyaedici idi.
Bu təcrübə mənim karyera seçimlərimə aydınlıq gətirdi və maliyyə sabitliyi sahəsində fəaliyyət göstərmək istəyimi gücləndirdi. Gələcək təcrübəçilərə məsləhətim odur ki, hər fürsəti öyrənməyə sərf etsinlər və suallarını verməkdən çəkinməsinlər.
Mənə bu imkanı yaratdığı üçün Mərkəzi Banka və bütün əməkdaşlara minnətdaram.
- Aytac Qarayeva
Mən, Qarayeva Aytac Azərbaycan Respublikasının Prezidenti yanında Dövlət İdarəçilik Akademiyasının "İqtisadiyyat" ixtisası üzrə 4-cü kurs tələbəsiyəm. Təhsilimə başladığım gündən etibarən ölkənin ən nüfuzlu və önəmli qurumunda çalışmaq arzum olub. Buna görə də, Mərkəzi Bankın “Maliyyəçisən” təcrübə proqramına böyük həvəs və maraqla müraciət etdim. Mərkəzi Bankın həm prestiji, həm də həm daxili və xarici memarlıq dizaynı məni burada işləməyə daha da həvəsləndirdi.
Təcrübə proqramına qoşulmazdan əvvəl çox faydalı biliklər əldə edəcəyimə inanırdım, amma işçilərin isti və dostyana münasibəti, eləcə də onlardan aldığım dəstək gözləntilərimi çox aşdı. Məni ən çox heyrətləndirən isə iş yerində peşəkarlığın yüksək səviyyədə olması ilə bərabər, həm də möhkəm birlik və əməkdaşlıq ruhunun olması idi. Eyni zamanda, bizi sadəcə təcrübəçi kimi yox, əsl həmkar kimi qəbul edərək Mərkəzi Bank ailəsinə daxil etmələri çox xoş və dəyərli bir yanaşma idi.
Mənim əsas vəzifəm işçilərin performansının qiymətləndirilməsi, işçilərin işə bağlılığı üçün bir sıra layihələrin təşkilində iştirak etmək idi. Bu prosesdə nəzəri biliklərimi praktikada tətbiq etdim, yeni analitik bacarıqlar əldə etdim, ən əsas isə kollektivlə sevərək işləməyi öyrəndim.
Mentorum mənim üçün əvəzsiz dəstək və rəhbər oldu; onun diqqəti, səbrlə yol göstərməsi və potensialıma olan inamı mənə böyük güc verdi. Onun göstərdiyi qayğı və nümunəvi rəhbərlik sayəsində mən özümə daha çox inandım və işimə daha çox həvəslə yanaşdım.
Ən yaddaqalan anım isə mentorumun üzərində işlədiyi layihəni güvənərək mənə həvalə etməsi oldu. Mentorumun mənə olan güvənini və öz töhfəmi görmək çox qürurverici idi.
Eyni zamanda, burada çalışdığım müddət ərzində Mərkəzi Bankın yalnız peşəkarlıqla deyil, həm də öz dəyərlərinə sadiq və əzmkarlıqla bağlı olan bir qurum olduğunu dərindən dərk etdim. Bankın inkişaf, dürüstlük və cavabdehlik kimi dəyərlərə ciddi riayət etməsi, hər bir əməkdaşın bu dəyərləri öz işində yaşatması mənim üçün çox təsirli oldu.
Bu təcrübə mənim gələcək karyera istiqamətimi daha dəqiq müəyyənləşdirməyimə kömək etdi və peşəkar bacarıqlarımı inkişaf etdirmək üçün möhkəm bir zəmin yaratdı. Təcrübə proqramında iştirak edən hər kəsə tövsiyəm odur ki, qarşlarına çıxan hər fürsəti maksimum dərəcədə dəyərləndirsinlər və bilmədikləri mövzularda çəkinmədən suallarını verərək öz biliklərini genişləndirsinlər.
Mənə bu imkanı yaratdığı üçün Mərkəzi Banka və bütün əməkdaşlara təşəkkür edirəm.
- Azərin Məhərrəmli
Mən, Azərin Məhərrəmli Azərbaycan İqtisadiyyat universitetində Maliyyə ixtisası üzrə təhsil alıram. Mərkəzi Bankda təcrübə proqramına müraciət etməyimin səbəbi həm bank sektorunun iş prinsiplərini yaxından tanımaq, həm də özümü peşəkar mühitdə inkişaf etdirmək istəyi idi. Bu təcrübənin mənim gələcək karyeram üçün dəyərli addım olacağına inanıram.
Təcrübəyə başlamazdan əvvəl daha soyuq və ekstra ciddi bir iş mühiti gözlədiyim üçün çox danışmadan mənə verilən işləri yerinə yetirməli olduğumu düşünürdüm, lakin təcrübədə bunun heç də belə olmadığını, insanların “bank sektoru sıxıcıdır” fikrinin doğru olmadığını, tam əksinə Mərkəzi Bankda hamının bir-biri ilə maraqlandığını və isti, ünsiyyətcil bir ortam olduğunu gördüm. Ən təəccübləndiyim hissə isə bir-birini tanımayan insanların belə salam verərək hal-əhvallarını soruşması oldu. Bəzən özünüzü pis hiss etsəniz belə birinin sizə “salam, necəsiniz?” deməsi ilə o anki ruh halınız yaxşılaşa bilir.
Mənim əsas vəzifəm vətəndaşların qəbulu prosesini yaxından izləyərək, əməkdaşların qəbulları necə apardığını müşahidə etmək idi. Bundan əlavə Mərkəzi Bankın müxtəlif istiqamətlər üzrə təşkil etdiyi təlimlərdə və bizə verilən “Qanunvericilikdə Kapital Bazarı” haqqında layihənin hazırlanmasında iştirak etmişəm. Təcrübə zamanı analitik düşünmə, məlumatların emalı, rəsmi yazışma qaydaları, komanda işi və vaxtın idarə edilməsi bacarıqlarımı inkişaf etdirdim.
İş yoldaşlarım və mentorum çox qayğıkeş idilər. Problem olduğu an hətta ola biləcəyi anlarda belə soruşub dəstəklərini göstərirdilər. Belə bir komanda ilə işləmək mənim üçün çox faydalı oldu. İş mühitində məni ən çox cəlb edən isə insanların həmişə loru dildə desək gözdə qulaqda olub bir-birlərinin yardımına qaçması idi. Təcrübə müddətində bir çox yaddaqalan anım oldu. Bunlardan ən əsası isə ilk işlə bağlı təklifimi verdiyim gün təklifimin nəticəsindən çox bu qədər maraqlanıb təklif verdiyim üçün göstərilən minnətdarlıq oldu. İclasda hərkəsin təklif üçün təşəkkürlərini bildirməsi məni başqa təkliflərin verilməsi ilə bağlı daha da motivasiya etdi.
Təcrübə işləmək istədiyim iş mühiti haqqında fikir formalaşmasında mənə hədsiz kömək olmaqla yanaşı gələcəkdə Mərkəzi Bankın əməkdaşı olmaq istəyimi daha da gücləndirdi. Gələcək təcrübəçilərə məsləhətim budur ki, onlara verilən tapşırıqları yerinə yetirməklə yanaşı əməkdaşlarla əlaqə quraraq bilmədikləri bir çox sahədən məlumatlana bilərlər. Mərkəzi Banka mənə qatdıqları hər şey üçün təşəkkür edirəm!
- Cəfər Qurbanlı
Mən, Cəfər Qurbanlı Bakı Mühəndislik Universitetinin Informasiya Texnologiyaları ixtisası üzrə 3-cü kursda təhsil alıram.
İlk real iş mühiti təcrübəmi birbaşa mərkəzdən başlayıb daha güclü karyera başlanğıcı üçün məhz Azərbaycan Respublikası Mərkəzi Bankına müraciət etdim.
Təcrübəyə başlamazdan əvvəl burada xoş insanlarla qarşılaşacağıma və onlardan çox şey öyrənəcəyimə əmin idim amma hər şey gözlədiyimdən daha artığı oldu, deyəsən bu baxımdan çox şanslıyam.
Təcrübə zamanı əsas vəzifəm Xüsusi Tənzimləmə Rejiminin Təşkili şöbəsində Mərkəzi Bankın elektron xidmətlər saytının yeni konsepsiyasının hazırlanması, virtual varlıqların beynəlxalq təcrübədə necə tənzimlənməsini araşdırmaq istiqamətində oldu. Bu müddət ərzində tədqiqat, komanda işi, analitik düşüncələr və digər bacarıqlar qazandığımı deyə bilərəm.
İşçi münasibətlərinə gəlsək, mentorum mənim hər addımımda mənəvi olaraq mayak rolunu oynadı, nəyisə səhv etdikdə və ya başa düşmədikdə mentorumun dadıma çatacağına şübhəm yox idi. Açığı ilk iş təcrübəmdə belə gülərüz, mehriban və səmimi iş yoldaşlarımın olacağını təsəvvür etməzdim. Belə iş yoldaşları olanda lap 7/24 ofisə gəlib çalışmaq istəyirsən :D
Ən yadda qalan anım açığı yoxdur hər anın müəyyən dəyəri oldu mənim üçün. Gördüyüm işlərdən mənə xüsusi dəyər qatan isə Mərkəzi Bankın elektron xidmətlər saytının yeni konsepsiyasını təklif kimi irəli sürməyim oldu.
Kariyeramı qurmaq istədiyim sahədə təcrübə keçdim və bu sahədə müəyyən boşluqlarımın olduğunun fərqinə vardım, bu burada qazandığım ən böyük təcrübə oldu. Gələcək təcrübəçilərə tövsiyəm, səhvlərinə təcrübə kimi yanaşsınlar və təcrübədən öyrənsinlər.
Kariyerama Mərkəzi Bankdan başlamaq şansı yaratdıqları üçün bütün idarə heyətinə və bütün əməkdaşlara təşəkkür edirəm.
- Nicat Daşdəmirli
Mən, Nicat Daşdəmirli Milli Aviasiya Akademiyasının İnformasiya Texnologiyaları ixtisasının 3-cü kurs tələbəsiyəm. Azərbaycan Respublikası Mərkəzi Bankında İT Helpdesk üzrə təcrübə proqramında iştirak etmişəm.
Təcrübə zamanı akademiyada öyrəndiyim nəzəri bilikləri real iş mühitində tətbiq etməklə yanaşı, istifadəçilərə texniki dəstək göstərmək və problemləri vaxtında həll etmək bacarığımı inkişaf etdirdim. Eyni zamanda, komanda daxilində effektiv əməkdaşlıq, vaxtın idarə olunması və peşəkar kommunikasiya kimi yumşaq bacarıqlarımı da əhəmiyyətli dərəcədə artırdım. Bu təcrübə mənə yalnız texniki deyil, həm də insanlarla düzgün ünsiyyət qurmaq və stresli vəziyyətlərdə soyuqqanlı qalmaq bacarıqlarını mənimsəməkdə kömək oldu.
Bu təcrübə gələcək karyeram üçün böyük motivasiya yaratdı və IT sahəsində biliklərimi daha da gücləndirdi.
Azərbaycan Respublikası Mərkəzi Bankının əsas dəyərləri – dürüstlük, cavabdehlik və inkişaf – mənim də iş prinsipimə çevrildi. Təcrübə müddətində hər zaman məsuliyyətli və şəffaf olmaq, qarşıma qoyulan tapşırıqları dəqiq və vaxtında yerinə yetirmək üçün çalışdım. Eyni zamanda, davamlı öyrənmə və özümü inkişaf etdirmə məqsədi mənə əlavə stimul verdi.
Təcrübə müddətində mənə göstərdiyiniz dəstək və imkanlara görə bütün rəhbərliyə təşəkkürümü bildirirəm.
- Elmina Əliyeva
Mən, Elmina Əliyeva ADA Universitetində İqtisadiyyat ixtisası üzrə 4-cü kurs tələbəsiyəm. Həmişə nəzəri biliklərimi praktik təcrübə ilə tamamlamanın vacib olduğunu düşündüyüm üçün Mərkəzi Bankın təcrübə proqramına müraciət etdim. Mənim üçün bu, həm peşəkar, həm də şəxsi inkişaf baxımından böyük fürsət idi.
Proqram başlamazdan əvvəl yeni bacarıqlar əldə edəcəyimə əmin idim. Amma ilk gündən məni ən çox təəccübləndirən kollektivin bizə göstərdiyi səmimiyyət və dəstək oldu. Qısa zamanda özümü komandanın bir hissəsi kimi hiss etdim.
Təcrübə müddətində əsas işim şöbəmizə aid məlumatların təhlil edilməsi və hesabatların hazırlanmasında kömək etmək idi. Bununla yanaşı, beynəlxalq təcrübənin öyrənilməsi və daxili təqdimatlarda iştirak mənim üçün çox faydalı oldu. Bu prosesdə analitik bacarıqlarımı inkişaf etdirdim, vaxtı daha düzgün idarə etməyi və yazılı ünsiyyət bacarıqlarımı gücləndirdim. Təcrübə zamanı həmçinin digər departamentdəki təcrübəçilər ilə iqlim risklərinin maliyyə sabitliyinə təsiri mövzusunda araşdırma aparmaq imkanı qazandım. Bu araşdırma çərçivəsində beynəlxalq nümunələri öyrənərək onların Azərbaycan üçün tətbiq imkanlarını təhlil etdik.
Mentorum və iş yoldaşlarım hər zaman dəstək göstərdilər, onların bilik və təcrübələrindən çox şey öyrəndim. Mənim üçün ən dəyərli məqamlardan biri Mərkəzi Bankın dinamik, peşəkar və öyrənməyə açıq mühitdə işləmək fürsəti idi.
Mənim üçün ən yaddaqalan hadisə isə hazırladığım tədqiqat nəticələrini şöbə əməkdaşları ilə paylaşmağım oldu. Fikirlərimin maraqla qarşılanması və müzakirələrə səbəb olması mənə böyük motivasiya verdi.
Bu təcrübə mənim gələcək karyera planlarımda istiqamət qazandırdı və iqtisadi tədqiqat sahəsində çalışmağım üçün güclü motivasiya verdi. Gələcək təcrübəçilərə tövsiyəm odur ki, seçildiyi departamentdə hər bir əməkdaş ilə ünsiyyət qurub yeni bir şey öyrənməyə daim açıq olsunlar.
Mənə bu fürsəti yaratdığı üçün Mərkəzi Banka və bütün əməkdaşlara minnətdaram. Bu təcrübə mənim üçün peşəkar həyatda böyük bir addım oldu.
- Elnur Babayev
Mən, Elnur Babayev Azərbaycan Dövlət İqtisad Universitetində Maliyyə ixtisası üzrə 4-cü kurs tələbəsiyəm. Hər zaman ölkənin maliyyə sabitliyinə töhfə verən Mərkəzi Bank kimi nüfuzlu bir qurumda təcrübə keçmək istəmişəm. Bu arzumu reallaşdırmaq üçün Mərkəzi Bankın “Maliyyəçisən” təcrübə proqramına müraciət etdim.
Proqrama başlamazdan əvvəl düşünürdüm ki, burada yalnız nəzəri biliklərin praktikada tətbiqini öyrənəcəm. Amma ilk gündən etibarən gördüm ki, bu təcrübə həm də mənə iş mühiti, komanda ilə əməkdaşlıq və qərarvermə prosesləri barədə geniş anlayışlar qazandıracaq. Xüsusilə, əməkdaşların səmimiyyəti və dəstəyi məni çox təəccübləndirdi.
Təcrübəmi Kapital bazarı fəaliyyətinə dair siyasət və tənzimləmə departamentinin Prudensial siyasət şöbəsində keçirdim. Burada əsas vəzifəm Azərbaycanda kapital bazarının mövcud vəziyyətini təhlil etmək, bu sahədə beynəlxalq təcrübəni araşdırmaq, mövcud boşluqları taparaq ona uyğun təkliflər vermək idi. Eyni zamanda, şöbənin müxtəlif layihələrinə qoşulmaq, daxili sənədlərin hazırlanmasına kömək etmək imkanım oldu. Bu müddət ərzində həm kapital bazarları haqqında biliklərimi dərinləşdirdim, həm də analitik düşüncə, vaxtın düzgün idarə olunması və detallara diqqət kimi bacarıqları inkişaf etdirdim.
Komandamız çox mehriban və peşəkar idi. Mentorum və digər əməkdaşlar mənə daim dəstək oldular, suallarıma səbrlə cavab verdilər və inkişafım üçün tövsiyələr verdilər. Mərkəzi Bankın sistemli, nizamlı və öyrənməyə təşviq edən mühiti məni xüsusilə cəlb etdi.
Ən yaddaqalan anım, şöbədə apardığım təhlilin rəhbərliyə təqdim olunaraq müzakirəyə çıxarılması oldu. Öz töhfəmin nəticəsini görmək mənə böyük motivasiya verdi.
Bu təcrübə mənim peşəkar karyerama daha aydın baxmağıma səbəb oldu. Gələcəkdə də maliyyə sektorunda çalışmaq və dəyər yaratmaq istəyirəm. Yeni təcrübəçilərə tövsiyəm: hər anı öyrənmək fürsəti kimi dəyərləndirin və təşəbbüskar olun.
Bu fürsəti yaratdığı üçün Mərkəzi Banka və bütün komanda üzvlərinə təşəkkür edirəm.
- Esma Ramazanova
Mən, Esma Ramazanova Azərbaycan Dövlət İqtisad Universitetində Maliyyə ixtisası üzrə 4-cü kurs tələbəsiyəm. Maliyyə sahəsinə olan marağım və bu sahədə karyera qurmaq istəyim məni Mərkəzi Bankın təqdim etdiyi təcrübə imkanını dəyərləndirməyim üçün əsas stimul idi.
Proqramın peşəkar və şəxsi inkişafımda önəmli faydası olacağına inanırdım. İlk gündən peşəkar korporativ mühit və komandanın pozitiv qarşılaması məni həm təəccübləndirdi, həm də həvəsləndirdi.
Bu müddətdə əsas fəaliyyət istiqamətim maliyyə savadlılığı və peşəkar inkişaf üzrə bir sıra işlərin görülməsində proseslərə cəlb olunmaq, kreativliyimi ortaya qoyaraq verilən tapşırıqları yerinə yetirmək, beynəlxalq təcrübəni araşdırmaq və öyrənmək idi.
Eyni zamanda həm şöbəmin uzunmüddətli plan və layihələrinin təməlinin qoyulmasında dəstək üçün, həm də təqdim etməli olduğumuz yekun layihənin hazırlanmasına cəlb olunmuşdum. Hər birinin icrasında araşdırma, kreativ və analitik düşüncə qabiliyyətlərimi təkmilləşdirmək imkanım oldu.
İş yoldaşlarım və mentorlarım son dərəcə dəstəkçi və istiqamətverici oldular. Hər bir tapşırıqda mənə yol göstərmək, fikirlərimi dinləmək və inkişaf etməyim üçün şərait yaradıldı. Mərkəzi Bankın iş mühitində məni ən çox cəlb edən isə sistemli yanaşma, əməkdaşlıq ruhu və hər kəsin öz sahəsində peşəkarlıq nümayiş etdirməsi oldu.
Təcrübə müddəti boyunca dəyərli xatirə olaraq mənimlə qalacaq çox anlarım oldu. Bunlardan biri komandamla birgə yaradıcılıq tələb edən tapşırıqlar üzərində işləmək oldu ki, bu işimizə çoxlu maraq və əyləncə qatdı.
Bu təcrübə mənə maliyyə sahəsində gələcək karyeram üçün daha aydın istiqamət verdi və özümə olan inamımı artırdı. Mərkəzi Bankda əldə etdiyim bilik və bacarıqlar mənim üçün gələcək iş mühitinə hazırlıq baxımından böyük üstünlükdür. Gələcək təcrübəçilərə tövsiyəm odur ki, bu imkandan maksimum faydalanmağa çalışsınlar və hər anı öyrənmək fürsəti kimi dəyərləndirsinlər.
Mərkəzi Banka və bu proqramın təşkilatçılarına təşəkkür edirəm. Bu təcrübə mənim üçün həm peşəkar, həm də şəxsi inkişaf baxımından unudulmaz bir mərhələ oldu.
- Əli Mehdizadə
Mən, Əli Mehdizadə ADA Universitetində sonuncu kurs Riyaziyyat tələbəsiyəm. Həmişə öyrəndiyim nəzəri biliklərin real həyatda necə tətbiq olunduğunu görmək və maliyyə sahəsini yaxından tanımaq arzum vardı. Elə buna görə də Mərkəzi Bankın təcrübə proqramına qoşulmaq qərarına gəldim.
Proqrama başlamazdan əvvəl çox şey öyrənəcəyimi gözləyirdim, amma ilk günlərdə məni ən çox işçilərin səmimiyyəti və göstərilən diqqət heyran etdi. Komanda ruhu və peşəkarlıq isə gözlədiyimdən də yüksək idi.
Təcrübə boyunca əsas məsuliyyətim yeni proqram dili və framework öyrənmək, daha sonra isə bunları daxili proqramlarda tətbiq etmək idi. Həmçinin, layihələrdə texniki dəstək göstərmək, mövcud tətbiqləri yaxşılaşdırmaq və yeni funksionallıqları sınamaq imkanım oldu. Bu proses mənə həm nəzəri bilikləri praktikada tətbiq etməyi, həm də analitik düşüncə və vaxtı idarə etmə bacarıqlarımı inkişaf etdirməyi öyrətdi.
Mentorum və digər əməkdaşlar hər addımda mənə dəstək oldular, öz bilik və təcrübələrini bölüşərək öyrənmə prosesimi daha da maraqlı etdilər. Komandada açıq ünsiyyət və səmimi münasibət iş mühitini daha rahat və motivasiyaedici etdi. Mənim üçün ən cəlbedici tərəf isə daim öyrənməyə və yeniliklərə açıq mühit oldu.
Yaddaqalan anım isə Nahid İsayev ilə birlikdə yenidən yazdığımız layihəni departament qarşısında təqdim etməyimiz oldu. Orada öz əməyimizin nəticəsini görmək həm qürurverici, həm də çox motivasiyaedici idi.
Bu təcrübə mənim karyera planlarımda aydınlıq yaratdı və gələcəkdə texnologiya ilə maliyyəni birləşdirən layihələrdə işləmək istəyi oyatdı. Gələcək təcrübəçilərə isə tövsiyəm odur ki, hər fürsəti dəyərləndirsinlər, sual verməkdən çəkinməsinlər və öyrənməyə açıq olsunlar.
Mərkəzi Banka və bütün əməkdaşlara təşəkkür edirəm. Burada keçirilən təlimlər və departament daxili master classlar mənim peşəkar bacarıqlarımı artırmaqda böyük rol oynadı. Qazandığım bilik və bacarıqlar mənim üçün unudulmaz oldu və gələcəkdə də yolumu işıqlandıracaq.
- Əşrəf Qafarov
Azərbaycan Mərkəzi Bankında keçdiyim təcrübə mənim üçün sadəcə yay proqramı deyildi – bu, peşəkar yolumda dönüş nöqtəsi oldu. “Maliyyəçisən” layihəsinə qəbul olunduğum an hiss etdiyim sevinc və həyəcanı sözlə ifadə etmək çətindir. İlk gündən özümü yalnız öyrənən deyil, həm də dəyər qatan bir komandanın üzvü kimi hiss etdim.
Proqram çərçivəsində hər gün yeni biliklər qazanmaq, fərqli vəzifələri yerinə yetirmək və nəzəriyyəni praktikaya çevirmək imkanı əldə etdim. Qarşıma çıxan çətinliklər mənə problemlərə yaradıcı yanaşmağı, qərarların yalnız bu günü deyil, həm də sabahı formalaşdırdığını daha dərindən anlamağı öyrətdi. Bu müddət mənim analitik düşünmə və özünüifadə bacarıqlarımı gücləndirdi.
Ən dəyərli məqam isə insanlarla qurduğum münasibətlər oldu. Mentorların dəstəyi, həmkarların paylaşdığı təcrübələr və gördüyüm səmimi əməkdaşlıq mənim üçün böyük motivasiya idi. Burada ənənəvi iş mühitindən daha çox, hər kəsin öyrəndiyi və bir-birinə güvəndiyi bir atmosfer gördüm.
Bu təcrübə mənə göstərdi ki, uğur təkcə nəticəyə çatmaq deyil, yol boyu qazandıqlarındır. Mərkəzi Bankda öyrəndiklərim və qazandığım dostluqlar karyeramın gələcək addımları üçün güclü təməl olacaq. Mənim üçün bu proqram bir başlanğıcdır və inanıram ki, davamı daha da maraqlı olacaq.
“Bu təcrübə mənim üçün son deyil, yeni başlanğıcın ilk addımı oldu.”- Fatimə Kərimova
Mən, Fatimə Kərimova Azərbaycan Dövlət İqtisad Universitetində Biznesin İdarə Edilməsi ixtisası üzrə 4-cü kurs tələbəsiyəm. Mərkəzi Bankda təcrübə proqramına müraciət etməyimin səbəbi peşəkar iş mühitində təcrübə qazanmaq, yeni biliklər əldə etmək və real iş proseslərini yaxından öyrənmək idi.
Təcrübəyə başlamazdan əvvəl gözləntilərim iş mühitində səmərəli təcrübə qazanmaq və özümü daha da inkişaf etdirmək idi. İlk günlərdən bəri buradakı atmosfer nəinki gözləntilərimi qarşılamaqla kifayətləndi, hətta onları üstələdi.
Təcrübə müddətində əsas fəaliyyətim əməkdaşların inkişafı istiqamətində görülən işlərin icrası, təlim və tədbirlərin təşkili ilə bağlı idi. Təlimlərin hazırlanması, müvafiq materialların tərtib olunması və prosesin qiymətləndirilməsi kimi tapşırıqlarda iştirak edirdim. Eyni zamanda, tərəfimdən bank əməkdaşları üçün müasir tendensiyalara uyğun tədbirlərin görülməsi ilə bağlı ideyalar təklif olunmuşdur. Təcrübə müddətində təcrübəçilər üçün keçirilən “İnkişaf Günləri” və ümumi iş prosesi mənim yumşaq bacarıqlarımı daha da yaxşılaşdırdı. Həmçinin, qeyd edə bilərəm ki, Mərkəzi Bankın daxili sistemlərinə tam hakim olmuş və iş prosesində müvafiq qeydiyyat və hesabatların formalaşmasında fəal iştirak edirdim. Proqram boyunca öyrəndiklərim mənə İnsan resursları sahəsi ilə bağlı daha dərin və praktiki biliklər qazandırdı.
İş yoldaşlarım və mentorum ilə əməkdaşlıq çox xoş və səmimi oldu. Onların gülərüzlülüyü və mehribanlığı iş mühitində özümü rahat və dəyərli hiss etməyimə səbəb oldu. Mərkəzi Bankın iş mühiti həm peşəkar, həm də insani dəyərlərə böyük önəm verir, bu da məni çox cəlb etdi.
Təcrübə müddətində ən yaddaqalan an təcrübəçi həmkarlarımla birgə uğurla təşkil etdiyimiz layihə işi oldu, bu mənə kollektiv işin gücünü bir daha göstərdi.
Bu təcrübə mənim karyera planlarıma böyük təsir göstərdi; gələcəkdə İnsan resursları sahəsində daha çox təcrübə toplamaq və inkişaf etməyi planlaşdırıram. Gələcək təcrübəçilərə isə məsləhətim budur ki, mütləq “Maliyyəçisən” proqramına müraciət edib fürsətdən yararlansınlar, bu təcrübə dəyərli və faydalıdır.
Təşəkkür edirəm, bu təcrübə yaddaqalan oldu!
- Fərid Rza
Mən, Fərid Rza Azərbaycan Texniki Universitetində magistr pilləsi üzrə İnformasiya təhlükəsizliyi ixtisasında 2-ci kurs tələbəsiyəm. Yay dönəmində hər hansı sıradan bir şirkətdə işləməkdənsə, Mərkəzi Bank kimi önəmli bir təşkilatda təcrübə keçməyi üstün tutdum.
Təcrübəyə başlamadan öncə fikirləşirdim ki, bu təcrübə dönəmi və iş prosesi mənə çox ağır gələcək, lakin qarşılaşdığım mühit, iş prosesi elə olmadı. Artıq ilk gündən iş prosesinin mənə izah olunması və göstərilməsi üzərimdən o çətinlik düşüncəsini və hissini aradan qaldırdı. İş mühitində ən çox diqqətimi çəkən isə burda illərin təcrübəsini daşıyan bir sıra əməkdaşların bizi özlərindən biri kimi görmələri və səmimi davranışları idi.
Mənim əsas vəzifəm Data departamentinin Data mühəndisliyi şöbəsində tapşırıqların yerinə yetirilməsi, məlumatların təhlili, emalı, köçürülməsi və bütün bu proseslərə nəzarət idi. Bu prosesdə biliklərimi real mühitdə tətbiq etmək imkanım oldu.
Bu müddət zərfində Mərkəzi Bankın digər təcrübəçilərdən ibarət bölüşdürülmüş 6 nəfərlik komandalarından birində sahəm üzrə olan layihənin hazırlanmasına dair töhfə verdim. Bu layihə dönəmində təşkilatçılıq, analitik düşüncə, vaxtın idarə olunması və layihə idarəçiliyi üzrə olan bacarıqlarımı daha da inkişaf etdirdim.
Təcrübə müddətinin həm rahat, həm də öyrədici keçməsində mentorumla birlikdə digər əməkdaşların da böyük dəstəyini gördüm. Mənim üçün ən xüsusi an gördükləri işə məni də dəvət etmələri və birlikdə çalışmağı təklif etdikləri an idi.
Bu təcrübə müddəti mənim öz karyera yolumda bir növ öz yolumu təyin etməyə, verdiyim qərarların nə qədər düzgün olduğunu anlamağa və həyatımda bir dönüş nöqtəsi olmağa kömək etdi.
Gələcəkdəki təcrübəçilərə verə biləcəyim ən önəmli tövsiyə isə odur ki, şansların, fürsətlərin gəlməyini gözləməsinlər, həmin şans və fürsətləri özləri yaratsınlar.
Bütün bu imkanlardan yararlanmağa kömək etdiyi üçün Mərkəzi Banka və bu yolda əziyyəti olan digər bütün əməkdaşlara öz dərin təşəkkürlərimi bildirirəm.- Fuad Ataşov
Mən Fuad Ataşov, Azərbaycan Dövlət Neft və Sənaye Universiteti Sabah qruplarında Kompüter mühəndisliyi ixtisası üzrə 3-cü kurs tələbəsiyəm. Həmişə ölkənin aparıcı qurumlarından birində, real iş mühitində İT sahəsində biliklərimi sınamaq və inkişaf etdirmək istəyirdim. Bu məqsədlə də Mərkəzi Bankın təcrübə proqramına maraqla müraciət etdim.
Təcrübəyə başlamadan əvvəl düşünürdüm ki, daha çox nəzəri biliklər üzərində işləyəcəyəm. Amma ilk gündən işçilərin səmimi münasibəti və mənə göstərilən dəstək gözləntilərimdən çox artıq oldu. Ən çox diqqətimi çəkən isə iş mühitində yüksək peşəkarlıqla yanaşı, komanda ruhunun güclü olması idi.
Mənim əsas tapşırıqlarım İT dəstək üzrə gündəlik əməliyyatlarda iştirak etmək, istifadəçilərin müraciətlərinə cavab vermək və sistemlərin düzgün işləməsini təmin etmək idi. Bu prosesdə həm texniki bacarıqlarımı sınadım, həm də yeni biliklər öyrəndim. Xüsusilə, şəbəkə problemlərinin həlli, system ve proqram təminatlarının quraşdırılması və təhlükəsizlik qaydalarına əməl edilməsi ilə bağlı təcrübə qazandım.
Bundan əlavə, iştirak etdiyim layihələrdə həm müstəqil işləməyi, həm də komandada əməkdaşlığı öyrəndim. Bu işlər mənə vaxtın düzgün idarə olunması, məsuliyyətli davranmaq və operativ qərar vermə bacarıqları qazandırdı.
Komandamızda əməkdaşlıq mühiti çox xoş idi. Mentorlarım hər zaman suallarıma cavab verdi, istiqamət göstərdi və təcrübəmi daha faydalı etməyə çalışdı. Mərkəzi Bankda texnologiyalara verilən önəm və daim öyrənməyə açıq mühit məni xüsusilə cəlb etdi.
Bu təcrübə mənim karyera seçimimə böyük təsir etdi. Artıq əminəm ki, gələcəkdə kibertəhlükəsizlik və İT sahəsində ixtisaslaşmaq istəyirəm. Gələcək təcrübəçilərə məsləhətim odur ki, aktiv olsunlar, hər fürsətdən öyrənməyə çalışsınlar və sual verməkdən çəkinməsinlər.
Mənə bu imkanı yaratdığı üçün Mərkəzi Banka və bütün əməkdaşlara səmimi təşəkkürümü bildirirəm.
- Gözəl Səidova
Mən, Gözəl Səidova Azərbaycan Dövlət İqtisad Universitetində Maliyyə ixtisası üzrə 4-cü kurs tələbəsiyəm. Təcrübə qazanmaq, yenilikləri müşahidə etmək və korporativ mühitlə tanış olmaq hər zaman prioritetlərim içərisində olub. Mərkəzi Bankın “Maliyyəçisən” təcrübə proqramına isə bütün bu prioritetlərimi əhatə edəcəyini düşündüyüm üçün müraciət etdim.
Proqramdan əsas gözləntilərim təbii ki, yeni biliklər öyrənmək idi, həmçinin iş mühitinin çox ciddi olacağına inanırdım. Lakin, ilk iş günündən etibarən kollektivin xoş rəftarı, hər zaman içlərindən biri kimi olduğumu hiss etdirmələri məni müsbət olaraq ən təəccübləndirən məqam olmuşdu.
Sığorta fəaliyyətinin tənzimlənməsi şöbəsində bir təcrübəçi kimi verilən tapşırıqları yerinə yetirir, məlumatlar əsasında sığorta əsaslı təhlillər aparır və maraq dairəm daxilində olan nüansları öyrənməyə çalışırdım.
Hər məqamda mentorum və digər əməkdaşlarla müzakirələr edərək məsləhət alırdım. Bu da öz növbəsində fikirlərimə daha doğru istiqamət verirdi. Öz təcrübələri ilə inkişafıma dəstək olurdular.
Təcrübəm boyunca ən yaddaqalan an isə “World Bank” əməkdaşları ilə olan görüşlərdə iştirak etməyim və beynəlxalq təcrübə ilə tanış olma şansını əldə etməyim idi. Həmçinin departament və şöbə ilə fasilə zamanlarında keçirdiyimiz əyləncəli vaxtları da buna misal çəkə bilərəm.
Ümumiyyətlə, təcrübə proqramı mənə yeni baxış bucağı və biliklər qazandırdı hansı ki karyeramı doğru şəkildə qurmaq və inkişaf etdirmək üçün mənə görə böyük əhəmiyyət kəsb edir.
Bütün qeyd olunan məqamların yaranmasına şərait yaratdığı üçün Mərkəzi Banka və bütün əməkdaşlara, xüsusilə əziz mentoruma minnətdarlığımı bildirirəm.
- Həcər Məlikova
Mən, Həcər Məlikova Bakı Dövlət Universitetinin SABAH Qruplarının hüquqşünaslıq ixtisasının 4-cü kurs tələbəsiyəm. Əvvəllər bu sahəyə marağım olmasa da, universitetdə “sığorta hüququ” fənnini keçdikdən sonra məndə bu sahəyə qarşı böyük maraq və həvəs yarandığı üçün Mərkəzi Bankın “Maliyyəçisən” təcrübə proqramı çərçivəsində “Sığorta bazarının hüquqi təminatı” şöbəsinə müraciət etdim.
Müraciət etmiş minlərlə şəxs arasından seçilən gənclərdən biri olduğumu öyrəndiyim andan bəri bu proqramın mənim şəxsi və peşəkar inkişafım üçün əvəzolunmaz bir təcrübə olacağına inanırdım, amma ilk gündən departamentdəki əməkdaşların bizə qarşı səmimi münasibəti və göstərdikləri dəstək gözləntilərimdən daha da yüksək oldu.
Təcrübə müddəti ərzində mentorumun göstərdiyi dəstək mənim üçün sözlərlə ifadə olunmayacaq dərəcədə böyük və dəyərli idi. Belə ki, mən, mentorumun dəstəyi ilə sığorta qanunvericiliyini dərindən araşdırdım, beynəlxalq təcrübədə sığorta sektorunu tənzimləyən müxtəlif aktlarla tanış oldum, fərqli sorğular və maraqlı layihələr üzərində işlədim, eləcə də normayaratma fəaliyyətini dərindən mənimsədim. Mentorumun böyük səbrlə və ətraflı formada suallarımı cavablandırması məni bu sahəni daha da dərindən öyrənməyə həvəsləndirirdi. Təsadüfi deyil ki, məndə bu sahəyə yaranmış böyük həvəs nəticəsində ilk məqaləmi məhz bu mövzuda yazmağa başladım.
Təcrübə müddətində elə bir gün yox idi ki, yeni nəsə öyrənmədən Mərkəzi Bankın binasını tərk edim, lakin düşünürəm ki, mənim üçün bu təcrübəni daha da özəl və unudulmaz edən departamentdəki əməkdaşların mənə qarşı yeni gəlmiş təcrübəçi kimi deyil, illərlə birlikdə çalışdığı əməkdaş kimi doğma münasibətləri oldu.
Mənim üçün ən yaddaqalan an departamentimizin əməkdaşları ilə nahar fasilələrində birlikdə keçirdiyimiz vaxt idi. Onların zəngin təcrübələrindən yararlanmaq və müxtəlif mövzularda maraqlı söhbətlər etmək mənim şəxsi inkişafım baxımından xüsusi əhəmiyyətə malik idi.
Bu təcrübə gələcək karyeram üçün bir istiqamət rolu oynadı və mən qərar verdim ki, sığorta sahəsində uğurlu bir hüquqşünas olaraq fəaliyyət göstərmək istəyirəm. Yay tətilini səmərəli şəkildə keçirərək şəxsi və peşəkar baxımdan inkişaf etmək istəyən hər kəsə bu proqramda iştirak etməyi tövsiyə edirəm.
Mənə bu fürsəti yaratdığı üçün Mərkəzi Banka və bütün əməkdaşlara təşəkkür edirəm.
- Xanım Hüseynli
“Maliyyəçisən” təcrübə proqramına ilk müraciətim uğurlu olmasa da, ikinci cəhdimdə güclü rəqabətli seçim mərhələsini keçərək proqramda iştirak edən azsaylı namizədlərdən biri olmaq şansını qazandım. Bu fürsət mənim üçün böyük motivasiya və çox dəyərli bir imkan idi.
Mərkəzi Bankda keçirdiyim iki aylıq təcrübə həyatımın ən önəmli mərhələlərindən biri oldu. Bu müddət o qədər maraqlı və faydalı keçdi ki, vaxtın necə sürətlə ötdüyünü belə hiss etmədim. Rezolyusiya departamentində olduğum ilk gündən bəri mentorum və digər bütün əməkdaşların isti, səmimi və qayğıkeş münasibəti sayəsində qısa müddətdə kollektivə adaptasiya ola bildim. Departamentin fəaliyyət istiqamətləri, iş prinsipləri və prosesləri ilə yaxından tanış olmaqda və öyrənməkdə yalnız mentorum deyil, digər əməkdaşlar da mənə daima dəstək oldular.
İş prosesində əldə etdiyim bütün biliklər və bu dəyərli təcrübə gələcəkdə karyeramı peşəkar mütəxəssis kimi qurmaq istədiyim maliyyə sahəsində mənə yol göstərdi və bu istiqamətə daha da həvəsləndirdi. Eyni zamanda burada olduğum müddətdə karyera seçimləri barədə peşəkar əməkdaşlardan önəmli məsləhətlər aldım.
Bu təcrübə mənə yalnız güclü bilik və bacarıqlar qazandırmadı, həm də həyatımda dəyərli iz buraxan gözəl dostluqlar bəxş etdi. Burada tanış olduğum bütün təcrübəçi dostlarımla bundan sonra da əlaqələrimi davam etdirəcəyəm.
Nəhayət, əminliklə deyə bilərəm ki, “Maliyyəçisən” mənim üçün təkcə təcrübə deyil, həm də böyük inkişaf və unudulmaz xatirələrin mənbəyi oldu.
- Xəqani Rəhimli
Mən, Xəqani Rəhimli ADA Universitetində Dövlət və İctimai Münasibətlər ixtisası üzrə 4-cü kurs tələbəsiyəm. İqtisadi dərslərimizin birində mərkəzi bankların iş prosesi bu sektora olan marağımı çəkmişdi və “Maliyyəçisən” təcrübə proqramı bu marağımı reallaşdırmaq üçün böyük bir addım idi.
Təcrübəyə başlamazdan əvvəl düşünürdüm ki, inanılmaz sərt və ciddi bir iş mühiti olacaq. Amma ilk gündən qarşılanma, işçilərin səmimiliyi və mənə göstərilən diqqət gözləntilərimi aşdı və qərəzimi qırdı. Ən önəmli faktor isə hər kəsin bir-birinə hörmətlə yanaşması və açıq ünsiyyət mühiti oldu.
Kommunikasiya şöbəsində təcrübəçi kimi əsas fəaliyyətlərim rəqəmsal və ənənəvi kommunikasiya üsullarından istifadə etmək və aktiv olaraq şöbənin proseslərinə kömək etmək idi. İstər sosial şəbəkələrlə işləmək, istərsə media nümayəndələriylə işləmək, istərsə də kommunikasiya üçün məzmunların yaradılmasında iştirak etmək olsun, bir çox yeni biliklər əldə etdim. Həm təcrübə proqramının bizim üçün maliyyə sektorunda yeniliklərlə bağlı layihəsində iştirakım, həm də öz şöbəmin fərqli layihələrində fəaliyyətim mənə yumşaq və texniki bacarıqlarımı itiləməkdə çox kömək etdi.
Başda mentorum və şöbə rəisim olmaqla digər əməkdaşlarla ünsiyyət çox rahat və dəstəkləyici idi. Onların təcrübəsi və yanaşmaları mənim öyrənmə prosesimi daha da zənginləşdirdi. Bankın istiqanlı, peşəkar və eyni zamanda öyrənməyə açıq mühiti məni çox ruhlandırdı.
Ən yaddaqalan anım isə keçirdiyimiz mətbuat konfransı idi. Konfrans boyunca iştirakım, şöbəmizdə gedən proseslər və ümumi nəticə məni kommunikasiya sahəsinə bir daha cəlb etdi.
Bu təcrübə mənim karyera planlarımı daha da aydınlaşdırdı və kommunikasiya sahəsində çalışmağa olan marağımı həqiqətən artırdı. Gələcək təcrübəçilərə tövsiyəm odur ki, fərqli təcrübələrə və şəxsi keyfiyyətlərə sahib insanlarla işləməyə və bu insanların fərqliliklərindən faydalanmağa fokuslansınlar.
Mənə bu fürsəti yaratdığı üçün Mərkəzi Banka və bütün əməkdaşlara təşəkkür edirəm. Bu təcrübə mənim üçün unudulmaz oldu.
- İsa Heydərov
Mən, İsa Heydərov Azərbaycan Dövlət İqtisad Universitetində Maliyyə ixtisası üzrə sonuncu kurs tələbəsiyəm. “Maliyyəçisən” təcrübə proqramına qəbul olunduğumu öyrəndiyim anı heç vaxt unutmaram - içimdə həm sevinc, həm də böyük məsuliyyət hissi vardı. Mərkəzi Bank kimi nüfuzlu bir qurumda iş təcrübəmi qazanmaq mənim üçün əsl fürsət idi. Bu proqram mənə təkcə peşəkar biliklər yox, həm də özüm haqqında yeni anlayışlar verdi.
Təcrübəmi Bazar Davranışlarının tənzimlənməsi departamentində keçdim. Burada maliyyə bazarlarının ədalətli və şəffaf işləməsi üçün görülən işlərlə, eləcə də istehlakçıların hüquqlarının qorunması istiqamətində aparılan tədbirlərlə yaxından tanış oldum. Öyrəndiklərim sadəcə nəzəri biliklər deyildi - real vəziyyətlər üzərində düşünmək, analiz etmək və qərar vermək bacarığım xeyli inkişaf etdi. Bu müddət ərzində maliyyə sahəsinə baxışım daha da genişləndi.
Proqramın mənim üçün ən dəyərli hissələrindən biri komanda işi oldu. Fərqli universitetlərdən gələn gənclərlə birgə işləmək, fikir mübadiləsi aparmaq və ortaq layihələr üzərində çalışmaq həm öyrədici, həm də çox maraqlı idi. Hər birimizin öz güclü tərəfləri vardı və onları birləşdirərək ortaya gözəl nəticələr çıxara bildik. Bu prosesdə həm yeni dostlar qazandım, həm də komanda ruhunun gücünü hiss etdim.
“Maliyyəçisən” mənə bir daha sübut etdi ki, seçdiyim sahə mənə həqiqətən ilham verir. Burada qazandığım biliklər, öyrəndiyim bacarıqlar və tanış olduğum insanlar mənim üçün böyük dəyər daşıyır. Bu təcrübə mənə özümə olan inamı daha da artırdı və gələcək karyera yolumda daha əmin addımlarla irəliləməyə motivasiya verdi.
- Lamiyə Fətiyeva
Mən, Lamiyə Fətiyeva Azərbaycan Dövlət İqtisad Universitetinin Beynəlxalq İqtisadiyyat Məktəbi fakültəsində İqtisadiyyat ixtisası üzrə 3-cü kurs tələbəsiyəm. Hər zaman ölkədə maliyyə sahəsində böyük təsirə malik qurumlardan birində işləmək arzusunda olmuşam. Buna görə də Mərkəzi Bankın “Maliyyəçisən” təcrübə proqramına qeydiyyat açılan zaman mütləq müraciət etməli olduğuma qərar verdim.
Təcrübə müddətinə başlamazdan əvvəl də Mərkəzi Bankda öyrənəcəyim çox şey olduğunu düşünürdüm, lakin buradakı iş mühiti, komandadakı səmimiyyət gözləntilərimin qat-qat üstündə idi. Bu səbəbdən proqramda olduğum müddətdə komanda ruhu və işbirliyi ən çox diqqətimi çəkən məqam oldu.
Mənim əsas vəzifəm Ödəniş xidmətləri və ödəniş sistemlərinin inkişafı və siyasəti şöbəsində verilən tapşırıqları yerinə yetirmək, əlavə olaraq beynəlxalq təcrübənin araşdırılmasında iştirak etmək idi. Tapşırıqları yerinə yetirən zaman bu sahədə bilik və bacarıqlarımın artdığını hiss etmək məndə qürur hissi oyadırdı.
Hər bir tapşırıqda, araşdırmada mentorum daim mənə dəstək oldu və düzgün istiqamət seçməyim üçün rəylər verdi. Həmçinin, departamentin digər əməkdaşları da öz dəstəklərini əsirgəmədilər. Mərkəzi Bankın pozitiv və innovativ komandası məni bu müddətdə çox ruhlandırdı.
Ən yaddaqalan anım isə bir əməkdaşın doğum gününü təbrik etmək üçün məni də şöbənin bir üzvü olaraq öz aralarına dəvət etmələri oldu. Həmin an özümü çox xoşbəxt hiss edirdim.
Bu təcrübə mənim həm karyera seçimlərimdə, həm də şəxsi inkişafımda çox böyük rol oynadı və bu barədə vacib qərarları seçməkdə kömək oldu. Əminəm ki, gələcək karyeram üçün “Maliyyəçisən” proqramı güclü bünövrə olacaq. Gələcək təcrübəçilərə tövsiyə edərdim ki, çətinliklər zamanı ruhdan düşməsinlər və hər zaman öyrənməyə açıq olsunlar.
Bu fürsəti yaratdığı üçün Mərkəzi Banka və onun dəyərli əməkdaşlarına təşəkkür edirəm.
- Murad Hacıyev
Mən, Murad Hacıyev ADA Universitetində Hüquqşünaslıq ixtisası üzrə 4-cü kurs tələbəsiyəm. Maliyyə hüququna xüsusi marağım olduğundan “Maliyyəçisən” proqramının keçiriləcəyini görən kimi dərhal müraciət etmək qərarına gəldim. Daim inkişaf edən və normayaratma fəaliyyətini həyata keçirən maliyyə bazarlarının hüquqi təminatı departamentində təcrübə keçmək mənim üçün həm qürurverici, həm də müxtəlif bacarıqlar qazanmaq baxımından çox effektiv oldu.
Proqrama başlamazdan əvvəl gözləntilərim əsasən nəzəri biliklərimi tətbiq etmək idi. Amma ilk gündən qarşılandığım səmimiyyət, dəstək və öyrənməyə açıq mühit gözləntilərimdən qat-qat artıq oldu. Ən çox təəccübləndiyim isə iş proseslərinin nə qədər sistemli və peşəkar şəkildə qurulması idi.
Təcrübə müddətində əsas tapşırıqlarım “Ödəniş xidmətləri və ödəniş sistemləri haqqında” Qanunun mənimsənilməsi, sorğulara həm qanun, həm də ödəniş sektorunda qəbul olunan normativ xarakterli aktlar təhlil edilməklə cavabların hazırlanması və beynəlxalq təcrübəni araşdırmaqla ödəniş sektorunda törədilə biləcək pozuntuları İnzibati Xətalar Məcəlləsinə əlavə edilməsi üçün təkliflər hazırlanmasından ibarət idi. Bundan əlavə, bizə verilmiş xüsusi layihə - “Risk Əsaslı Nəzarətin data əsaslı yanaşma ilə optimallaşdırılması” üzərində işləmək mənim üçün çox dəyərli təcrübə idi. Bu layihə həm analitik bacarıqlarımı gücləndirdi, həm də komanda ilə birgə işləməyin məsuliyyətini hiss etdirdi. Vaxtın düzgün idarə olunması, təqdimat hazırlamaq və fikirlərimi daha aydın ifadə etmək kimi bacarıqlarımı da bu prosesdə inkişaf etdirmək imkanım oldu..
Mentorum və həmkarlarım hər addımda məni istiqamətləndirdi, təcrübələrini bölüşdülər. Mərkəzi Bankda gördüyüm ən dəyərli cəhət isə yüksək peşəkarlığın komanda ruhu ilə balanslaşdırılması oldu. Bu mühit mənim üçün həm faydalı, həm də pozitiv idi.
Mənə bu imkanı yaratdığı üçün Mərkəzi Banka və bütün əməkdaşlara təşəkkür edirəm.
- Murad Hüseynov
Mən, Murad Hüseynov Azərbaycan Dövlət İqtisad Universitetində “Economics” ixtisası üzrə bakalavr təhsilimi tamamlamışam. Qarşıdakı aylarda Trier Universitetində “Sustainability Management and Economics” üzrə magistr təhsilinə başlayacağam. Mərkəzi Bankda təcrübə proqramına müraciət etməyimin əsas səbəbi ölkənin ən nüfuzlu maliyyə qurumunda təcrübə qazanmaq və gələcək karyeram üçün faydalı biliklər əldə etmək idi.
Təcrübəyə başlamazdan əvvəl gözləntilərim əsasən nəzəri biliklərimi real iş mühitində sınamaq idi. İlk günlərdə məni ən çox sevindirən isə əməkdaşların biz təcrübəçilərə səmimi münasibəti və Bankın iş mühitindəki yüksək peşəkarlıq oldu.
Mən Satınalmalar departamentinin Müsabiqəli satınalma şöbəsində fəaliyyət göstərdim. Əsas vəzifəm gündəlik satınalma proseslərində komandaya dəstək olmaq idi. Bununla yanaşı dövlət satınalmaları prosedurları, tender qaydaları və şəffaflıq prinsipləri haqqında biliklər qazandım. Xüsusilə belə böyük bir qurumun satınalma proseslərini yaxından görmək və orada iştirak etmək mənim üçün çox dəyərli oldu.
Şöbənin işlərinə qoşulmaqla müxtəlif sənədlərin hazırlanması və müqayisə aparılması işlərində iştirak etdim. Bu, mənim diqqətlilik, məsuliyyət və analitik təhlil bacarıqlarımı gücləndirdi. Təcrübə müddətində vaxtın düzgün idarə olunmasının və dəqiqliyin iş prosesində nə qədər vacib olduğunu daha yaxşı anladım.
Mentorum, şöbə rəisim və digər əməkdaşlarla iş çox faydalı oldu. Onların dəstəyi, istiqaməti və təcrübələrini bölüşməsi mənim öyrənmə prosesimi daha maraqlı və rahat etdi.
Mənim üçün ən yaddaqalan anlardan biri rəhbərliklə olan görüşlərdə təcrübəçilərin fikirlərinin dinlənməsi idi. Bu, bizə də dəyər verildiyini göstərdi və özünə inamımızı artırdı.
Bu təcrübə sözsüz ki, mənim karyera planlarımda mühüm rol oynayacaq. Satınalma sahəsində qazandığım biliklər magistr təhsilimdə və gələcək peşəkar fəaliyyətimdə mənim üçün böyük üstünlük yaradacaq. Gələcək təcrübəçilərə tövsiyəm – hər fürsəti öyrənmək üçün istifadə etsinlər, təşəbbüskar olsunlar və Mərkəzi Bankın mühitini doğrudan da hiss etsinlər.
Sonda Mərkəzi Banka bu fürsəti yaratdığı üçün təşəkkür edirəm. Xüsusilə Departament direktoruna, şöbə rəisinə, mentoruma və bütün əməkdaşlara dəstəklərinə görə minnətdaram. Burada qazandığım dəyərlər mənim üçün sadəcə iş təcrübəsi deyil, həm də həyat dərsi oldu və inanıram ki, bir ömür boyu unudulmayacaq.
- Nahid İsayev
Mən, Nahid İsayev Azərbaycan Dövlət Neft və Sənaye Universitetinin İnformasiya Texnologiyaları ixtisasının 3-cü kurs tələbəsiyəm.
Mərkəzi Banka olan marağım və bank sektorunun İT sahəsində təcrübə qazanma istəyimə əsasən “Maliyyəçisən” təcrübə proqramına müraciət etdim. Təcrübəyə başlamazdan öncə, burada işlərin rəhbər və işçi münasibətləri əsasında irəliləyəcəyini düşünürdüm. Lakin təcrübəyə başladığım ilk gündən etibarən çox səmimi komanda və dost münasibəti ilə qarşılaşdım. Bu, məni həm təəccübləndirdi, həm də sevindirdi. Burada olduğum dövr boyunca Mərkəzi Bankda istifadə edilən texnologiyaları öyrəndim və real layihə üzərində tədbiq etdim. HÖP layihəsinə əlavə edilməyim sayəsində Backend sahəsində arxitekturanın qurulması, müasir texnologiyalardan istifadə və komanda işi kimi bir çox bacarıqlar qazandım. Mentorumla olan dost münasibətim və onun işləmə prinsipi mənə gələcəkdə mentorluq etsəm necə davranmalı olduğum barədə aydın təsəvvür yaratdı. Mərkəzi Bankın hər bir strukturunun bir-biri ilə əlaqəli işləməsi və dəstəkləməsi ən yaxşı xüsusiyyətlərdəndir.Təcrübə müddətim boyunca yaranmış hər bir çətinlikdə, komandanın hər bir üzvünün mənə dəstək göstərməsi və suallırmı cavablandırması məni işləmək üçün ruhlandırırdı. Buna görə də burada işləmək mənim üçün əvəzedilməz təcrübə idi.
Təcrübənin bu qədər keyfiyyətli olması mənə əminliklə deməyə əsas verir ki, bura qəbul edilən hər bir tələbə xüsusidir və onlara xüsusi münasibət göstərilir.
Bu əvəzolunmaz fürsəti yaratdığı üçün Mərkəzi Bank heyətinə təşəkkürlərimi bildirirəm.
- Nuray Mirzəyeva
Mən, Nuray Mirzəyeva Azərbaycan Dövlət İqtisad Universitetində Sosial iş ixtisası üzrə 3-cü kurs tələbəsiyəm. Bir öncəki ildən olan təcrübəçilərdən eşitdiklərim sayəsində Mərkəzi Bankda təcrübə keçməyi arzulayırdım. Hətta onların Instagram üzərindən paylaşılan bir postunu özümə motivasiya olaraq saxlayırdım. Təcrübəyə başlamazdan əvvəl proses haqqında müəyyən qədər məlumatım var idi. İnkişafım üçün yaxşı bir şans olduğunu bilirdim. Lakin yenə də gözləntilərimin üstündə bir təcrübə oldu. Məni ən çox təəccübləndirən buradakı əməkdaşların həqiqətən səmimi olması və həqiqətən inkişafımızı istəmələri idi. Mərkəzi Bankda əsas tapşırıqlarım təcrübədə olduğum Müraciətlərin təhlili bölməsinin iş prosesini, hesabatların və sənədlərin hazırlanmasını öyrənmək idi. Təcrübə müddəti dövründə İstehlakçılarla İş departamentinin təcrübəçisi olaraq Qusar rayonunda səyyar qəbulda oldum və bu mənim üçün yaddaqalan bir təcrübə oldu. Layihə ərzində peşəkar ünsiyyət və analitik bacarıqlarımı daha da inkişaf etdirdim. Bu 2 ay ərzində iş yoldaşlarım və mentorum mənə hər bir mövzuda həqiqətən çox dəstək oldular, qayğı göstərdilər. Onlara bu səmimiyyətlərindən ötrü çox təşəkkür edirəm. Təcrübə proqramı ərzində mənim üçün əvəzedilməz və çox dəyərli insan oldular. Təcrübə müddətində mənim üçün ən çox yaddaqalan hadisələrdən biri isə “Dəyərli Anlar” festivalında iştirakım oldu. Orada çox xoş və əyləncəli vaxt keçirdim. Bu təcrübədən sonra özümə olan inamım daha da artdı, artıq gələcəyimə daha perspektivli baxıram və çox böyük işlərə imza ata biləcəyimi düşünürəm. Gələcək təcrübəçilərə burada olan anlarını yaxşı dəyərləndirmələrini, hər bir saniyəsindən faydalanmalarını məsləhət görürəm. Əlavə olaraq, artıq Mərkəzi Bankda olduqları üçün onları təbrik edir, çox şanslı olduqlarını bildirmək istəyirəm.
Sonda isə departament direktorum Murad müəllimə, Nərmin xanıma, iş yoldaşlarım Arzu xanıma, Nuranə xanıma, Yusif müəllimə və bütün HR komandasına öz zəhmətləri üçün təşəkkür edirəm!
Mərkəzi Bankda olduğum üçün çox şanslı idim!
- Orxan İsmayılov
Mən, Orxan İsmayılov 2025-ci ildə Azərbaycan Dövlət İqtisad Universitetinin (UNEC)-in SABAH qruplarından Mühasibat ixtisası üzrə məzun olmuşam. Həmişə Azərbaycanın maliyyə sektorunda nüfuzlu bir qurumda çalışmaq arzum olub. Bu səbəbdən Mərkəzi Bankın “Maliyyəçisən” təcrübə proqramına böyük həvəslə müraciət etdim.
Proqrama qəbul olunduğumda öyrənmək üçün böyük imkanlar əldə edəcəyimə inanırdım, lakin komandanın ilk gündən göstərdiyi səmimi qarşılanma və dəstək gözləntilərimi üstələdi. İş mühitindəki peşəkarlıq və güclü komanda ruhu məni xüsusilə sevindirdi.
Əsas vəzifəm Maliyyə bazarlarında əməliyyatlar departamentində tapşırıqları yerinə yetirmək, maliyyə bazarlarının təhlili və hesabatların hazırlanmasında iştirak etmək idi. Universitetdə öyrəndiyim nəzəri bilikləri praktikada tətbiq etmək və maliyyə təhlili bacarıqlarımı inkişaf etdirmək fürsəti qazandım.
Həmçinin, şöbə əməkdaşları ilə beynəlxalq maliyyə təcrübələrini öyrənmək və daxili müzakirələrdə iştirak etmək mənim üçün olduqca dəyərli oldu. Bu proses mənə analitik düşünmə, vaxtın effektiv idarə edilməsi və komanda ilə əməkdaşlıq kimi bacarıqlar qazandırdı.
Mentorum hər mərhələdə məni istiqamətləndirdi, komanda üzvləri isə təcrübələrini bölüşərək peşəkar inkişafıma töhfə verdi. Mərkəzi Bankın innovativ və öyrənməyə açıq mühiti məni olduqca motivasiya etdi.
Ən yaddaqalan anım bu təcrübədə qazandığım biliklər sayəsində “Gənclərin xarici ölkələrin nüfuzlu ali təhsil müəssisələrində təhsil almalarına dair 2022-2028-ci illər üçün Dövlət Proqramı”nın seçim mərhələsindən uğurla keçərək qalib olmağım oldu. Nəticədə magistr təhsilimi İrlandiyanın Trinity College Dublin universitetində maliyyə ixtisası üzrə davam etdirəcəm.
Bu təcrübə peşəkar inkişafım üçün möhkəm zəmin yaratdı. Gələcək təcrübəçilərə məsləhətim: hər fürsəti dəyərləndirin, öyrənməyə açıq olun və sual verməkdən çəkinməyin.
Mənə bu unudulmaz imkanı təqdim etdiyi üçün Mərkəzi Banka və bütün əməkdaşlara dərin təşəkkürümü bildirirəm.
- Rafiq Məmmədov
Mən, Rafiq Məmmədov Azərbaycan Dövlət Neft və Sənaye Universitetinin İnformasiya Texnologiyaları ixtisasının 3-cü kurs tələbəsiyəm.
Maliyyə texnologiyaları (FinTech) sahəsinə qlobal perspektivdən baxmaq, nəzarət çərçivəsindəki baxış bucağı ilə tanış olmaq və strateji qərarların necə qəbul edildiyi ilə daha yaxından tanış olaraq bilik və bacarıqlarımı genişləndirmək üçün “Maliyyəçisən” təcrübə proqramına müraciət etdim.
Təcrübəyə başlamazdan əvvəl əsas gözləntilərim praktiki biliklərimi artırmaq, real iş mühitində fintech sahəsində qarşılaşacağım çətinlikləri anlamaq, onların analiz və təhlil olunması prosesində yaxından iştirak etmək idi. İlk günlərdən qarşılaşdığım dinamik iş mühiti və dəyişikliklərə çevik reaksiya verilməsi məni təəccübləndirmişdi, çünki xəyalımızdakı statik Mərkəzi Bank mühiti bundan tamamilə fərqli idi.
Təcrübə müddətində əsas tapşırıqlarım fintech layihələrinin analizlərini aparmaq, təhlil etmək, bazar tendensiyalarını izləmək və araşdırmalar hazırlamaq idi. Açıq Bankçılıq və Açıq Maliyyə kimi layihələrdə iştirak edərək onların təhlili və inkişafı prosesində aktiv rol aldım. Bu müddət ərzində layihələrin və bazardakı tələblərin dinamikasını anlamaq, məlumatların necə araşdırılması və təhlil olunması barədə yeni biliklər əldə etdim. Həmçinin, komanda işi və vaxt idarəetməsi bacarıqlarım da xeyli inkişaf etdi.
İş yoldaşlarım və mentorlarla əməkdaşlıq çox səmimi və dəstəkləyici oldu. Onlar hər zaman suallarımı cavablandırmağa, bilik və təcrübələrini paylaşmağa hazır idilər. Mərkəzi Bankın iş mühitində məni ən çox cəlb edən, yüksək peşəkarlıq səviyyəsi və iş proseslərinin sistemli, dəqiq qurulması oldu. Eyni zamanda, ölkənin iqtisadi sabitliyində iştirak etməyin məsuliyyəti və əhəmiyyəti mənim üçün çox önəmli və motivasiyaedici idi.
Mənim üçün xüsusi anlardan biri layihələrimizdən birində kritik xarakterli sistemin dizaynında, iş axını prosesində biznes və texniki tərəfdən yaxından iştirak etməyim idi. Bu maraqlı və eyni anda çətin işdən sonra aldığım geridönüşlərdən sonra əmin oldum ki, bunun üçün göstərdiyim səy və diqqət dəyərli olub və komandanın uğuruna böyük töhfə vermişəm.
Bu müddətdə əldə etdiyim praktiki biliklər və real iş təcrübəsi gələcək karyeramda texniki liderlik və idarəetmə sahələrində özümü inkişaf etdirmək üçün aydın və məqsədyönlü istiqamət verdi. İş mühitində qarşılaşdığım müxtəlif vəziyyətlər və komandalarla əməkdaşlıq təcrübəsi, effektiv ünsiyyət, problem həlli və strateji düşüncə kimi vacib bacarıqları formalaşdırmaqda və inkişaf etdirməkdə mənə böyük dəstək oldu. Bundan yol alaraq gələcək təcrübəçilərə demək istəyirəm ki, hər fürsəti dəyərləndirin və öyrənməyə açıq olun, hər məsələyə müxtəlif baxış bucaqlarından baxmağa çalışın.
Təcrübə müddətində mənə dəstək olan bütün həmkarlarıma və mentorlarıma dərin təşəkkürümü bildirirəm. Onların səbr və istiqamətləndirməsi sayəsində həm peşəkar, həm də şəxsi inkişafım üçün dəyərli təcrübə qazandım.
- Rahibə Mənsimova
Mən, Rahibə Mənsimova UNEC-də İqtisadiyyat ixtisası üzrə 3-cü kurs tələbəsiyəm. Mərkəzi Bank həmişə mənim üçün peşəkar qurum nümunəsi olub və ilk dəfə real iş təcrübəsi qazanmaq üçün bundan daha yaxşı yer təsəvvür edə bilməzdim. Bu səbəbdən təcrübə proqramına böyük maraqla müraciət etdim və qəbul olunduğuma görə çox sevincli idim.
Təcrübəyə başlamazdan əvvəl artıq bilirdim ki, burada yüksək peşəkarlıq və ciddi iş mühiti ilə qarşılaşacağam. Amma ilk günlərdə ən çox xoşuma gələn, işçilərin səmimi münasibəti və mənə göstərilən dəstək oldu. İlk vaxtlarda çoxlu sual verməkdən və səhv etməkdən çəkinirdim, lakin başda mentorum olmaqla bütün əməkdaşlar anlayışla yanaşır, suallarıma diqqətlə cavab verirdilər. Bu, mənim adaptasiyamı asanlaşdırdı.
İşə qəbul şöbəsində əsasən vətəndaş müraciətlərinin cavablandırılması, çıxış sorğularının təşkili, namizəd məlumatlarının qeydiyyata alınması və sistemdə dəqiq şəkildə işlənməsi kimi vəzifələrdə çalışdım. Həmçinin, bəzi müsahibələrin təşkili prosesində də yaxından iştirak etdim. Bu işlər mənim üçün həm məsuliyyətli tapşırıqlar idi, həm də real iş mühitini yaxından tanımağıma imkan verdi. Burada həm analitik bacarıqlarımı, həm də ünsiyyət qabiliyyətimi inkişaf etdirdim.
Komanda ilə işləmək isə ayrıca bir təcrübə idi. Şöbə əməkdaşları ilə birgə müsahibələrdə iştirak etmək, namizədlərlə ünsiyyət qurmaq və prosesləri birlikdə idarə etmək mənim üçün çox öyrədici oldu. Eyni zamanda, iş prosesi zamanı birgə keçirdiyimiz maraqlı və əyləncəli anlar da çox xüsusi idi: sanki həm işləyir, həm də bir ailə kimi bir-birimizə dəstək olurduq. Bu təcrübə mənə həm komanda ruhunu, həm də əməkdaşlıq bacarıqlarını daha dərindən yaşatdı.
Mənim üçün ən yadda qalan an müsahibələrdə iştirak edib sual verməyim oldu. O anda özümü çox özgüvənli hiss etdim və sanki artıq həqiqətən HR mütəxəssisi idim. Bu, gələcəkdə insan resursları sahəsində işləmək istədiyimə tam əminlik yaratdı.
Bu təcrübə mənim özümü daha yaxşı tanımağıma kömək etdi və karyera planlarıma böyük təsir göstərdi. Gələcək təcrübəçilərə tövsiyəm odur ki, bu fürsəti yalnız təcrübə kimi yox, həm də özlərini kəşf etmək üçün bir meydan kimi görsünlər. Burada qazandıqları hər təcrübə onları gələcəkdə daha güclü mütəxəssisə çevirəcək.
Mənə bu fürsəti yaratdığı üçün Mərkəzi Banka və bütün əməkdaşlara təşəkkür edirəm.
- Sahil Xosrovlu
Mən, Sahil Xosrovlu Azərbaycan Dövlət İqtisad Universitetinin İqtisadiyyat ixtisası üzrə 4-cü kurs tələbəsiyəm. Universitetdə əldə etdiyim nəzəri bilikləri ölkənin iqtisadi siyasətinin əsas mərkəzlərindən birində tətbiq etmək və makroiqtisadi prosesləri yaxından izləmək arzusu məni Mərkəzi Bankın “Maliyyəçisən” təcrübə proqramına gətirdi.
Təcrübəyə başlamazdan əvvəl Mərkəzi Bankın rəsmi və peşəkar mühitə sahib olduğunu bilirdim. İlk gündən etibarən burada həm yüksək peşəkarlıq, həm də dinamik və səmimi iş mühitinin mövcud olduğunu müşahidə etmək məni çox sevindirdi. Xüsusilə, gənc təcrübəçilərin fikirlərinə verdikləri dəyər mənim üçün ən xoş təəssüratlardan biri oldu.
Pul siyasətinin hesabatlılığı şöbəsindəki təcrübəm dövründə əsas vəzifələrim statistik məlumatları analiz etmək, ilkin təhlillər aparmaq, aylıq və rüblük iqtisadi hesabatların hazırlanmasına dəstək göstərməkdən ibarət idi. Bu prosesdə şöbənin daxili iclaslarında iştirak etmək mənə real iqtisadi göstəricilərin necə müzakirə edildiyini və proqnozların hansı amillər əsasında formalaşdığını görmək imkanı verdi. Təcrübə müddətində makroiqtisadi təhlil, analitik proqramlarla işləmək və vaxtı səmərəli idarə etmək kimi bir çox yeni bacarıqlar qazandım.
Mentorumun və digər əməkdaşların dəstəyini hər zaman hiss etdim, onların məsləhətləri və təcrübə paylaşımları sürətli adaptasiya olmağıma kömək etdi. Mərkəzi Bankın davamlı inkişafa və bilik mübadiləsinə açıq olan korporativ mühiti mənim üçün böyük motivasiya mənbəyi oldu.
Təcrübəmdəki ən yaddaqalan an isə rüblük Pul Siyasəti İcmalının hazırlanmasında yaxından iştirak etməyim oldu. Həmin sənəddə özümün də araşdırdığı bəzi məlumatların yer aldığını görmək mənə böyük qürur hissi yaşatdı.
Bu təcrübə mənim gələcək karyera hədəflərimi daha da aydınlaşdırdı və iqtisadi təhlil sahəsinə olan marağımı artırdı. Gələcək təcrübəçilərə məsləhətim odur ki, təşəbbüskar olsunlar, daim suallar versinlər və hər bir tapşırığa yeni bir şey öyrənmək üçün fürsət kimi yanaşsınlar.
Mənə bu dəyərli imkanı yaradan Mərkəzi Bank rəhbərliyinə və Pul siyasəti departamentinin bütün əməkdaşlarına dərin təşəkkürümü bildirirəm.
- Sənan Əhmədli
Mən, Sənan Əhmədli ADA Universitetində Biznesin idarə edilməsi ixtisası üzrə 3-cü kurs tələbəsiyəm. Ölkənin aparıcı maliyyə qurumlarından biri olan Mərkəzi Bankda təcrübə keçmək həm akademik biliklərimi tətbiq etmək, həm də real iş mühitində özümü sınamaq üçün əla fürsət idi. Bu səbəbdən yay təcrübə proqramına böyük maraqla müraciət etdim.
Təcrübəyə başlamazdan əvvəl gözləntilərim yüksək idi, lakin bu qədər səmimi və dəstəkləyici bir mühitlə qarşılaşacağımı düşünmürdüm. İlk günlərdə işçilərin açıq və mehriban münasibəti, eləcə də hər bir təcrübəçiyə göstərilən diqqət məni çox təəccübləndirdi.
Təcrübə müddətində Bazar davranışlarının tənzimlənməsi departamentinin Maliyyə məlumatlılığı və peşəkar inkişaf şöbəsində fəaliyyət göstərdim. Əsas vəzifəm şöbənin fəaliyyəti çərçivəsində əhalinin maarifləndirilməsi və maliyyə savadlılığının artırılmasl istiqamətində müxtəlif tapşırıqların, araşdırmaların həyata keçirilməsi və onların təqdim edilməsi olub. Müxtəlif maarifləndirici resursların hazırlanmasına və onların sınaqdan keçirilməsinə dəstək göstərmişəm. Bu müddətdə layihə idarəetməsi, təqdimat bacarıqları və effektiv ünsiyyət kimi sahələrdə özümü xeyli inkişaf etdirdim.
Komandadakı hər kəs mənə həm peşəkar, həm də fərdi inkişafımda böyük dəstək oldu. Mentorumun daim mənə yol göstərməsi, suallarıma səbirlə cavab verməsi və təşəbbüslərimi dəstəkləməsi məni daha da motivasiya etdi. Mərkəzi Bankda məni ən çox cəlb edən isə öyrənməyə açıq, innovativ və əməkdaşlığa əsaslanan mühit oldu.
Yaddaqalan anlarımdan biri Mərkəzi Bankın təşkil etdiyi “DƏYƏRLİ ANLAR” yay festivalında iştirak etmək oldu. Bu tədbir həm əyləncəli istirahət, həm də əməkdaşlarla yaxın əlaqələr qurmaq üçün unikal fürsət idi. Digər təcrübəçilər və peşəkar əməkdaşlarla bir araya gəlmək, komanda ruhunu hiss etmək mənə çox böyük enerji verdi və iş mühitinə fərqli baxış qazandırdı.
Bu təcrübə mənim gələcək karyera planlarımı daha dəqiq formalaşdırdı və özümü inkişaf etdirmək üçün ilham verdi. Gələcək təcrübəçilərə tövsiyəm odur ki, həmişə öyrənməyə həvəsli olsunlar və hər fürsətdən faydalanmağa çalışsınlar.
Mənə belə bir imkanı yaratdığı üçün Mərkəzi Banka və bütün əməkdaşlara təşəkkürümü bildirirəm.
- Toğrul Yadigarov
Mən, Toğrul Yadigarov Bakı Dövlət Universitetinin Hüquqşünaslıq ixtisası üzrə 4-cü kurs tələbəsiyəm. Ölkənin maliyyə sisteminə nəzarət edən qurumlardan birində təcrübə keçmək və məsələyə aparıcı bir yerdən baxmaq məni daim maraqlandırırdı. Buna görə Mərkəzi Bankın “Maliyyəçisən” təcrübə proqramına müraciət etməyi qərara aldım.
Təcrübəyə başlamazdan əvvəl gözləntilərim bank hüququnda biliklərimi təkmilləşdirmək və real iş mühitini yaxından qavramaq idi. İlk gündən hər bir əməkdaşın mənə yeni bilik öyrətməyə çalışması və bu əzmləri məni çox təəccübləndirmişdi.
Təcrübə müddətində əsas tapşırıqlarım korporativ idarəetmə sahəsində mərkəzi bankçılığın hüquqi aspektlərinin beynəlxalq təcrübəsini təhlil etmək, Mərkəzi Bankda əmək münasibətlərinin hüquqi təminatını həyata keçirmək və Mərkəzi Bankın idarəetmə, təşkilati məsələlər və daxili nəzarət sahəsində reqlament sənədlərinin (daxili qaydalar, prosedurlar, əsasnamələr və s.), eləcə də qeyri-normativ hüquqi aktlarının hazırlanmasında iştirak etmək və həmin sənədlərin hüquqi ekspertizasını həyata keçirmək oldu. Xüsusilə, satınalmalar üzrə beynəlxalq qanunvericiliyi, 100-dən çox ölkənin qanunvericilik sistemini araşdırıb təhlil etmək mənim üçün əvəzsiz təcrübə idi. Bu müddət ərzində hüquqşünas üçün ən lazımi bacarıqlar olan araşdırma, təhliletmə və analizetmə kimi bacarıqlara yiyələndim.
İş yoldaşlarım və mentorum daim məni istiqamətləndirməyə çalışır, sanki gələcək iş həyatına hazırlayırdılar. Mərkəzi Bankdakı kommunikasiya, çoxşaxəli iş mühiti və güclü əməkdaşlıq məni təcrübə boyu daha çox ruhlandırdı. Ən yadda qalan an isə şöbəmiz tərəfindən hazırlanan qanunvericiliyə dəyişiklə bağlı məsələyə hazırladığım layihə ilə töhfə verməyim oldu. Bu işin bir qolu olmaq qürurlandırıcı idi.
Bu təcrübə mənim gələcəkdə hansı sahəyə yönəlmək istədiyim və necə bir hüquqşünas olmaq istədiyimi müəyyənləşdirdi. Gələcək təcrübəçilərə tövsiyəm odur ki, 1 tapşırıq verilikdə 2 dənə etməyə çalışsınlar və daim suallar versinlər.
Bu əvəzolunmaz təcrübə üçün Mərkəzi Bank və onun ailəsinə sonsuz minnətdaram.
- Uğur Məmmədov
Mən, Uğur Məmmədov Azərbaycan-Fransız Universitetində Kompüter Elmləri ixtisasının 2-ci kurs tələbəsiyəm. Data Analitika üzrə biliklərimi tətbiq etmək, xüsusən də böyük qurumlarda bu sahənin iş mühiti ilə tanış olmaq arzusunda olmuşam. Bu səbəbdən "Maliyyəçisən" təcrübə proqramına müraciət etdim.
Departamentdəki hər kəsin mehriban və səmimi yanaşması, mentorumun ilk gündən mənə yeni biliklər öyrətməsi mühitin keyfiyyətindən xəbər verirdi. Ən təəccübləndirici məqam isə elə ilk gündən şöbə üçün keçirilən iclaslarda iştirak etməyim oldu.
Data analitikası bölməsində olduğum üçün əsas vəzifəm mənə yönləndirilmiş dataları istifadə edərək hesabat və dashboardların düzəldilməsi idi. Bu proseslərin icrası zamanı istifadə etdiyimiz proqramlarda yeni üsullar, metodlar öyrəndim, ümumilikdə mənə yeni olan başqa bir data vizuallaşdırma proqramı ilə tanış oldum.
Mentorumdan əlavə digər şöbə üzvlərinin də mənə mentor kimi yanaşmaları inkişaf və öyrənmə prosesim üçün böyük rol oynadı. İş mühitində hər kəsin bir-biri ilə mehriban davranışı, öyrənməyə açıq mühiti məni çox ruhlandırdı.
Düşünürəm ki, ən yaddaqalan an şöbəmizdən tələb edilən hesabatların hazırlanmasında iştirakımdır. Komandaya müəyyən qədər dəstək olmaq çox sevindirici haldır.
Bu təcrübə seçdiyim sahənin perspektivindən xəbər verdi. Mərkəzi Bank kimi bir qurumda Data Analitikin iş mühiti ilə tanış oldum və biliklərimi zənginləşdirdim. Gələcək təcrübəçilərə davamlı öyrənməyi, hər fürsətdən maksimum şəkildə yararlanmağı tövsiyə edirəm.
Bizim üçün yaradılan bu imkan üçün Mərkəzi Banka və bütün əməkdaşlara təşəkkür edirəm.- Vəzir Qasımov
Mən, Vazir Qasımov Azərbaycan Dövlət İqtisad Universitetinin Beynəlxalq İqtisadiyyat Məktəbi fakültəsində maliyyə ixtisası üzrə 3-cü kurs tələbəsiyəm. Həmişə məqsədlərim yüksək olub və texniki biliklərimə olan güvənim sayəsində Mərkəzi Bankın “Maliyyəçisən” təcrübə proqramına müraciət etdim. Mənim üçün bu, həm peşəkar biliklərimi sınamaq, həm də ölkənin ən nüfuzlu maliyyə qurumunda təcrübə toplamaq üçün böyük fürsət idi.
Təcrübəyə başlamazdan əvvəl çox ciddi, rəsmi və hər kəsin yalnız işinə fokuslandığı bir mühitlə qarşılaşacağımı gözləyirdim. Amma ilk gündən bunun əksini gördüm. İşçilər öz vəzifələrində peşəkar olmaqla yanaşı, daim ünsiyyət qurmağa və yardım etməyə açıq idilər. Bu, mənim üçün xoş sürpriz oldu və adaptasiya prosesini asanlaşdırdı.
Təcrübə müddətində əsas tapşırıqlarım çoxşaxəli idi. Mən məlumatların toplanması, onların təhlil edilməsi və müəyyən hesabatların hazırlanmasında iştirak etdim. Bəzi layihələrdə həm müstəqil şəkildə, həm də komanda ilə işləyərək məsuliyyət daşımalı oldum. Əlavə olaraq, müxtəlif müzakirələrdə və təqdimatlarda iştirak etmək imkanı qazandım. Bu proses mənə analitik bacarıqlarımı inkişaf etdirmək, nəzəri biliklərimi praktikada sınamaq və vaxtı effektiv idarə etməyi öyrətdi.
Komanda ilə əməkdaşlıq isə mənim üçün ən dəyərli təcrübələrdən biri oldu. Mentor və şöbə əməkdaşları hər zaman istiqamət verərək öz biliklərini bölüşürdülər. Onların etibarı və dəstəyi məni motivasiya etdi. Ən çox xoşuma gələn isə Mərkəzi Bankın innovativ və öyrənməyə açıq iş mühiti idi.
Mənim üçün yaddaqalan anlardan biri şöbədə hazırlanmış aylıq hesabatın müzakirəsində iştirak etməyim oldu. Orada öz töhfəmi görmək və fikirlərimi bölüşmək qürurverici hiss idi.
Bu təcrübə mənim gələcək karyera planlarıma daha da aydınlıq gətirdi. Mən artıq əminəm ki, maliyyə sabitliyi və risk idarəçiliyi istiqamətində ixtisaslaşmaq istəyirəm. Gələcək təcrübəçilərə mesajım budur: hər fürsəti öyrənmək üçün istifadə edin və heç vaxt sual verməkdən çəkinməyin. Mənə bu imkanı yaratdığı üçün Mərkəzi Banka və bütün əməkdaşlara dərin təşəkkürümü bildirirəm.
- Zahid Nəsibov
Mən, Zahid Nəsibov Dövlət İdarəçilik Akademiyasının hüquqşünaslıq ixtisası üzrə 3-cü kurs tələbəsiyəm. Mərkəzi Bank ölkədə pul siyasətini tənzimləyən qurumdur və mənə görə işləmək üçün ən mükəmməl orqanlardan biri idi.
“Maliyyəçisən” təcrübə proqramının qeydiyyatını gördükdə çox həyəcanlanmışdım, Mərkəzi Bankda çalışmaq həmin vaxta kimi mənə əlçatmaz görünürdü. Mərhələləri keçdim və panel müsahibəsindən sonra həyəcanla nəticələri gözlədim. Qəbul olduğumu öyrənəndə bir anlıq inana bilmədim, çünki mənim üçün böyük bir xəyal gerçək olmuşdu.
Təcrübəyə başladığım ilk gün maraqlı təlimlər oldu,elə həmin gündən başa düşdüm ki, çox maraqlı və möhtəşəm bir yol məni gözləyir. Cəsarət edib proqrama müraciət etdiyim üçün özümlə qürur duydum. Daha sonra iş günlərində həm mentorumdan, həm də departamentin digər əməkdaşlarından ğz sahəmlə bağlı xeyli sayda bilik qazandım. Mərkəzi Banka gəlməzdən öncə qiymətli kağızların nə demək olduğunu belə bilmirdim, amma burada artıq bu sahə ilə bağlı bir çox şeyi öyrənmişəm.
Mərkəzi Bankdakı mühit də məni heyran etdi, buradakı hər bir əməkdaş çox mehriban, xeyirxahdır. Hətta sənin tanımadığın şəxslər belə sənə hər cür kömək göstərməyə hazırdırlar və bu çox nadir haldır. Təşkilatdakı mühit məni sosial cəhətdən inkişaf etdirdi və produktiv rəhbər-işçi, işçi-işçi münasibətlərinin necə olması gərəkdiyini anladım. Burada sən nəyi isə bilməsən də bu heç kim üçün problem deyil, onlar hər mövzunu sənə izah etməyə, qaranlıq məqamları aydınlaşdırmağa hazırdırlar.
Eyni zamanda sən çoxlu suallar versən də əməkdaşlar heç vaxt bezmirlər, daim gülərüzlə sənin suallarını cavablandırırlar. Bu cür münasibət mənə də ilham verir və bu rəftarı özüm üçün nümunə götürürəm. Təcrübə müddətində yaşadığım xatirələr, tanıdığım insanlar mənim üçün həmişə unudulmaz olacaq, bütün karyeram boyunca burada qazandığım bacarıq və bilikləri tətbiq edəcəyəm. Geriyə dönüb baxdıqda həmişə “Maliyyəçisən” proqramının məndə qoyduğu izləri görəcəyəm. Gələcək təcrübəçilərə bu qazandıqları şansdan maksimum yararlanmalarını və buradakı vaxtlarını səmərəli istifadə etmələrini tövsiyə edirəm.
Son olaraq bu təşəbbüsə və imkanlara görə bütün Mərkəzi Bank ailəsinə təşəkkürlərimi bildirirəm!
- Zeynəb Məhərrəmli
Mən, Zeynəb Məhərrəmli Bakı Ali Neft Məktəbində Biznesin İdarə edilməsi ixtisası üzrə təhsil alıram
Təhsil və şəxsi inkişaf yolumda hər bir addımı bir fürsət kimi dəyərləndirməyə çalışmışam. Həm universitetdə, həm də fərdi təşəbbüslərlə qatıldığım layihələrdə məqsədim yalnız bilik qazanmaq deyil, eyni zamanda özümü tanımaq və inkişaf etdirmək olub. Bu yolda rastlaşdığım insanlar, öyrəndiyim dərslər və qarşıma çıxan çətinliklər məni daha güclü və məqsədyönlü biri etdi.
Hər yeni təcrübə mənə göstərdi ki, öyrənmək yalnız dərsliklərlə məhdudlaşmır – dinləmək, müşahidə etmək və birlikdə işləmək də bir o qədər önəmlidir. Komanda işində empati qurmağın və qarşılıqlı hörmətin nə qədər vacib olduğunu dərk etdim. Uğur qazanmaqdan daha önəmlisi isə öyrəndiklərimizi paylaşmaq və birlikdə böyüməkdir.
Bu günə qədər keçdiyim yol mənə bir şeyi aydın şəkildə öyrətdi: səmimiyyət, davamlılıq və açıq fikirli olmaq hər hansı bir sahədə irəliləmək üçün əsas amillərdir. Qarşıya qoyduğum hədəflərə doğru inamla addımlayıram və bilirəm ki, hər təcrübə mənə yeni qapılar açacaq. Bu proqramda iştirak etmək də mənim üçün həm öyrənmək, həm də özümü göstərmək üçün dəyərli bir fürsət olacaq.
- Zəhra Rəsulova
Mən, Zəhra Rəsulova ADA Universitetində Biznesin İdarə edilməsi ixtisası üzrə 3-cü kurs tələbəsiyəm.
“Maliyyəçisən” təcrübə proqramının keçən ilki məzunlarının hekayələri məni həvəsləndirdi və özümü yaxın hiss etdiyim maliyyə sahəsində Mərkəzi Bank kimi aparıcı qurumda təcrübə toplamaq istədim.
Təcrübəyə başlamazdan əvvəl günlük iş proseslərini gözləyirdim, amma Mərkəzi Bankın təlimlər, ekskursiyalar və rəhbərlərlə görüşlər kimi təşkil etdiyi fəaliyyətlər bunun sadəcə bir təcrübə proqramından daha artıq olduğunu sübut etdi. İlk günlərdə məni ən çox təəccübləndirən şey, təcrübənin ilk günündə Azərbaycan Respublikası Mərkəzi Bankının sədr müavini Vüsal Xəlilovun maliyyə təşkilatları ilə görüşündə iştirak edərək, real və ciddi iş mühitinə daxil olmaq imkanı oldu.
Əsas tapşırıqlarım maliyyə texnologiyaları üzrə beynəlxalq təcrübənin öyrənilməsi, dövlət səviyyəli tədbirlərin təşkilatçılığında iştirak və müxtəlif tədqiqatların aparılması idi. Bu prosesdə təqdimat hazırlama, vaxtın idarə edilməsi və rəsmi sənəd tərtibi kimi praktik bacarıqlar qazandım. Təcrübəm boyu iştirak etdiyim daxili müzakirələr və təlimlər nəzəri biliklərimi tətbiq etməyə imkan yaratdı.
Maliyyə Texnologiyaları və İnnovasiyalar departamentinin direktoru, hörmətli Fidan Tofidi daxil olmaqla, bütün komanda mənə ilk gündən etibarən böyük dəstək göstərdi. Departamentindəki qayğıkeş mühit özümü dəstəklənmiş kimi hiss etdirdi və komanda işinin gücünü mənə göstərdi.
Ən yaddaqalan anım, Hörmətli Vüsal Xəlilovun təcrübəçilər üçün keçirdiyi təlimdə və Hörmətli Fidan Tofidinin komandaya rəhbərlik etdiyi anlarda şahid olduğum ilhamverici liderlik təcrübələri oldu.
Bu təcrübə gələcək karyera planlarımı daha da aydınlaşdırdı və özümü real iş mühitinə hazır hiss etməyimə kömək etdi. Gələcək təcrübəçilərə məsləhətim, hər andan faydalanmaları və komandadan daim geri bildirim almalarıdır.
Mənə bu qiymətli imkanı yaratdığı üçün Azərbaycan Respublikasının Mərkəzi Bankına, dəstəyini əsirgəməyən mentoruma, Maliyyə texnologiyaları və innovasiyalar departamentinin əməkdaşlarına və hər zaman yanımızda olan İR komandasına ən dərin təşəkkürlərimi bildirirəm.
- 2024-cü ilin "Maliyyəçisən" təcrübəçilərinin hekayələri
- Aysu Veysova
2 ay təcrübə müddətində mentorumla yanaşı departamentimizin bütün üzvləri öz dəstəyini göstərdi. İstər texniki biliklərimin inkişafına, istərsə də şəxsi inkişafıma bu təcrübə proqramının böyük töhfəsi oldu. Təcrübə yoldaşlarımla qurduğum ünsiyyət bu proqramı daha da maraqlı etdi. Bizim üçün təşkil edilən təlimlər həmçinin faydalı və maraqlı idi.
Bu müddətdə yadda qalan ən vacib məsələ mənim əsl komanda işini nümayiş etdirməyimiz oldu. İdeyalar formalaşdırmaq, araşdırmalar etmək və yoldaşlarımızla bölüşüb müzakirələr aparmaq aramızdakı əlaqəni gücləndirdi. Təcrübə müddətində tanıdığım bir neçə yoldaşlarım var ki, onlarla münasibətimiz bundan sonra da davam edəcək. Yaddaqalan anlardan növbətisi isə departamentlə edilən korparativ naharlar idi. Başda rəhbərim və mentorum olmaqla hər kəsin mənlə həmsöhbət olması, fikir mübadiləsi etməsi mənə çox xoş bir təsir buraxdı.
Son olaraq vurğulamaq istəyirəm ki,”Maliyyəçisən” proqramı mənim üçün öz bacarıqlarımı təkmilləşdirdiyim, yeni əlaqələr qurduğum və mühüm layihədə iştirak etdiyim bir təcrübə oldu.- Aytac Süleymanova
Maliyyəçisən təcrübə proqramına qəbul olmaq mənim üçün böyük bir addım idi.
Proqram ərzində əldə etdiyim şəxsi və peşəkar nailiyyətlər mənim üçün çox dəyərli oldu. Yüksək peşəkar korporativ mədəniyyətə sahib olan Mərkəzi Bankda çalışdığım müddətdə komanda mənə böyük dəstək göstərdi. Onların peşəkarlığı isə mənə ilham verdi.
Layihə komandamla birlikdə hazırladığımız təqdimatda qarşılaşdığımız çətinliklər və bu çətinlikləri aşmaq üçün göstərdiyimiz səylər mənim üçün unudulmaz təcrübə oldu. Layihə komandasının bir hissəsi olmaq mənə komanda işinin əhəmiyyətini və effektiv ünsiyyətin vacibliyini öyrətdi. Hər bir komanda üzvünün fərqli bacarıqları və perspektivləri layihələrimizin uğuruna böyük töhfə verdi.
Bu təcrübə mənim karyera hədəflərimə böyük təsir göstərdi və mənə gələcəkdə daha böyük uğurlar əldə etmək üçün motivasiya oldu. Bu proqramda iştirak etdiyim üçün çox şadam və gələcək təcrübəçilərə də bu proqramı tövsiyə edirəm.
- Cavad Faiqli
“Maliyyəçisən" ilə tanışlığım 2023-cü ilə təsadüf edir. Özümə "Addıma mərkəzdən başla" deyərək proqrama müraciət etmək qərarına gəldim. Həmin il uğursuz olsam da, həvəsimi itirmədən növbəti ili gözlədim. Həmin zaman gəlib çatdı. Hər bir mərhələni uğurla keçdikcə özümə güvənim daha da artdı. Nəhayət 1 il öncə qərar verdiyim, xəyalını qurduğum yerə qəbul oldum. Təbii ki, işinə töhfə verə biləcəyimi düşündüyüm, hər iki ildə də müraciət etdiyim "Pul siyasəti" departamentində təcrübə keçmək imkanı qazandım. Əməkdaşlarla, təcrübəçilərlə, bütünlükdə Mərkəzi Bank ailəsi ilə yeni yaranan münasibətlər, professional iş təcrübəsi, yumşaq və texniki bacarıqlar, sahənin mütəxəssislərindən mentor dəstəyi, layihə komandamla görüşlər, müzakirələr, birlikdə çalışdığımız saatlar, İnsan resursları komandasının təlimləri, görüşlər mənim üçün çox dəyərlidir. Belə peşəkar bir mühitdə olduğum, əvəzsiz təcrübə qazandığım üçün Mərkəzi Bank ailəsinə təşəkkür edirəm.
Mənim Mərkəzi Bank hekayəm burada bitmir. 2 ay öncə təcrübəçi olaraq daxil olduğum ailənin artıq bir üzvüyəm!
- Cəmilə Mehdiyeva
“Maliyyəçisən” təcrübə proqramında iştirak üçün bütün mərhələləri uğurla keçdim. Təcrübə müddətində Mərkəzi Bankın əməkdaşları ilə tanışlıq məni yaxşı mənada təəccübləndirdi. O qədər səmimi, mehriban bir mühit var idi ki, hər gün işə gəlmək istəyirdim. Məsul olduğum departamentlə bir neçə dəfə nahar etdik. Bizdən gələcək planlarımızla bağlı soruşub məsləhətlər verirdilər. Bundan əlavə departament rəhbərliyinin təcrübəçilərlə nahar zamanı təəssüratlarını öyrənməsi, şəxsi karyera yolundan danışaraq məsləhətlər verməsi bizə daha da ruhlandırmışdı. Mükəmməl olaraq keçirdiyim 2 ay ərzində iş yoldaşlarımın mənə hər dəfə çox çalışqan biri olduğumu bildirməsi, nə olursa olsun hər zaman irəli gedə biləcəyimi vurğulaması məni motivasiya edirdi. Sonda məzun günündə cənab sədrə təcrübəçi kimi hansı departamenti seçməyi ilə bağlı sual veriləndə cavabında "Maliyyə sabitliyi" demişdi. Bu cavabla düzgün seçim etdiyimə daha əmin oldum.
- Elxan İsayev
Maliyyəçisən təcrübə proqramı mənim üçün maraqlı və bir o qədər də fərqliliklərlə dolu marafon oldu. Bu təcrübə proqramı mənə korporativ leqonun ayrılmaz bir hissəsi olmaqdan əlavə, peşəkar əməkdaşlar tərəfindən olunan dəstək ilə real təcrübələrin vacib parçası olmaq imkanı verdi. Mentorumla hər zaman komanda şəklində üzərimizə düşən öhdəlikləri böyük həvəslə həll etdik. Bəzən bu nəticələr uzun-uzun, müxtəlif fikirlərin debatı nəticəsində ortaya çıxırdı. Təsadüfi deyil ki, ən mükəmməl qərarlar məhz bu kimi aktiv debatlar nəticəsində doğur.
Düşünürəm ki, “Maliyyəçisən” təcrübə proqramı karyeram boyunca unudulmaz bir xatirə olaraq qalacaq.
- Elvira Məhərrəmova
İlk olaraq qeyd etmək istəyirəm ki, bu yay həyatımda keçirdiyim ən məhsuldar və faydalı yay oldu. “Maliyyəçisən 2024”ə müraciətimə müsbət cavab gəldikdən sonra Mərkəzi Bankdakı iş mühiti, peşəkar insanlarla ünsiyyətdə olmaq və birlikdə çalışmaq mənim üçün çox həyəcanverici idi.
Artıq proqram geridə qalsa da, ilk gündə olan gözləntimin daha çoxunu görmək məni sevindirir. İnsanın həyatında elə bir dönəm olur ki, o dönəm içində baş verənlər, ətraf və şərait insanın necə yol almasına, istiqamətlənməsinə böyük təsir göstərir. Bu proqrama qəbul olmağım, eləcə də təcrübə zamanı gördüyüm işlər, təlimlər, mentorla və digər əməkdaşlarla ünsiyyət və digər amillər mənim şəxsi inkişafımda əvəzsiz rol oynadı. Eyni zamanda yumşaq və sərt bacarıqlarımın daha da təkmilləşməsinə və düzgün formalaşmasına böyük töhfəsi oldu. Bir sözlə, bu təcrübə proqramı mənim üçün tam bir məktəb oldu.
Son olaraq qeyd etmək istəyirəm ki, biz gənclər üçün belə bir şərait yaratdığınız və dəstək olduğunuz üçün sizə minnətdaram!
- Emil Nəzərov
Proqrama başladığım andan etibarən bu təcrübə mənim üçün həm peşəkar, həm də şəxsi inkişaf baxımından əvəzsiz bir marafon oldu. Bu proqram mənə nəzəri biliklərimi tətbiq etməklə yanaşı, özümü daha da inkişaf etdirməyə şərait yaratdı.
Proqram ərzində əldə etdiyim ən böyük nailiyyət peşəkar iş mühitində təcrübə qazanmaq və necə effektiv çalışa biləcəyimi anlamaq oldu. Layihə komandamızla birlikdə işləmək hər birimizin güclü tərəflərini üzə çıxararaq, komandaya dəyər qatmağın necə əhəmiyyətli olduğunu mənə öyrətdi. Bu komandada çalışmaq, mənə problem həlli və komandada işləmə bacarıqlarımı inkişaf etdirməyə kömək etdi.
Əldə etdiyim peşəkar təcrübələr və qazandığım biliklər, gələcək karyera hədəflərimə daha dəqiq yön verməyimə kömək oldu. Maliyyə sektorunda inkişaf etməyin nə qədər əhəmiyyətli və maraqlı olduğunu gördüm və bu, mənə bu sahədə daha böyük hədəflər qoymağa stimul verdi. Çalışdığım komandanın mənə qatdığı dəyərlər və maraqlı hadisələr bu müddət ərzində unutmayacağım anlar arasında yer alacaq.
"Maliyyəçisən" proqramı mənim üçün təkcə bir təcrübə proqramı olmadı, həm də gələcək karyeram üçün mühüm bir başlanğıc nöqtəsi oldu. Gələcəkdə bu proqramın bir parçası olmaq istəyənlərə bu təcrübənin onları nə qədər dəyişdirəcəyini və inkişaf etdirəcəyini demək istəyirəm. Təcrübənizi tam olaraq yaşayın və hər anından faydalanın.
- Ələmdar Rzayev
Müsahibələrdən etibarən qarşılaşdığım təcrübəli şəxslərin mənim inkişafımda böyük rol oynayacağına inanırdım. Mərkəzi Bank kollektivinin məni davamlı inkişafa səsləməsi növbəti addımlarımı daha inamla atmağıma şərait yaratdı. Peşəkar mühitdə ilk dəfə olmağıma baxmayaraq böyük təcrübə yaşadığımı hiss edirəm. Layihə komandama əvvəlcədən tanıdığım kiminsə düşməməsi təcrübə proqramının çətin keçəcəyi hissi yaratmışdı. Lakin bu müddət ərzində komandadakı ab-havanı qoruya bilməyim həqiqətən də komanda ilə işləmə bacarığımın olduğuna inamımı artırdı. “Maliyyəçisən” təcrübə proqramı gələcək karyera istiqamətini düz seçdiyimi mənə göstərdi və addımlarımı daha inamla atmağıma böyük dəstək verdi. Nəzəri biliklərimin praktiki olaraq işlədiyini görmək məni çox sevindir.
- Əmiran Qəhrəmanov
İlk günlərdə çox həyəcan keçirirdim. Daha öncə peşəkar mühitdə iş təcrübəm olmamışdı. Mentorum sayəsində bu həyəcanı üstələyə və komandaya çox tez uyğunlaşa bildim. Təcrübə keçdiyim departament əməkdaşlarının hər biri böyük həvəs və təmkinlə suallarımı cavablayır, məni iş prosesi ilə tanış edirdilər. Beləliklə, bu proqram müddətində bəzi mühüm qərarların necə qəbul edildiyi və tədqiqatın necə aparıldığını öyrəndim.
Ünsiyyətimiz işdən kənadarda da davam edirdi. Birlikdə naharlara çıxır, müxtəlif mövzular üzrə fikirlərimizi bölüşürdük.
Bu proqramın bütün təcrübəçilər üçün çox vacib olduğunu düşünürəm. Təhsil alarkən belə bir təcrübə fürsətinə sahib olmaq gələcək karyeramız üçün çox mühüm bir addımdır. Bu proqram bizə tapşırıqları prioritetləşdirməyi və həmkarlarla effektiv ünsiyyət qurmağı öyrətdi.
Təcrübəçi olmağıma şərait yaratdıqları üçün Mərkəzi Bank kollektivinə təşəkkür edirəm.
- Fatimə Hüseynova
"Maliyyəçisən" təcrübə proqramına müraciət etdiyim zaman yeganə gözləntim seçim prosesində təcrübə qazanmaq və kənardan baxanda mənə çox maraqlı gələn o binanın daxilini görmək idi.
Lakin müsahibə otağından çıxdıqda artıq qəbul olacağıma inanmışdım və sonunda məni möhtəşəm insanlarla tanış edəcək, unudulmaz təcrübələr yaşadacaq 2 aylıq dövr başladı.
Bu müddət ərzində Strategiya və layihələrin idarə edilməsi departamentində gələcək həyat və karyerama çox böyük dəyər qatacaq təcrübələr yaşadım, karyeramı davam etdirmək istədiyim Layihə idarəetməsi sahəsində ilk və ən böyük addımlarımı atdım. Artıq bu təcrübə müddətindən sonra mən karyeramı bu istiqamətdə davam etdirəcəyimə əmin oldum, ən əsası da necə, nə cür, hansı yolu izləməli olduğumu məhz bu təcrübə proqramı sayəsində öyrəndim.
Ən böyük qazanclarımdan biri isə 1 ay müddətində üzərində çalışdığımız case studylər(praktiki məşqələlər) oldu. Nəticə olaraq öyrəndim ki, gördüyün işin nəticəsi nə qədər önəmlidirsə, proses boyunca qazandıqların da bir o qədər vacibdir.
Növbəti ildə proqrama qatılacaq və müraciət edəcək hər kəsə tövsiyyə edirəm ki, "Maliyyəçi" olduğunuza inanın və bu təcrübə proqramında iştirak edin”. Proqramın sizə və karyeranıza qatacağı dəyərlər həyatınız boyu sizinlə ola bilər.
- Fərid Həsənxanlı
“Maliyyəçisən” təcrübə proqramı düşünürəm ki, çox böyük təşəbbüs və fürsətdir. Proqram çərçivəsində mən bir çox layihələrdə iştirak etmişəm. Qazandığım təcrübə nəzəri biliklərimi tətbiq etməyimə xeyli yardım göstərdi. Həmçinin karyeraya Mərkəzi Bankda başlamaq gələcək iş həyatı ilə bağlı bir çox üstünlüklər verir. Mentorlarımız həm şəxsi, həm də peşəkar inkişaf yolunda hər zaman dəstəkçi oldular. Bu təcrübə proqramından əvvəl gələcək təhsilimlə bağlı bəzi tərəddüdlərim olsa da, mentorumun dəstəyi sayəsində onları aradan qaldırmağa müvəffəq oldum. Mərkəzi Bank əməkdaşlarına hər zaman anlayışlı və səmimi olduqlarına görə təşəkkür edirəm.
- Fərhad Bəkirov
“Maliyyəçisən” təcrübə proqramı ilə ilk tanışlığım təhsil aldığım Bakı Ali Neft Məktəbində 2024-cü il aprel ayında keçirilən karyera sərgisi vasitəsilə oldu. Əməkdaşlardan müraciət forumunun QR kodunu əldə etdim. Daha sonra müraciət müddətinin bitməsinə 2 gün qalmış təcrübə proqramında iştirak üçün müraciət etdim. Bundan sonra bir neçə mərhələni ( test mərhələsi,qrup müsahibə və fərdi müsahibə) uğurla tamamladım və Statistika departamentində təcrübə keçmək hüququ qazandım. Təcrübə müddətimin ilk günlərindən təcrübədə olduğum departamentin əməkdaşları mənə böyük dəstək göstərməyə başladılar. Mən elə hiss edirdim ki, sanki neçə ildir bu departamentin əməkdaşıyam və bu əməkdaşları uzun müddətdir tanıyıram. İlk gündən bəri əməkdaşlarla çox isti münasibətlər qurmağı bacardım. Təcrübə boyunca mentorum müttəmadi olaraq mənə tapşırıqlar verdi və bu tapşırıqlara uyğun olaraq məni qiymətləndirdi. 2 aylıq proqram boyunca mentorum öz dəstəyini əsirgəmədən motivasiyamın hər zaman yüksək olmasına xüsusi diqqət yetirirdi. Müxtəlif universitetlərdən olan həmyaşıdlarımla tanış oldum və onlarla fikir mübadiləsi aparmaq şansı qazandım. Ümumilikdə deyə bilərəm ki bu dövr ərzində Mərkəzi Bankın əməkdaşları məndə çox xoş təəssüratlar yaratdı və bu ortam mənə gələcək karyeramı Mərkəzi Bankda qurmaq üçün motivasiya verdi.
Əminliklə deyə bilərəm ki, fərqli baxışlar, fikirlər və yüksək keyfiyyətli təşkilatçılıq kimi xüsusiyyətlərinə görə “Maliyyəçisən” təcrübə proqramı hər bir iştirakçı üçün faydalı keçdi.
- Günay Novruzova
Bu sətirləri həyəcan, qorxu, kədər, qürur, sevinc bir sözlə bütün hisslərimin qarışığı ilə yazıram. Sabah son gündür və komanda şəklində çıxışımız var.
Bu proqram həyatımda bir dəyişim nöqtəsi oldu. Özümü, potensialımı, bilik-bacarıq və savadımı dəyərləndirməyə mənə kömək etdi. Çox fərqli bir mühitdə işlədim, müxtəlif insanlarla tanış oldum.
Mən düşünürəm ki, bu bir son yox, uğurlu başlanğıcdır.
- İsa Qasımzadə
Bu proqramda iştirak etmək mənim üçün unudulmaz bir təcrübə oldu. Burada öyrəndiyim bilik və bacarıqlar, mənim gələcək karyerama əhəmiyyətli təsir göstərəcək. Yeni dostlar qazandım və hər biri ilə dəyərli təcrübələr bölüşdüm. Xüsusilə, mentorumla və bütün departamentlə qurduğum münasibətlər mənim üçün çox dəyərlidir. Onların hər birinin mənə verdiyi dəstək və dəyərli məsləhətlər, inkişaf yolumda atdığım hər addımda mənə kömək etdi.
Mentorlarımın səmimi və peşəkar yanaşması mənim üçün böyük ilham mənbəyi oldu. Eyni zamanda, bütün departamentin mənə qarşı xoş münasibəti və göstərdiyi diqqət, mənim burada özümü rahat və qəbul olunmuş hiss etməyimi təmin etdi.
Proqram ərzində yalnız insan resursları sahəsində deyil, digər sahələrdə də biliklərim əhəmiyyətli dərəcədə zənginləşdi. Texniki bacarıqlarımın inkişafı mənim üçün xüsusilə sevindiricidir. Bu proqramın bir parçası olmaq mənə böyük qürur və məmnuniyyət hissi yaşatdı. Bu təcrübənin mənim üçün dönüş nöqtəsi olduğunu düşünür, Mərkəzi Bankda qazandığım bilik və bacarıqların uğurlu karyera qurmağıma dəstək göstərəcəyinə inanıram.
- İslam Əliyev
2 aylıq müddətdə Maliyyə bazarlarının hüquqi təminatı departamentində təcrübə zamanı maliyyə hüququ, bank hüququ, sığorta hüququ, kapital bazarları və digər sahələrdə dərin biliklər və praktiki bacarıqlar qazandım. Təcrübə müddətində çalışdığım komanda mənə çox şey öyrətdi. Hər bir əməkdaş bilikərini və təcrübəsini bizimlə paylaşdı. Əməkdaşların yenilikçiliyi, bir komanda kimi işləmək bacarıqları, açıqfikirli olmaqları mənə çox şey qatdı.
Layihə işi üzrə komanda ilə birlikdə qısa müddət ərzində uğurlu iş ərsəyə gətirdik. Bu müddətdə kapital bazarları ilə bağlı biliklərimin artması ilə yanaşı komanda ilə iş, vaxt bölgüsü, araşdırma və sair bacarıqlarım inkişaf etdi. Həmçinin fərqli fikirlər olduğu zaman problemin necə həll ediləcəyi və ortaq nöqtəyə gəlinə bilinəcəyini öyrəndik.
“Maliyyəçisən” təcrübə proqramı mənim peşəkar inkişafımda böyük rol oynadı. Bu proqram mənə yalnız nəzəri biliklər deyil, həmçinin böyük təcrübə qazandırdı. Ümumilikdə bu proqram dövründə qarşılaşdığım hadisələr, əldə etdiyim biliklər və təcrübələr karyera yolumu daha da aydınlaşdırmağa və hədəfimi dəqiqləşdirməyə kömək etdi.
- Kamran Abbaslı
“Maliyyəçisən” təcrübə proqramı məni həm şəxsi, həm də peşəkar baxımdan inanılmaz dərəcədə zənginləşdirdi. Bu proqrama qəbul olmaq mənim məqsəd və arzularıma gedən yolun vacib bir hissəsi idi. Müraciət prosesi maraqlı, öyrədici və faydalı idi.
Proqram boyu mən əvəzsiz bilik və bacarıqlar əldə etdim. Mərkəzi Bankın struktur bölmələri və onların fəaliyyətləri barədə məlumatlandım. İlk real təcrübəmə Mərkəzi Bankda yiyələndim. Əlavə olaraq “Corporate Finance İnstitute” (CFİ)-ın təlimlərinə qoşulub öz biliklərimi artırmağa davam etdim.
Layihə tapşırıqlarımızın üzərində çalışarkən müxtəlif sahələrdən olan komanda yoldaşlarımla birlikdə öyrəndik, inkişaf etdik.
“Maliyyəçisən” mənim karyera planlamama ciddi şəkildə yön verdi.
- Leyla Talıbova
Mərkəzi Bankda keçirdiyim iki aylıq təcrübə mənim üçün sadəcə nəzəri biliklərimin tətbiqi deyil, həm də peşəkar inkişafım üçün dəyərli bir mərhələ oldu. Bu müddət mənim üçün intellektual bir sərgüzəşt kimi yadda qaldı. Qrup layihələrinə cəlb olunmağımız, yeni dostlarla beyin fırtınası edib, ortaya bir məhsul qoymağa çalışmağımız bizim üçün yeni kəşflərə, ideyalara yol açdı. Həmçinin, peşəkar şəbəkələşmə imkanımız və iqtisadi sferada yeni biliklər qazanmağımız bizim üçün əla bir fürsət idi.
Bundan başqa qazandığım yeni dostlar üçün “Maliyyəçisən”ə təşəkkür etmək istərdim. Belə dəyərli bir təcrübə yaşamaq, həqiqətən də yay tətilindən imtina etməyimizə dəyərdi.
Ümid edirəm ki, gələcək təcrübəçilər də öz təcrübə müddətlərindən ən azı bizim qədər zövq alacaqlar, davamlı öyrənməyə və inkişafa dəyər verəcəklər.
- Ləman Nadirova
Mərkəzi Bankın “Maliyyəçisən” təcrübə proqramında iştirakımı tələbəlik illərimin ən məhsuldar dönəmi kimi xatırlayacam. Düşünürəm ki, seçim prosesi bu marafonun ən həyəcanlı mərhələsi idi – hər mərhələdən uğurla keçərək “maliyyəçi” statusunu qazanmağa yaxınlaşdıqca həyəcan və məsuliyyət hissi ikiqat artırdı.
Proqram dövründə layihə işi və sair təlimlərdən tutmuş real iş mühitində təcrübələrə qədər, hər şey həm maarifləndirici, həm də son dərəcə maraqlı idi. Mənə olduqca mürəkkəb görünən maliyyə hüququ sektorunda hər keçən gün özümü daha bilikli, daha hazırlıqlı və rahat hiss edirdim. Təcrübəmi tamamlamağa günlər qalmış, gəldiyim nöqtəni düşünəndə, bir şey aydın olur: Həyatda ən dəyərli təcrübələr komfort zonanın hüdudlarından kənarda tapılır.
- Mədinə Quluzadə
Azərbaycan Mərkəzi Bankında təcrübə proqramını başa vurmaq peşəkar həyatımda mühüm təcrübə oldu. Bu proqram zamanı maliyyə sabitliyi və bank sektorunun incəliklərini araşdırmaq imkanım oldu.
Təcrübə zamanı mən gələcək karyeramı əhəmiyyətli dərəcədə formalaşdıracaq bacarıqlara sahibləndim.
Müxtəlif komandalarla əməkdaşlıq mənim fikirlərimi həm yazılı, həm də şifahi şəkildə aydın və effektiv çatdırmaq bacarığımı təkmilləşdirdi. Proqramın ikinci ayından bizə tapşırılan layihə sayəsində həm ani, həm də uzunmüddətli təsirləri nəzərə alan həllər hazırlayaraq problemlərə yaradıcı yanaşmağı öyrəndim.
Mərkəzi Bankda təcrübə keçdiyim müddətdə qurduğum əlaqələr əvəzsizdir. Mən öz təcrübələrini bölüşən istedadlı mentorlarlabirlikdə işləmək imkanına sahib oldum. Bu əlaqələr təkcə mənim məlumat bazamı zənginləşdirməklə yanaşı, həm də karyeramda irəliləyiş zamanı özümlə aparacağım komanda dəstəyi hissini gücləndirdi.
- Nuray Qasımzadə
Mərkəzi Bankda təcrübə hekayəm mənə çox önəmli bir mesaj verdi: Əgər uğrunda çalışdığım və bacaracağıma əmin olduğum bir şey mənim olmursa, deməli məni daha əlverişli fürsətlər gözləyir.
Həyəcanla qəbul olmağı gözlədiyim “Maliyyəçisən” təcrübə proqramında iştirak mənim üçün böyük bir uğur idi.
Komanda yoldaşlarım, mentorum və digər Mərkəzi Bank əməkdaşları ilə birlikdə bu iki ay maraqlı və məhsuldar keçdi. Yeni biliklər əldə edib, yeni peşəkarlarla tanış oldum. Bu biliklər və şəbəkə əminəm ki, karyeramızın növbəti mərhələlərində bizlər üçün faydalı olacaq.
Bu, mənim ilk təcrübəm idi. Bu yolda bizə dəstək olan əməkdaşlara, dərin təşəkkürlərimi bildirirəm. Təcrübə zamanı indiyə qədər heç universitetdə belə bizə öyrədilməyən qiymətli biliklər və dostluqlar qazandım.
“Maliyyəçisən” xatirələrimi heç zaman unutmayacağam!
- Reyzə Salmanlı
Universitetdə üçüncü kursda oxuduğum üçün bu fürsət inanılmaz dərəcədə ilhamverici oldu və mən digər tələbələri də oxşar imkanlardan yararlanmğa səsləyirəm. İlk gündən bu təcrübə sadəcə bir öyrənmə fürsəti deyil, karyera inkişafımda əsas fəsil oldu.
Bu proqrama qəbul olunduğum andan Mərkəzi Bankın əməkdaşlarının gənc istedadların yetişdirilməsinə olan həvəsi məni heyran etdi.
Təcrübəmin əsas məqamlarından biri də mentorlarımın dəyərli dəstəyi oldu. Onların səbri nəinki çətinliklərin öhdəsindən gəlməyə kömək etdi, həm də mənim şəxsi inkişafımda və peşəkar kimi formalaşmağımda mühüm rol oynadı. Onların rəhbərliyi mənə praktiki bacarıqları inkişaf etdirməyə və İnsan resurslarına dair prosesləri daha dərindən dərk etməyə kömək etdi.
Proqram həm də mənə işçilərin inkişafı proqramları üzrə araşdırma aparmaq və təşkilati effektivliyi artıran seminarlarda iştirak etmək kimi layihələr üzərində işləmək imkanı verdi.
Komanda daxilində əməkdaşlıq ruhu və müxtəlif perspektivlər mənim öyrənmə təcrübəmi zənginləşdirdi və yoldaşlıq hissini artırdı. Komandanın hər bir üzvü öz təcrübələrini bölüşməklə və konstruktiv rəy bildirməklə mənim təkmilləşməyimə töhfə verdi.
“Maliyyəçisən” təcrübə proqramı böyümə, öyrənmə və karyera inkişafı baxımından Mərkəzi Bankın çox əhəmiyyətli platformasıdır.
Bu inanılmaz təcrübə üçün Mərkəzi Bankda hər kəsə təşəkkür edirik. Öyrənilən dərsləri və qurulan əlaqələri gələcək fəaliyyətimdə tətbiq etməyi səbirsizliklə gözləyirəm.
- Sara Səttar
“Maliyyəçisən” ilk təcrübəm olduğundan mənim üçün daim unudulmaz və özəl olaraq qalacaq. Sadəcə təcrübə müddətində deyil, eyni zamanda təcrübəyə qədərki mərhələlər də mənim bilik və bacarıqlarımın artmasında olduqca vacib idi. Təcrübə müddətində təbii ki, öyrəndiklərim çox oldu. Lakin düşünürəm ki, bu təcrübəni daha yaddaqalan və təsirli edən burda qurduğum dostluqlar və çalışdığım komanda oldu. Komandamızın hər bir üzvü bizə qarşı çox diqqətli və yardımsevər şəkildə davranaraq əllərindən gəldikləri qədər kömək etməyə çalışdılar. Gələcəkdə bu komanda ilə çalışacaq təcrübəçilər özlərini şanslı hesab edə bilərlər.
Təcrübənin şəbəkələşmə baxımından da effektiv olduğu qənaətindəyəm. Digər təcrübəçilərdən çox şey öyrəndim. Bu təcrübə mənə yaxın dostlar və çoxlu sayda tərəfdaş qazandırdı.
Mənə qazandırdığı hər şeyə görə bu təcrübə proqramına minnətdaram.
- Sezər Allahverdiyev
Seçim mərhələsi çox rəqabətli şəkildə keçən “Maliyyəçisən” təcrübə proqramının iştirakçısı olacağım halda həqiqətən ən yaxşıların arasında olacağıma inanırdım.
Proqram başladıqdan sonra da bu gözləntilərim özünü doğrultdu. İstər peşəkar, istərsə də şəxsi cəhətdən çox şey öyrəndim. İş mühitində münasibətlərin qurulması, şəbəkələşmə imkanları, həmçinin öz sahəmlə bağlı yeni praktiki bilik və bacarıqların əldə edilməsi mənim üçün çox faydalı oldu. Xüsusilə, departamentdəki əməkdaşların təcrübəçilərə olan münasibətini çox təqdir edirəm. Belə ki, mentorum da daxil olmaqla bütün əməkdaşlar öz gördükləri işləri bizə mümkün qədər detallı öyrətməyə çalışırdılar. Yəni təcrübəçi olsaq da, real işlər görürdük və bununla bağlı mütəmadi geri dönüşlər alırdıq. Mentorumun verdiyi geri dönüşlər və öyrətdikləri inkişafıma böyük töhfə verdi.
Həmçinin layihə komandamla çalışmaq da mənim üçün çox maraqlı təcrübə idi. Fərqli fikirli insanlarla müzakirə aparmaq və ortaq nöqtəyə gələ bilmək komanda şəklində işləmə bacarıqlarımı artırdı. “Maliyyəçisən” təcrübə proqramı öz sahəmdən əlavə digər istiqamətlərlə də tanış olmaq, bununla da baxış bucağımı genişləndirə bilmək imkanı yaratdı.
2 aylıq təcrübə müddətinin sonunda əminliklə deyə bilərəm ki, maliyyə sahəsinə xüsusi marağım yarandı. Hətta gələcəkdə maliyyə hüququ sahəsində ixtisaslaşmaq və bu sahə üzrə magistr təhsili almaq üçün fikirlərim formalaşdı.
- Suqra Qurbanova
Ümumilikdə təcrübəm tamamilə müsbət oldu. Xüsusilə, mentorum hər bir məqamda dəstək verdi və daim yeni biliklər aşıladı. Təkcə mentorum deyil, departamentdəki bütün əməkdaşlarla yaxın və səmimi işgüzar münasibətlər qura bildim və onların dəstəyi məni çox ruhlandırırdı.
Bundan əlavə, qəbul prosesindən başlayaraq təcrübə boyu şəxsi inkişafımız üçün daim çalışan İnsan resursları departamentindəki peşəkarlara da dərin təşəkkürümü bildirirəm. Ümumiyyətlə, Mərkəzi Bankda keçirdiyim təcrübəm sürprizlərlə dolu oldu. Bu müddət ərzində "Bəzən istədiklərimizə nail ola bilmirik, çünki daha yaxşılarına layiqik" ifadəsini tam mənası ilə təcrübədən keçirdim.
İstədiyim departamentdə yox, mənim inkişafım üçün daha əhəmiyyətli, və Mərkəzi Bankın ən önəmli departamentlərindən birində təcrübə keçməyim bunun əsas sübutudur. Yay tətilimi səmərəli şəkildə burada keçirdiyim üçün özümü çox şanslı hiss edirəm.
- Tamara Ağarzayeva
Mərkəzi Bankda keçirdiyim 2 ay mənim üçün unudulmaz bir təcrübəyə çevrildi. “Maliyyəçisən” təcrübə proqramı çox gözəl kollektivlə birgə çalışmaq və yeni dostluqlar qurmaq imkanı verdi. Proqrama seçildiyimi öyrəndiyim zaman necə sevindiyim təxmin edilə bilməz.
Təcrübə müddətim ərzində mentorumun dəstəyi ilə hüquqi araşdırma mahiyyətli tapşırıqlar üzərində çalışdım, müxtəlif ölkələrdə formalaşdırılmış sığorta məhsulları üzrə qanunvericilik aktları ilə tanış oldum. sığorta sahəsi üzrə çətinlik çəkdiyim məqamlar üzərində işlədim və onları aradan qaldıra bildim. Suallarım yarandığı hallarda komandanın məmnuniyyət və səbirlə onları cavablandırması məni öyrənməyə daha da həvəsləndirirdi. Həm mentorum, həm də departamentin digər əməkdaşları mənim və digər təcrübəçilərin öyrənməsi və kollektivə uyğunlaşması üçün əllərindən gələni əsirgəməmiş, bizə bu kollektivin bir parçası kimi hiss etdirmişlər.
- Vaqif Vaqifzadə
Hesab edirəm ki, “Maliyyəçisən” təcrübə proqramı iştirakçıların hər birinə çox böyük töhfə verdi. Proqram istedadlı gəncləri bir araya gətirərək onları Mərkəzi Bankdakı iş mühiti ilə tanış etdi.
Bu proqrama qəbul yolum həm maraqlı, həm də bir o qədər həyacanlı keçmişdi. Müraciətim qəbul olduqdan sonra test mərhələsini uğurla keçməyim məni daha da həvəsləndirdi.
Mərkəzi Bankda təcrübə keçdiyim departamentdə çoxlu biliklərə yiyələndim, departamentin vəzifə və öhdəlikləri, istinad etdikləri qanunların bir çoxunu öyrəndim. Əlbəttə ki, bunlar mentorum, departament işçiləri və rəhbərliyin dəstəyi ilə baş verdi. Onlar bizimlə öz bilik və bacarıqlarını bölüşməkdən və bizi hər zaman öyrətməkdən çəkinmədilər. Bu müddət ərzində maksimum dərəcədə dəstək oldular, bizə öz həmkarları kimi isti və səmimi münasibət göstərdilər.
Gələcəkdə karyeramı Mərkəzi Bankda davam etmək fikri ilə bu təcrübə proqramını sonlandırıram.
- Vəfa Ələkbərova
“Maliyyəçisən” təcrübə proqramında iştirakım inkişafıma xüsusi dəyər qatdı.
Layihə çərçivəsində fərqli peşəkar keyfiyyətlərə sahib təcrübəçi yoldaşlarla sığorta sektorunu araşdırmaq, “Beyin fırtınası”nda iştirak etmək fürsətim oldu. Özəlliklə, komanda ruhunun, fərqliliyin harmoniyasının ortaya gözəl nəticələr qoya biləcəyinin fərqinə vardıq. İnsan resursları, strategiya və layihələrin idarəolunması üzrə mütəxəssislər və layihə koordinatorlarımız bu yolda tam dəstək göstərdilər.
Maliyyə nəzarətinin belə mühüm sahəsində sektor ekspertlərinin rəhbərliyi və mentorluğu altında iş təcrübəsi əvəzsizdir. Sahə barədə ağlımda yaranan sualları aradan qalxmasına kömək olan yardımsevər, anlayışlı, öyrədici və daimi inkişafı təşviq edən peşəkar mühiti də xüsusi vurğulamalıyam. Qeyd edim ki, “Maliyyəçisən” təcrübə proqramı təkcə mənim kapital bazarları haqqında biliklərimi gücləndirmədi, həm də məni maliyyə tənzimlənməsi və nəzarəti sahəsində karyera qurmağa ruhlandırdı.
Mərkəzi Bankın işinə töhfə vermək imkanı yaradan və karyera yolumda mühüm mərhələ olan "Maliyyəçisən" proqramına minnətdaram. Proqramı qısa zaman ərzində praktiki biliklərə yiyələnmək, yay tətilini səmərəli keçirmək istəyən hər kəsə tövsiyə edirəm.
1
28.24 KB
aysu
343.14 KB
aytac
380.16 KB
cavad
399.24 KB
farhad
369.15 KB
tamara
331.86 KB
elxan
269.21 KB
elvira
264.11 KB
emil
290.98 KB
ələmdar
332.09 KB
əmiran
293.27 KB
fatime
375.79 KB
ferid
290.60 KB
gunay
333.74 KB
isa
316.90 KB
islam
297.16 KB
kamran
304.63 KB
leyla talibova
350.32 KB
leman
356.58 KB
madine
336.63 KB
nuray
288.87 KB
cemile
311.96 KB
reyze
416.06 KB
sara
343.47 KB
sezer
311.95 KB
suqra
336.12 KB
vaqif
294.88 KB
vefa
333.98 KB
nuray
1.18 MB
Aysel
1.22 MB
Aytac
1.16 MB
Azerin
1.09 MB
Cefer
921.07 KB
nicat
996.24 KB
elmina
984.06 KB
elnur
1.18 MB
esma
995.74 KB
əli
975.36 KB
əşrəf
1.04 MB
fatimə
1.06 MB
fərid
969.34 KB
fuad
937.10 KB
gözəl
1.01 MB
həcər
1.07 MB
xanım
1.06 MB
xəqani
1.10 MB
isa
984.67 KB
lamiyə
1.03 MB
murad
1.23 MB
murad huseynov
1.08 MB
nahid
979.48 KB
nuray
1.18 MB
orxan
1.09 MB
rafiq
1.19 MB
rahidə
1.06 MB
sahil
988.59 KB
sənan
1.07 MB
toğrul
1.07 MB
uğur
967.55 KB
vəzir
923.67 KB
zahid
953.13 KB
zeynəb
1.17 MB
zəhra
935.58 KB
asiman
1.25 MB
aysu
1.38 MB
emil
980.16 KB
əli
1.24 MB
əsgər
1.24 MB
əsmər
1.43 MB
fatimə
1.52 MB
fərid
1.37 MB
fidan_əsədova
1.35 MB
fidan_məcidli
1.30 MB
hüseyn_dadaşov
1.29 MB
hüseyn_isayev
1.69 MB
hüseyn_ismayılov
1.27 MB
ilahə
1.45 MB
ilkin
1.21 MB
jalə
1.40 MB
ləman
1.11 MB
məhəmməd
1.21 MB
murad
1.17 MB
nadir
1.41 MB
nərmin
1.21 MB
nəzrin
1.32 MB
nigar
1.52 MB
nihat
1.42 MB
nurlan
1.23 MB
raul
1.06 MB
rəsul
1.29 MB
rüstəm
1.30 MB
səmayə
1.23 MB
turanə
1.64 MB
yasin
1.28 MB
zeynəb_abbasova
1.37 MB
zeynəb xəlili
1.36 MB
zəhra
1.37 MB
ilahə murad
1.52 MB
Turab
1.26 MB