966
Ümumi müddəalar
1.1. Bu Təlimat “Qiymətli kağızlar bazarı haqqında” Azərbaycan Respublikasının Qanunu (bundan sonra - Qanun) və ləğv edilmiş Qiymətli Kağızlar üzrə Dövlət Komitəsinin 3 fevral 2016-cı il tarixli 15-q nömrəli Qərarı ilə təsdiq edilmiş “Qiymətli kağızlar bazarında emitentlər tərəfindən məlumatların açıqlanması Qaydaları”na (bundan sonra - Qaydalar) uyğun hazırlanmışdır.
1.2. Bu Təlimat Azərbaycan Respublikasının ərazisində qiymətli kağızları kütləvi təklif edilmiş (və ya edilməsi nəzərdə tutulan) və tənzimlənən bazarda ticarətə buraxılmış (və ya buraxılması nəzərdə tutulan) emitentlər (bundan sonra – emitentlər) tərəfindən Qanun və Qaydalara müvafiq olaraq məlumatların açıqlanması zamanı yardımçı vasitə rolunu oynayır.
1.3. Emitentlər tərəfindən müvafiq məlumatların açıqlanması investorlara və qiymətli kağızlar bazarının digər iştirakçılarına dəqiq və dolğun məlumatların vaxtında çatdırılmasını və informasiya uyğunsuzluğunun (asimmetriyasının) aradan qaldırılmasını təmin edir.
1.4. Emitentlərin Qanunla açıqlanması nəzərdə tutulan məlumatları Azərbaycan dilində açıqlanır. Emitent öz internet səhifəsində açıqlanmış məlumatların əldə edilməsi üçün haqq tələb edə və ya hər hansı məhdudiyyət tətbiq edə bilməz.
