Mərkəzi Bank tərəfindən “Azərbaycan Respublikasının Mərkəzi Bankı tərəfindən tədavülə buraxılan yubiley və xatirə pul nişanlarının satışı Qaydası”na uyğun olaraq yeni satış agenti seçilib. Belə ki, Mərkəzi Bank ilə Azərbaycan Respublikası Prezidentinin İşlər İdarəsi “Azərsuvenir” (Azərbaycan Suvenirləri) MMC arasında imzalanmış müqaviləyə əsasən yubiley və xatirə pul nişanlarının satışı sözügedən şirkətə həvalə olunub. Yubiley və xatirə pul nişanlarının Mərkəzi Bankdan banklara satışı isə müvafiq olaraq dayandırılıb.

Qeyd edək ki, “Azərsuvenir” MMC dövlət təşkilatı kimi uzun illərdir ki, qiymətli metallardan hazırlanmış müxtəlif suvenirlərin, zinət əşyalarının və numizmatik dəyərə malik predmetlərin istehsalını və satışını həyata keçirir.

Mərkəzi Bank və “Azərsuvenir” MMC arasındakı bu tərəfdaşlıq yubiley və xatirə pul nişanlarının satışının artırılmasını təşviq edəcək.

Müqaviləyə əsasən “Azərsuvenir” MMC tərəfindən yubiley və xatirə pul nişanlarının satışı aşağıdakı qiymətlər üzrə həyata keçiriləcək:

• Qızıldan hazırlanmış yubiley və xatirə pul nişanlarının satış qiyməti - qızılın Mərkəzi Bank tərəfindən hər iş günü üçün müəyyən edilmiş məzənnəsinə 10%-dək haqq əlavə olunmaqla;
• Gümüş və kupronikeldən hazırlanmış yubiley və xatirə pul nişanlarının satış qiyməti - bazarın tələbi əsasında sərbəst qiymətlərlə.

Yubiley və xatirə pul nişanlarını “Azərsuvenir” MMC-nin aşağıdakı satış nöqtələrindən əldə etmək mümkündür:

• Bakı şəhəri, Nigar Rəfibəyli 29
• Bakı şəhəri, Həsən bəy Zərdabi 74
• Şəki şəhər Kiş kəndi, “Marxal Resort & Spa”
• İsmayıllı rayonu, Basqal qəsəbəsi, "Basqal Resort & Spa"